Ia Fai se Agaʻigaʻi i Luma Faaleagaga, e Ala i le Mulimuli i le Faaaʻoaʻoga a Paulo
“Ua ou tau le taua lelei, ua ou faaiʻuina le tausinioga, ua ou tausia le faatuatua.”—2 TIMO. 4:7.
1, 2. O ā suiga na faia e Saulo o Taso i lona olaga, ma o le ā le galuega tāua sa ia faia?
O IA o se tagata e atamai ma e maumauaʻi. Peitaʻi, sa ‘amio o ia e tusa ma le tuʻinanau o lona tino.’ (Efe. 2:3) Na mulimuli ane ona faamatalaina o ia o sē e ‘upuleaga ma faasauā, ma o se tagata fiasili.’ (1 Timo. 1:13) O lenā tamāloa, o Saulo o Taso.
2 A o faagasolo taimi, sa faia e Saulo ni suiga mataʻina i lona olaga. Sa ia lafoaʻi ona ala tuai ae galue malosi, ‘e lē ina ia saʻili i sona lava lelei ae e mo le lelei o le toʻatele.’ (1 Kori. 10:33) Sa agamalu o ia ma faaalia le alofa faapelepele i ona uso i le faapotopotoga, o ē sa ia sauāina ona o lona inoino. (Faitau le 1 Tesalonia 2:7, 8.) Na ia tusi e faapea, “Ua avea aʻu ma auauna,” ona toe faaopoopo mai lea: “Ua tuuina mai iā te aʻu, o lē e itiiti ifo i le tagata aupito i faatauvaa o le ʻaupaia, lenei agalelei faifua ina ia ou talaʻi atu le tala lelei i nuu ese, e faatatau i oloa lē masuʻesuʻeina a Keriso.”—Efe. 3:7, 8.
3. I le ā le auala e fesoasoani ai iā i tatou le suʻesuʻeina o tusi a Paulo, ma faamatalaga e uiga i lana faiva?
3 Sa faia e Saulo, lea foʻi e iloa iā Paulo, se agaʻigaʻi i luma mataʻina i lona malamalamaga i le upu moni. (Galu. 13:9) O se tasi o vala aogā e televave ai lo tatou lava agaʻigaʻi i luma i le upu moni, o le suʻesuʻeina lea o tusi a Paulo atoa ma faamatalaga e uiga i lana faiva, ona taumafai lea e faataʻitaʻi i lana faaaʻoaʻoga o le faatuatua. (Faitau le 1 Korinito 11:1; Eperu 13:7.) Seʻi o tatou iloiloina pe faapefea e le faia o lenā mea, ona uunaʻia ai i tatou e fai se faasologa lelei mo suʻesuʻega a le tagata lava ia, atiaʻe le alofa moni mo tagata, ma ia iai se vaaiga saʻo iā i tatou lava.
Le Faasologa a Paulo i le Faia o Suʻesuʻega
4, 5. Na faapefea ona aogā iā Paulo le faia o ana lava suʻesuʻega?
4 Ona o ia o se Faresaio na aʻoaʻoina e “Kamalielu . . . ina ia matuā tausi i le Tulafono,” sa iai la se malamalamaga o Paulo i le Tusi Paia. (Galu. 22:1-3; Fili. 3:4-6) Ina ua uma lona papatisoga, ona ia ‘alu atu lea i Arapi’—a lē i le Toafa o Suria pe i se nofoaga toʻafilemu i le Penisula o Arapi, e manatunatu loloto ai. (Kala. 1:17) Sa manaʻo Paulo e manatunatu i mau e faamaonia ai o Iesu o le Mesia. E lē gata i lea, sa ia manaʻo foʻi e sauniuni mo le galuega ua tuu atu iā te ia. (Faitau le Galuega 9:15, 16, 20, 22.) Sa faaalu e Paulo se taimi e manatunatu loloto ai i mea faaleagaga.
5 O le poto ma le malamalama faale-Tusi Paia lea na maua e Paulo mai ana lava suʻesuʻega, sa mafai ai ona ia aʻoaʻo atu ma le uigā le upu moni. O se faaaʻoaʻoga, i le malumalu i Anetioka i Pisitia, a itiiti mai e faalima ona sii atu e Paulo manatu mai i Tusitusiga Eperu ina ia faamaonia ai o Iesu o le Mesia. E tele foʻi taimi sa faasino atu ai Paulo i tusitusiga paia. Sa matuā faatalitonuina tagata i ana tali na tali atu ai mai le Tusi Paia, ma “o le toʻatele o tagata Iutaia ma tagata liulotu o ē e tapuaʻi i le Atua, na latou mulimuli atu iā Paulo ma Panapa,” ina ia aʻoaʻoina atili mea. (Galu. 13:14-44) Ina ua ō atu iā te ia se vaega o tagata Iutaia o loo nonofo i Roma, i le mea sa ia nofo ai i ni tausaga mulimuli ane, sa faamatala atu e Paulo mataupu iā i latou “e ala i le molimau māeʻaeʻa i le malo o le Atua, ma faia faamatalaga e faatalitonu ai iā Iesu, mai le tulafono a Mose ma le ʻau Perofeta.”—Galu. 28:17, 22, 23.
6. O le ā sa fesoasoani iā Paulo e tumau ai ona malosi faaleagaga, ina ua fesagaʻi ma tofotofoga?
6 Ina ua fesagaʻi ma tofotofoga, sa faaauau pea ona suʻesuʻe e Paulo le Tusi Paia ma maua mai ai le malosi mai i feʻau faagaeeina o loo iai. (Epe. 4:12) A o faafalepuipui i Roma a o lumanaʻi ai lona faasalaga oti, sa talosaga atu Paulo iā Timoteo e sau ma aumai “tusi tāʻai” ma tusi tāʻai e fai i “paʻu o manu.” (2 Timo. 4:13) O na tusi tāʻai o se vaega o Tusitusiga Eperu, ia sa faaaogā e Paulo e fai ai ana suʻesuʻega loloto. O le mauaina o le poto i Tusitusiga Paia, e ala i le iai o se faasologa o le suʻesuʻeina o le Tusi Paia, sa fesoasoani iā Paulo e tumau mausalī ai.
7. Taʻu mai ni aogā e te maua mai le suʻesuʻeina e lē aunoa o le Tusi Paia.
7 O le a fesoasoani foʻi iā i tatou le suʻesuʻeina e lē aunoa o le Tusi Paia ma manatunatu loloto i ai, ina ia agaʻigaʻi ai i luma faaleagaga. (Epe. 5:12-14) Na pese le faisalamo e faatatau i le aogā o le Afioga a le Atua: “E sili ona lelei iā te aʻu o le tulafono a lou fofoga i afe o auro ma ario. O au poloaʻiga e sili ai ona poto o aʻu i ē ita mai iā te aʻu; auā e iā te aʻu lava ia e faavavau. Ua ʻalo ese oʻu vae i ala leaga uma lava, ina ia ou tausi i lau afioga.” (Sala. 119:72, 98, 101) Po o i ai sau faasologa o le suʻesuʻeina o le Tusi Paia? Po o e sauniuni mo tofiga i le lumanaʻi i le auaunaga i le Atua, e ala i le faitauina o le Tusi Paia i aso taʻitasi ma manatunatu loloto i mea ua e faitauina?
Sa Aʻoaʻoina Saulo e Alofa i Tagata
8. Sa faapefea ona feagai Saulo ma i latou e lē o ni tagata Iutaia?
8 A o leʻi avea Saulo ma Kerisiano, sa maelega o ia i lana lotu, peitaʻi e leʻi naunau tele o ia i tagata e lē o ni Iutaia. (Galu. 26:4, 5) Sa ia vaai ma faamaonia le fetogia o Setefano e nisi o tagata Iutaia. Atonu o le vaai i lenei mea na tupu, na manatu ai e lē afāina pe a sauāina Kerisiano, ma atonu na vaai i le faasalaina o Setefano faapea, o sē ua tatau i ai le faasalaga. (Galu. 6:8-14; 7:54–8:1) Ua taʻua i le tala e faapea: “Ua soona sauā Saulo i le faapotopotoga, ua osofaʻi atu i lea fale ma lea fale, ma fetoso mai ai tane ma fafine, ua ia tuuina atu i latou i le falepuipui.” (Galu. 8:3) Sa ia ‘alu atu ma faasauā iā i latou e oo lava i isi aai.’—Galu. 26:11.
9. O le ā le mea na tupu na uunaʻia ai Saulo, e toe iloilo le auala na ia feagai ai ma tagata?
9 Sa faaali atu le Alii o Iesu iā Saulo a o alu atu o ia i Tamaseko e faapuapuagatia soo o Keriso. O le pupula atu o le malamalama uigaese e lē masani ai o le Alo o le Atua, na iʻu ai ina tauaso Saulo ma faalagolago ai i isi. Ina ua faaaogā e Ieova Anania e toe faapupula Saulo, sa suia atoatoa ai i inā uiga o Saulo i tagata. (Galu. 9:1-30) Ina ua avea ma soo o Keriso, sa ia galue malosi e feagai ma tagata i le auala e pei ona sa faia e Iesu. O lona uiga e leʻi toe sauā o ia, ae sa ia ‘nofo filemu ma tagata uma.’—Faitau le Roma 12:17-21.
10, 11. Na faapefea ona faaalia e Paulo le alofa moni i tagata?
10 Sa leʻi manaʻo Paulo e tau ina nofo filemu ma isi. Sa ia manaʻo foʻi e faaali atu iā i latou le alofa moni, ma na ia maua le avanoa e faia ai faapea i le faiva faa-Kerisiano. Sa ia talaʻi atu le tala lelei i Asia Itiiti i lana malaga muamua faamisionare. E ui lava i teteega ogaoga, ae sa naunau pea Paulo ma ana aumea e fesoasoani i tagata lotomaulalo e avea ma Kerisiano. Sa latou toe asiasi atu i Lusa ma Ikonio, e ui lava na taumafai tagata tetee i na aai e fasioti Paulo.—Galu. 13:1-3; 14:1-7, 19-23.
11 Mulimuli ane, na asiasi atu Paulo ma lana vaega i Maketonia i le aai o Filipi, ina ia saʻilia tagata o ē na mananaʻo e atiaʻe se faiā ma le Atua. Sa faalogo se tagata liu lotu o lona igoa o Litia, i le tala lelei ma avea ma Kerisiano. Sa sasa e i latou sa iai i le tulaga pule ia Paulo ma Sila i laau, ma lafo i laʻua i le falepuipui. Ae ui i lea, na talaʻi Paulo i se leoleo o le falepuipui, ma o le iʻuga, na papatiso lenei leoleo o le falepuipui ma lona aiga ma avea o ni ē e tapuaʻi iā Ieova.—Galu. 16:11-34.
12. O le ā na uunaʻia ai le tagata sauā o Saulo e avea ma aposetolo alofa o Iesu Keriso?
12 Aiseā na talia ai e Saulo, o lē sa faasauā, le faatuatua o i latou sa ia sauāina? O le ā na uunaʻia ai lenā tagata sauā e avea ma aposetolo, o sē e agalelei ma alofa, ma o lē na lotomalie e lamatia lona ola ina ia aʻoaʻoina e isi le upu moni e faatatau i le Atua ma Keriso? Ua faamatala mai e Paulo e faatatau iā te ia: “O le Atua o lē na . . . valaauina aʻu ona o lona agalelei faifua, na ia finagalo e lelei ona faaalia mai lona Alo e ala iā te aʻu.” (Kala. 1:15, 16) Na tusi atu Paulo iā Timoteo e faapea: “Na faaalia . . . le alofa mutimutivale iā te aʻu, auā o aʻu na sili lava ona agasala, a ua faaalia ai e Keriso Iesu lona faapalepale, ina ia avea aʻu ma faaaʻoaʻo iā i latou o ē e faatuatua iā te ia mo le ola e faavavau.” (1 Timo. 1:16) Na faamagalo e Ieova Paulo, ma o lona mauaina o lenā agalelei faifua ma le alofa mutimutivale, na uunaʻia ai o ia e faaalia le alofa i isi e ala i le taʻu atu o le tala lelei iā i latou.
13. O le ā e uunaʻia ai i tatou e faaalia le alofa i isi, ma e faapefea ona tatou faia faapea?
13 E faapena foʻi ona faamagalo e Ieova a tatou agasala ma mea sesē. (Sala. 103:8-14) Na fesili le faisalamo e faapea, “Ioa e, afai e te mātaulia le amio leaga, le Alii e, o ai sē na te mafaia ona tulaʻi?” (Sala. 130:3) Pe ana lē alofa mutimutivale le Atua, semanū e leai se tasi o i tatou e olioli i le auaunaga paia, pe taulaʻi atu foʻi i le mauaina o le ola e faavavau. O loo matuā agalelei mai le Atua iā i tatou uma. O lea la, i le pei o Paulo, e ao ona tatou faanaunau e faalautele atu lo tatou alofa i isi, e ala i le talaʻi atu iā i latou ma aʻoaʻo i latou i le upu moni, ma faamalosia o tatou uso talitonu.—Faitau le Galuega 14:21-23.
14. E mafai faapefea ona faatele atu la tatou talaʻiga?
14 Sa faanaunau Paulo e agaʻigaʻi i luma o se tagata talaʻi o le tala lelei, ma na pāʻia lona loto i le faaaʻoaʻoga a Iesu. O se tasi o auala na faaalia ai e le Alo o le Atua le alofa lē mafaatusalia i tagata, e ala lea i lana galuega talaʻi. Na fetalai Iesu e faapea: “E telē le galuega o le seleselega, ae e toʻaitiiti le ʻaufaigaluega. O le mea lea, ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.” (Mata. 9:35-38) Sa gaoioi Paulo e tusa ai ma so o se talosaga na ia faia, ina ia maua nisi ʻaufaigaluega, e ala i le galue ma le maelega. Ae faapefea oe? Pe mafai ona e faaleleia atili le auala e te talaʻi ai? Pe mafai ona faatele atu le taimi e te auai ai i le galuega talaʻi o le Malo, pe fai ni fetuutuunaʻiga i lou olaga ina ia mafai ai ona e paeonia? Seʻi o tatou faaalia le alofa moni i isi, e ala i le fesoasoani i ai ina ia latou maua le “upu o le ola.”—Fili. 2:16.
Le Manatu o Paulo iā te Ia
15. Na faapefea ona manatu Paulo iā te ia, e tusa ai ma ona uso Kerisiano?
15 Ona o i tatou o ni faifeʻau Kerisiano, ua faataatia e Paulo se faaaʻoaʻoga mataʻina mo i tatou i se isi foʻi auala. E ui lava sa maua e Paulo ni tofiga se tele i le faapotopotoga Kerisiano, ae sa ia iloa lelei, e lē atamai mo ia ona manatu faapea, e na te faatalitalia le mauaina o ni tofiga ona o ni ona tomai. Na ia iloa o faamanuiaga ia na ia maua, ua faaalia ai le agalelei o le Atua. Sa iloa foʻi e Paulo, e iai isi Kerisiano sa avea foʻi ma tagata talaʻi e taulau manuia. E ui lava i lona tulaga sa iai i tagata o le Atua, ae sa tumau pea ona lotomaulalo o ia.—Faitau le 1 Korinito 15:9-11.
16. Na faaalia faapefea le lotomaulalo o Paulo, e tusa ai o le mataupu i le peritomega?
16 Seʻi manatu i le auala na taulimaina ai e Paulo se faafitauli na tupu i le aai o Suria i Anetioka. Sa eseese manatu o le faapotopotoga Kerisiano e tusa ai o le mataupu i le peritomega. (Galu. 14:26–15:2) Talu ai na tofia Paulo e taʻimua i le talaʻiga i tagata o Nuu Ese e lē peritomeina, atonu la e ono manatu Paulo o ia o sē e malamalama i le auala e feutagaʻi ai ma tagata e lē o ni Iutaia, ma o ia ua agavaa e foʻiaina le faafitauli. (Faitau le Kalatia 2:8, 9.) Peitaʻi, ina ua foliga mai ua lē taulau ana taumafaiga i le foʻiaina o le mataupu, sa ia lotomaulalo ma mulimuli i faatulagaga ina ia tuu atu i le vaega pule i Ierusalema e latou te talanoaina le mataupu. Sa ia soosootauʻau ma i latou a o uaʻi atu sui o lenā vaega i le mataupu ma taumafai e maua se faaiʻuga, ma tofia o ia e avea ma se tasi o a latou avefeʻau. (Galu. 15:22-31) O lea, na avea ai Paulo ma lē e ‘tausolomua i le faaaloalo’ i ona uso tapuaʻi.—Roma 12:10e.
17, 18. (a) O le ā le lagona sa atiaʻe e Paulo mo i latou i faapotopotoga? (e) O le ā tatou te aʻoaʻoina e faatatau iā Paulo, i lagona o toeaina i Efeso ina ua ia tuua i latou?
17 O le lotomaulalo o Paulo na ia lē faaesea ai o ia mai ona uso ma tuafāfine i totonu o faapotopotoga. Nai lo lea, sa ia māfuta atu iā i latou. I le iʻuga o lana tusi i Kerisiano i Roma, sa ia ofo alofa atu i le sili atu i le 20 tagata e ala i le taʻua o o latou igoa. O le toʻatele o i latou e lē o taʻua o latou igoa i se isi lava mea o le Tusi Paia, ma e itiiti nisi o i latou na iai ni o latou tofiga faapitoa. Peitaʻi, o i latou o auauna faamaoni a Ieova, ma sa alofa tele Paulo iā i latou.—Roma 16:1-16.
18 O le lotomaulalo o Paulo ma ona uiga faaleuō na faamalosia ai faapotopotoga. Ina ua uma ona ia feiloaʻi ma toeaina i Efeso mo le taimi mulimuli, “ua latou fusi iā Paulo ma sogi atu ma le alofa iā te ia, auā ua matuā ootia i latou i upu ua ia fai atu ai e faapea, e latou te lē toe vāai lava i ona mata.” O lona lotomaulalo ma lona māfana i tagata, na māfua ai ona latou tali atu i lenā auala ina ua ia tuua i latou.—Galu. 20:37, 38.
19. E faapefea ona tatou faaalia le “lotomaulalo” i a tatou feutagaʻiga ma uso Kerisiano?
19 O i latou uma e naunau e agaʻigaʻi i luma faaleagaga, e ao ona faaalia le uiga lotomaulalo e pei ona sa faia e Paulo. Sa ia timaʻi atu i uso Kerisiano ina ia “aua lava neʻi faia se mea ma le finauvale ma le faasausili, ae ia faia ma le lotomaulalo, i le manatu faapea ua sili isi iā te outou.” (Fili. 2:3) E faapefea ona tatou faatatauina lenā fautuaga? O se tasi auala, o le galulue soosootauʻau lea ma toeaina i a tatou faapotopotoga, ia mulimuli i la latou taʻitaʻiga ma talia iʻuga faafaamasinoga ua latou faia. (Faitau le Eperu 13:17.) O se isi auala, e ala lea i le matuā faatāua o o tatou uso uma ma tuafāfine i le faapotopotoga. E masani lava ona faia aʻe faapotopotoga o tagata o Ieova i tagata e eseese o latou atunuu, o aganuu, ma e mai i ituaiga eseese. O lea la, pe lē tatau ea ona tatou aʻoaʻo ia feutagaʻi ma tagata uma i le alofa faapelepele ma le lē faailoga tagata, e pei ona sa faia e Paulo? (Galu. 17:26; Roma 12:10a) Ua faalaeiauina i tatou ina ia “talia e le tasi le isi, e faapei foʻi ona talia i tatou e Keriso, ina ia faamamaluina ai le Atua.”—Roma 15:7.
Ia “Taufetuli ma le Onosai” i le Tausinioga i le Ola
20, 21. O le ā o le a fesoasoani iā i tatou e taufetuli ai ma le taulau manuia i le tausinioga i le ola e faavavau?
20 E faatusaina le olaga o se Kerisiano i se taufetuliga umi. Na tusi Paulo e faapea: “Ua ou faaiʻuina le tausinioga, ua ou tausia le faatuatua. E amata atu nei, ua teuina mo aʻu le pale o le amiotonu, lea e tuuina mai iā te aʻu o se taui i lenā aso e le Alii o le faamasino amiotonu, e lē na o aʻu, ae faapea foʻi i latou o ē naunau i lona faaali mai.”—2 Timo. 4:7, 8.
21 O le a fesoasoani le mulimuli i le faaaʻoaʻoga a Paulo, e tatou te taufetuli ai ma le taulau manuia i le tausinioga i le ola e faavavau. (Epe. 12:1) O lea la, seʻi o tatou faaauau pea ona agaʻigaʻi i luma faaleagaga, e ala i le faia o se faasologa lelei o suʻesuʻega a le tagata lava ia, e ala i le atiaʻe o le alofa loloto mo tagata, ma faatumauina le uiga o le lotomaulalo.
O le a Faapefea Ona E Tali?
• Na faapefea ona aogā iā Paulo lona suʻesuʻeina e lē aunoa o le Tusi Paia?
• Aiseā e tāua ai mo Kerisiano moni ona alofa loloto mo tagata?
• O ā uiga o le a fesoasoani iā te oe e feagai ai ma isi ma le lē faailoga tagata?
• E faapefea ona fesoasoani le faaaʻoaʻoga a Paulo iā te oe, e galulue soosootauʻau ai ma toeaina i lau faapotopotoga?
[Ata i le itulau 23]
Ia maua le malosi mai le Tusi Paia, e pei ona sa faia e Paulo
[Ata i le itulau 24]
Ia faaalia le alofa e ala i le taʻu atu o le tala lelei i isi
[Ata i le itulau 25]
Pe e te iloa aiseā na alofagia ai Paulo e ona uso?