Talavou e, ia Faafiafia o Outou Mātua
NA TUSI le aposetolo matua o Ioane e faapea: “E leai soʻu fiafia e sili i lenei, pe a ou faalogo ua savavali laʻu fanau i le upu moni.” (3 Ioane 4) E ui e faasino atu le fanau o loo taʻua i lenei mau i soo Kerisiano, ae e faigofie lava ona malamalama se matua e mataʻu i le Atua, i upu nei a Ioane. E mafai e mātua ona faia se suiga aogā i olaga o a latou fanau. E faapena foʻi ona iai se aafiaga tele o gaoioiga a fanau i olaga o o latou mātua.
Na taʻua e le tupu Isaraelu o Solomona le aafiaga tele e mafai e le fanau ona faia i o latou mātua. Na ia tusi: “O le atalii poto na te faafiafia lona tamā; a o le tama valea e faanoanoa ai lona tinā.” (Faataoto 10:1) O lea la, e ao i fanau uma e oo lava i fanau ua matutua, ona iloilo lelei aafiaga o a latou gaoioiga o le a iai i o latou tamā ma tinā. Aiseā e tāua ai lenei mea?
Seʻi manatu i mea uma ua faia e ou mātua o ē matataʻu i le Atua i le tausia aʻe o oe! Ua leva ona amata iai o la popolega ma fai talosaga mo oe a o leʻi taitai e fanau mai. Ina ua e fanau mai, na olioli ou mātua i se faiā māfana ma oe, ma na la faafetai i le Atua mo le faaeaga ma le tiute tauave sili ona tāua o le avea ma mātua. Ua la tausia aʻe nei se pepe, ma i le avea o ni tagata tapuaʻi o Ieova, sa la faataunuu lelei lenā tiute tauave.
Talu ai o ou mātua o ni Kerisiano moni, e la te saʻili atu la i le Tusi Paia ma lomiga faale-Tusi Paia mo se taʻitaʻiga maufaatuatuaina, ma fesili atu i ē na tausia aʻe fanau mo ni fautuaga. E la te faaleo atu pea o la popolega i le Atua e ala i le tatalo. (Faamasino 13:8) A o e tuputupu aʻe, e iloa e ou mātua ou uiga lelei ma ou vaivaiga. (Iopu 1:5) E tele ni luʻi fou o le a tulaʻi mai i taimi o le talavou. E iai nisi taimi o le a e lē usitai ai, ma o le a atili ai ona tatalo ou mātua, e la te faitau atili, ma toe manatunatu i le auala e fesoasoani ai iā te oe ina ia e tapuaʻi pea i le Tamā o i le lagi, o Ieova.
E lē taitai mou atu lagona faamātua o lou tinā ma lou tamā. E la te manatu mamafa pea mo lou lelei faaletino, mafaufau, faalogona, ma le faaleagaga, e tusa lava po ua e matua. Ae i na taimi uma, e manatua e mātua e ao ona e faia au lava filifiliga, ma e lē mautinoa po o ā iʻuga e iʻu i ai lou olaga. O le a e filifilia lava le ala e te mulimuli i ai.
Pe e lē talafeagai ea la ona manatu, afai e ‘leai se isi mea e sili ona fiafia’ i ai mātua na i lo le ‘faalogo ua savavali a latou fanau i le upu moni,’ o lona uiga foʻi la e moni le manatu a lē savavali le fanau i le upu moni, o le a faanoanoa mātua? E mautinoa o fanau e gaoioi ma le lē atamai, o le a aumaia ni faanoanoaga i o latou mātua. Na taʻua e Solomona: “O le atalii valea o le faatigā loto lea i lona tamā; o le faaonoono foʻi i lē na fanau mai o ia.” (Faataoto 17:25) Pagā le faanoanoa e oo i mātua pe a tuua e se tamaitiiti le tapuaʻiga i le Atua moni!
E manino mai la, e telē se aafiaga a outou le fanau i lo outou aiga ma isi vala. O a outou amioga e matuā aafia ai loto o o outou mātua. Afai e tou te fulitua i le Atua ma ana taʻiala, o le a mafatia o outou mātua. Ae afai e tou te tumau faamaoni ma usiusitai iā Ieova, o le a olioli o outou mātua. Ia maumauaʻi e faia mea e faafiafia ai o outou mātua! O le ā ea se isi meaalofa tautele e mafai ona e avatua i ē o loo tausia, puipuia, ma alolofa iā te oe?