‘Ia Vaavaai Lelei le Galuega Lea na E Talia o se Soo o le Alii’
“Ia vaavaai lelei ina ia faataunuuina le galuega lea na e talia o se soo o le Alii.”—KOLO. 4:17.
1, 2. O le ā le matafaioi a Kerisiano i tagata lautele?
UA IĀ i tatou se matafaioi tāua i tagata lautele. O a latou faaiʻuga e fai a lē iʻu i le ola, e iʻu i le oti, i le taimi o le “puapuaga tele.” (Faaa. 7:14) Ua faapea mai le tusitala o le Faataoto: “Ia e laveaʻi i ē ua puʻea ia oti, ma ē a oo ina fasia.” E mataʻina nei upu! O le lē taulau ona tatou faia o le matafaioi o le lapataʻia o tagata e tusa ma a latou filifiliga, e tatou te nofosala ai i o latou toto. Ua faaauau mai le mau e faapea: “Afai e te faapea, Faauta, matou te leʻi iloa lenei tagata; o lē ua fuatia loto, na te lē lagona ea? o lē ua tausia lou agaga, na te lē silafia ea? na te lē taui atu ea i le tagata e tusa ma lana galuega?” E mautinoa, e lē mafai ona faapea mai auauna a Ieova, e latou te “leʻi iloa” le tulaga mataʻutia ua fesagaʻi pea ma tagata.—Faata. 24:11, 12.
2 E tāua iā Ieova le ola. Ua ia lapataʻia ana auauna e faia taumafaiga uma latou te mafaia, ina ia faasaoina ai le tele o ola. E tatau i auauna taʻitoʻatasi a le Atua ona folafola atu le feʻau faasaoola o loo i le Afioga a le Atua. O la tatou galuega talaʻi ua pei o le galuega a le tagata vāai o lē taʻu atu le lapataʻiga, pe a ia vaaia se tulaga faigatā ua faaloloʻi mai. E tatou te lē mananaʻo e i o tatou luga le toto o i latou e faaumatia. (Eseki. 33:1-7) O lea la, maʻeu le tāua o le faaauau pea o a tatou taumafaiga e “talaʻi atu le upu”!—Faitau le 2 Timoteo 4:1, 2, 5.
3. O ā mataupu o le a talanoaina i lenei suʻesuʻega ma isi suʻesuʻega e lua o loo mulimuli mai?
3 O le a talanoaina i lenei suʻesuʻega le auala e mafai ai ona e foʻia faafitauli i lau galuega faasaoola, ma le auala e mafai ai ona e fesoasoani i le toʻatele o tagata. O le a iloiloina i le isi suʻesuʻega o sosoo mai, le auala e avea ai oe ma faiaʻoga tomai o le upu moni. O le suʻesuʻega lona tolu, o le a talanoaina ai iʻuga e faalaeiauina ai ua maua e tagata talaʻi o le Malo i le lalolagi aoao. A o leʻi tilofaʻia nei mataupu, o se mea lelei le toe iloilo o ni māfuaaga ua matuā faigatā ai o tatou taimi.
Le Māfuaaga ua Leai ai se Faamoemoe o le Toʻatele
4, 5. O le ā ua oo i tagata, ma o ā uiga ua faaalia mai e le toʻatele?
4 Ua faaalia i mea o loo tutupu i le lalolagi, ua tatou ola nei i le “iʻuga o faiga o mea a le lalolagi,” ma ua lata mai lava lenā iʻuga. Ua oo i tagata mea ma tulaga na taʻua e Iesu ma ona soo e faailogaina ai “aso e gata ai.” O “tigā ma puapuaga,” e aofia ai taua, o oge, o mafuiʻe, ma isi mala ua pagatia ai tagata. Ua taatele amioga lē taupulea, o le manatu faapito ma uiga e lē faale-Atua. E oo lava i tagata o ē taumafai e ola i tapulaa a le Tusi Paia, ua “sili ona faigatā” nei aso iā i latou.—Mata. 24:3, 6-8, 12; 2 Timo. 3:1-5.
5 Peitaʻi, ua lē iloa e le toʻatele o tagata le uiga moni o mea o loo tutupu i le lalolagi. O le iʻuga, ua popole le toʻatele i lo latou saogalemu faapea foʻi ma o latou aiga. O le toesea o ē e pele i le oti ma isi mala e oo i le tagata, ua mafatia ai le toʻatele. O le leai o se malamalamaga saʻo i le pogai ua tutupu ai nei mea, ma po o fea e maua ai le vaifofō, ua leai ai se faamoemoe o nei tagata.—Efe. 2:12.
6. Aiseā ua lē mafai ai e “Papelonia Tele” ona fesoasoani i ona tagata lotu?
6 E itiiti se faamāfanafanaga ua aumaia e “Papelonia Tele,” po o lotu sesē uma o le lalolagi, mo le toʻatele o tagata. Ua ia faafenumiaʻi le toʻatele o tagata i le itu faaleagaga, e ala i le “uaina o lana faitaaga.” E lē gata i lea, e ala i le gaoioi e pei o se fafine talitane, ua faasesēina ma pulea ai e lotu sesē ia “tupu o le lalolagi,” i aʻoaʻoga sesē ma faiga faataulāitu, ua gauaʻi atu ai le toʻatele e aunoa ma le fesiligia o o latou faipule faapolotiki. O lea la, ua maua ai e lotu sesē le mana ma le malosi, ae i le taimi e tasi, ua matuā teena upu moni a le Tusi Paia.—Faaa. 17:1, 2, 5; 18:23.
7. O le ā le tulaga e ono tupu i le toʻatele o tagata, ae e faapefea ona fesoasoani iā i latou?
7 Na aʻoaʻo Iesu e faapea, o le toʻatele o tagata, ua ui atu i le auala vatele lea e tau atu i le faaumatiaga. (Mata. 7:13, 14) O nisi tagata, ua ui atu i le auala vatele ona ua latou teena ma le loto i ai mea ua aʻoaʻo e le Tusi Paia, ae o le toʻatele ua māfua ona ui i lenā auala ona ua faasesēina i latou, pe ona ua faapogisaina i mea e finagalo i ai Ieova latou te faia. Atonu e faia e nisi ni suiga i o latou olaga, pe afai e taʻu atu i ai māfuaaga mai i le Tusi Paia e ao ai ona faia faapea. Ae peitaʻi, o i latou o ē nonofo ai pea i Papelonia Tele, ma teena pea tapulaa o le Tusi Paia, e lē faasaoina i latou mai i le “puapuaga tele.”—Faaa. 7:14.
Ia “Lē Aunoa” Ona Talaʻi Atu
8, 9. O le ā na faia e Kerisiano i le uluaʻi senituri ina ua feagai ma teteega, ma aiseā?
8 Na fetalai Iesu e talaʻia e ona soo le tala lelei o le Malo, ma fai ma soo. (Mata. 28:19, 20) O lea, ua manatu ai Kerisiano moni, o le faia o se sao i le talaʻiga, o lo latou faamaoni lea i le Atua, ma o le faavae lea e manaʻomia mo lo latou faatuatua. O le mea foʻi lea na finafinau ai pea soo o Iesu e ui i teteega. Na latou faalagolago iā Ieova mo le malosi, ma tatalo iā te ia ina latou faaauau ona “tautatala atu ai pea i [lana] afioga ma le lototetele.” I le tali mai, na faatumuina i latou e Ieova i le agaga paia, ma na latou tautatala ai ma le lototetele i le afioga a le Atua.—Galu. 4:18, 29, 31.
9 Pe na taofia ea e soo o Iesu le talaʻia o le tala lelei ina ua matuā ogaoga teteega? E leai. Na puʻea faapagota e taʻitaʻi lotu Iutaia aposetolo, na faamataʻu ma sasa i latou, ona o le lē fiafia i la latou talaʻiga. Peitaʻi, ‘ua lē aunoa ona latou aʻoaʻo atu ma folafola atu le tala lelei e uiga iā Iesu le Keriso.’ Na latou iloa lelei, e tatau ona latou “usiusitai i le Atua o le pule, nai lo o tagata.”—Galu. 5:28, 29, 40-42.
10. O ā luʻi ua fesagaʻi ma Kerisiano i aso nei, ma o le ā e ono iʻu i ai a latou amioga lelei?
10 E leʻi oo i le toʻatele o auauna a le Atua i aso nei le sasa po o le faafalepuipui ona o le talaʻiga. Peitaʻi, e eseese tofotofoga ma luʻi e fesagaʻi ma Kerisiano uma. O se faaaʻoaʻoga, atonu ua uunaʻia oe e lou lotofuatiaifo ua uma ona aʻoaʻoina e le Tusi Paia, ia ese lau amio ma mea e te faia mai i isi. Talu ai e faavae au filifiliga i taʻiala o le Tusi Paia, atonu la e manatu ai au aumea, o uō i le aʻoga po o tuaoi foʻi, e ese lava oe. Peitaʻi, e lē tatau ona e lotovaivai ai ona o lo latou lē fiafia mai. Ua iai le lalolagi i le pogisa faaleagaga, ae e ao i Kerisiano ona ‘susulu atu e pei o molī e faamalamalama aʻi.’ (Fili. 2:15) Atonu e vāai mai nisi o tagata loto faamaoni ma latou mātauina au galuega lelei, ma e iʻu ai ina latou vivii atu iā Ieova.—Faitau le Mataio 5:16.
11. (a) O le ā le tali a nisi i le galuega talaʻi? (e) O ā ituaiga o teteega na fesagaʻi ma Paulo, ma o le ā na ia faia?
11 E tatou te manaʻomia le lototele e faaauau ai pea le talaʻiga o le feʻau o le Malo. O nisi tagata, e oo lava i aiga, atonu latou te tauemu iā te oe po o le taumafai foʻi e faalotovaivai oe i nisi o auala. (Mata. 10:36) E sili atu i le faatasi ona sasaina le aposetolo o Paulo ona o lana galuega talaʻi. Mātau le auala na ia tali atu ai i na teteega. Na ia tusi: ‘E ui ina muamua ona matou puapuagatia ma faileagaina, ae na mafai ona matou lototetele ona o lo tatou Atua, ina ia taʻu atu iā te outou le tala lelei a le Atua ma le finafinau tele.’ (1 Tesa. 2:2) E mautinoa, o se luʻi mo Paulo le faaauau pea ona taʻu atu le tala lelei ina ua uma ona puʻeina, saei ese ona lavalava, sasa i laau ma tuuina i le falepuipui. (Galu. 16:19-24) Na faapefea ona ia maua le lototele e faaauau ai pea? Ona o lona faanaunauga malosi ia faataunuu le faatonuga a le Atua e talaʻi.—1 Kori. 9:16.
12, 13. O ā ni luʻi ua fesagaʻi ma isi, ma ua faapefea ona latou taumafai e foʻia?
12 E mafai foʻi ona avea ma luʻi le maelega pea i oganuu e seāseā maua ai tagata i o latou fale, po o oganuu foʻi e faalēfiafia tagata i le feʻau o le Malo. O le ā e mafai ona tatou faia i na tulaga? E manaʻomia ona tatou lototetele e talanoa atu i tagata i tulaga faasamasamanoa. E mafai foʻi ona toe fetuunaʻi a tatou faasologa, po o le taumafai foʻi e talaʻi i nofoaga e tele ai ni tagata tatou te maua ai.—Faatusatusa le Ioane 4:7-15; Galuega 16:13; 17:17.
13 O loo tauivi nisi ma faigatā o le soifua matua ma le lē lelei o le soifua mālōlōina, lea ua itiiti ai mea e mafai ona latou faia i le galuega talaʻi. Afai o le tulaga lenā ua oo iā te oe, aua e te lotovaivai ai. O loo silafia e Ieova le mea e gata ai lou mafai ma e na te talisapaia le mea ua e mafai ona faia. (Faitau le 2 Korinito 8:12.) Po o ā lava ituaiga o faigatā o e fesagaʻia—o teteega, o le lē ano mai, po o le lē lelei o le soifua mālōlōina—ia e faia mea uma e te mafaia e taʻu atu ai le tala lelei i isi.—Faata. 3:27; faatusatusa le Mareko 12:41-44.
‘Ia Vaavaai Lelei Lau Galuega’
14. O le ā le faaaʻoaʻoga sa faataatia e Paulo mo Kerisiano, ma o le ā le fautuaga na ia aumaia?
14 Sa tinoū Paulo e fai lana galuega, ma na ia faalaeiau ona uso talitonu ina ia faia faapea. (Galu. 20:20, 21; 1 Kori. 11:1) O se tasi na filifilia e Paulo e faalaeiau faapitoa lava i ai, o se Kerisiano i le uluaʻi senituri e suafa iā Arekipa. I lana tusi i tagata Kolose, na tusi atu ai Paulo: “Ia taʻu atu foʻi iā Arekipa: ‘Ia vaavaai lelei ina ia faataunuuina le galuega lea na e talia o se soo o le Alii.’” (Kolo. 4:17) E tatou te lē iloa po o ai Arekipa po o le ā foʻi lona tulaga sa iai, ae e manino mai na ia taliaina le tofiga e talaʻi. Pe afai o oe o se Kerisiano ua uma ona e tuuina atu, ua e taliaina foʻi la le tofiga e talaʻi. Po o faaauau pea ona e vaavaai lelei i le galuega talaʻi ina ia e faataunuuina?
15. O le ā e aofia ai i le tuuina atu faa-Kerisiano, ma o ā fesili ua lāgā ai?
15 I le taimi o lo tatou papatisoga, na tatou tuuina atu ai iā Ieova e ala i se tatalo faamaoni. O lona uiga, ua tatou naunau e faia lona finagalo. O lea la, e ao ona tatou fesili ifo iā i tatou lava, ‘Po o le faia o le finagalo o Ieova o le mea lea e sili ona tāua i loʻu olaga?’ Ua iā i tatou tiute tauave eseese o loo faatalitalia e Ieova i tatou ia faia, e iai le tausiga o o tatou aiga. (1 Timo. 5:8) Ae, o faapefea ona tatou faaaogā o tatou taimi ma le malosi? O ā mea tatou te faamuamua i o tatou olaga?—Faitau le 2 Korinito 5:14, 15.
16, 17. O ā avanoa e ono manatunatu i ai talavou Kerisiano ma i latou e tau leai ni tiute fai?
16 Po o oe o se talavou Kerisiano ua uma au aʻoga po ua lata foʻi ina uma? Atonu e lē tele ni ou tiute fai i le aiga. O lea la, o le ā o e fuafua e fai i lou olaga? O ā filifiliga e te faia e mafai ai ona e faataunuu lau folafolaga na fai iā Ieova e faia lona finagalo? E toʻatele ua suia o latou tulaga ina ia mafai ai ona paeonia, ma ua latou maua ai le olioli ma le faamalieina.—Sala. 110:3; Fai. 12:1.
17 Atonu o oe o se talavou matua. O loo e faigaluega ma atonu e lē tele ni ou tiute fai seʻi vaganā ai le tausia o oe lava. E lē taumatea e te fiafia e auai i mea fai a le faapotopotoga i le tele e mafai ai e tusa ma lau faasologa. Pe e te fia maua atili le olioli? Po o e mafaufau e faalautele atu lau galuega talaʻi? (Sala. 34:8; Faata. 10:22) I nisi o oganuu, ua manaʻomia ai le tele o galuega e fai ina ia oo atu i tagata uma le feʻau faasaoola o le upu moni. Pe e mafai ona e faia ni fetuunaʻiga i lou olaga, atonu e talaʻi i se vaipanoa o loo manaʻomia ai le tele o tagata talaʻi o le Malo?—Faitau le 1 Timoteo 6:6-8.
18. O ā ni fetuunaʻiga sa faia e se tasi ulugalii talavou, ma o ā iʻuga?
18 Seʻi o tatou iloiloina le faaaʻoaʻoga a Keveni ma Elena, mai i Amerika.a O se mea e masani ai i ulugalii talavou faatoʻā uma ona faaipoipo i lo latou vaipanoa, o le mafaufau lea e faatau se fale. E faigaluega faasoloatoa i laʻua uma ina ia sologa lelei pea o la olaga. Ae peitaʻi ua tau leai se taimi mo le talaʻiga, ona o a la galuega faapea mea e fai i le fale. Na la iloa, ua alu le tele o lo la taimi ma le malosi i a la meatotino. Ae ina ua la mātauina le faigofie o le olaga o se ulugalii paeonia, na filifili ai loa Keveni ma Elena e suia mea e faamuamua i o la olaga. Ina ua uma ona tatalo ina ia fesoasoani Ieova i le la filifiliga, sa la faatau atu lo laʻua fale ma siitia e nonofo i se nofoaga e lē telē tele. Na faaitiitia e Elena itula e faigaluega ai ae avea ma paeonia. Na faalaeiauina Keveni ona o le fiafia o lana avā i le talaʻiga, o lea na ia tuua ai lana galuega ae amata ona paeonia. Mulimuli ane, sa la siitia atu i se atunuu i Amerika i Saute e auauna ai i le mea o manaʻomia ai le toʻatele o ni tagata talaʻi o le Malo. Ua faapea mai Keveni: “Na fiafia la maʻua faaipoipoga, ae ina ua ma galulue ia faateleina le ma auaunaga faaleagaga, sa matuā atili faateleina ai lo maʻua fiafia.—Faitau le Mataio 6:19-22.
19, 20. Aiseā ua avea ai le talaʻiga o le tala lelei o se galuega e sili ona tāua i aso nei?
19 O le talaʻiga o le tala lelei, o le galuega sili lea ona tāua o loo faia i le lalolagi i aso nei. (Faaa. 14:6, 7) E saosaolaumea i le faapaiaina o le suafa o Ieova. (Mata. 6:9) O le feʻau o le Tusi Paia ua faaleleia ai olaga o le faitau afe o ē taliaina i tausaga taʻitasi, ma e mafai ona taʻitaʻiina ai i le faaolataga. Ae na fesili Paulo: “E faapefea foʻi ona latou faalogo pe a leai se tasi e talaʻi atu?” (Roma 10:14, 15) Ioe, e mafai faapefea ona latou faalogo? Aiseā e lē maumauaʻi ai e faia mea uma e te mafai ina ia faataunuu ai lou tofiga e talaʻi?
20 O le isi auala e mafai ona e fesoasoani ai i tagata e malamalama i le tāua o nei taimi faigatā ma taunuuga o filifiliga latou te faia, o le faaleleia lea o lou tomai e aʻoaʻo atu. O le a talanoaina i le suʻesuʻega o sosoo mai le auala e mafai ai ona e faia faapea.
[Faaopoopoga i lalo]
a Ua suia igoa.
E Faapefea Ona E Tali?
• O le ā le tiute tauave o Kerisiano i tagata lautele?
• E faapefea ona tatou taulimaina luʻi i la tatou galuega talaʻi?
• E mafai faapefea ona tatou faataunuu le galuega ua tatou taliaina?
[Ata i le itulau 5]
E manaʻomia le lototele e talaʻi ai e ui i teteega
[Ata i le itulau 7]
O le ā e te faia pe a e talaʻi i oganuu e seāseā maua ai tagata i fale?