Onosaia o le Faavauvau

“Ua tutū i luga ona atalii uma ma ona afafine uma e faamāfanafana iā te ia; a e lē mafai ona faamāfanafanaina o ia, ua fai ane, Auā ou te alu ifo ma le faanoanoa i le tuugamau i loʻu atalii; ona tagi lea o lona tamā iā te ia.”—KENESE 37:35.

SA MATUĀ faavauvau le augātamā o Iakopo i le maliu o lona atalii. Na ia faatalitalia e faavauvau pea seʻia oo lava i le aso e maliu ai. I le pei o Iakopo, atonu foʻi tatou te lagona le matuā mafatia ona o le maliu o se tasi e pele iā i tatou lea e faigatā ona faateʻa ese. Po o faaalia mai i lenā faavauvau le lē lava o le faatuatua i le Atua? E mautinoa e leai!

Sa faamatalaina e le Tusi Paia Iakopo o se tagata faatuatua. I le pei o le tamā o lona tamā o Aperaamo, ma lona tamā o Isaako, sa iloga foʻi Iakopo i le malosi o lona faatuatua. (Eperu 11:8, 9, 13) O le māfuaaga, i se tasi o aso, sa la tauivi ai ma se agelu ina ia maua faamanuiaga mai le Atua! (Kenese 32:24-30) O le mea moni, o Iakopo o se tagata e malosi faaleagaga. O le ā la ua tatou aʻoaʻoina mai le faavauvau o Iakopo? Ioe, e mafai lava ona tatou faavauvau i le maliu o se tasi e pele iā i tatou, ae lē faapea ai ua lē lava lo tatou faatuatua i le Atua. O le tulaga masani ma o le natura lava lenā o le tagata, o le faavauvau.

O le ā le Uiga o le Faavauvau?

E mafai ona aafia i tatou i le faavauvau i le tele o auala, ae o le toʻatele o tagata ua matuā mafatia i faalogona. Seʻi manatu i le mea na tupu iā Leo, o lē e na o le 14 ona tausaga ae maliu loa lona tamā i se maʻi e fesootaʻi atu i lona fatu. E lē taitai faagaloina e Leo le aso na taʻu atu ai e le uso o lona tinā iā te ia le mea ua tupu. I le taimi muamua, sa musu o ia e talitonu i ai. Sa ia vaai i le tino o lona tamā i le taimi o lona falelauasiga, ae sa foliga mai e lē moni na mea uma iā te ia. Pe tusa e ono masina, e leʻi mafai lava ona tagi Leo. E masani ona ia faatalitali o le a toe foʻi mai lona tamā i le fale mai lana galuega. E toeitiiti atoa le tausaga faatoʻā ia iloa lelei, ua maliu lona tamā. Ina ua iloa, sa ia lagona le tuua toʻatasi. O mea masani—e pei o le taunuu mai le fale ae leai se isi o iai—e faamanatu atu ai iā te ia ua lē o toe iai lona tamā. Ma i na taimi, e masani ona matuā mafatia o ia ma tagi. Sa ia misia tele si ona tamā!

Ua faataʻitaʻi mai e le mea na tupu iā Leo, e mafai ona aafia loloto i tatou i le faavauvau. Ae o le mea e lelei ai, e mafai ona faaleleia. Peitaʻi, e ono umi se taimi e tau faaleleia ai. E pei lava ona umi se taimi o tau faapē se manuʻa tugā i le tino, e faapena foʻi ona umi se taimi e tau faaleleia ai le faavauvau. O le faavauvau, atonu e tele ni masina, faitau tausaga, pe umi atu foʻi o tau faaleleia. Ae e mautinoa o le a faaitiitia lagona mafatia na iai i le amataga a o faagasolo taimi, ma o le a toe faasolosolo ina sologa lelei ma maua se faamoemoe mo le olaga.

I le taimi e tasi, o le faavauvau, o se vaega tāua mo le toe faaleleia o faalogona, ma faamasani ai i le tulaga fou ua iai. O lea ua leai le tagata lea sa iai muamua. E manaʻomia ona fetuunaʻi le olaga ina ia ola e aunoa ma lea tagata. E mafai e le faavauvau ona fesoasoani iā te oe ina ia faaali atu ou lagona. E moni e lē tutusa le auala e faavauvau ai tagata uma. Ae tasi le mea e foliga mai e matuā saʻo lelei: O le taofia o lou faavauvau, e mafai ona faaleagaina ai lou mafaufau, ou faalogona, ma lou malosi. E faapefea la ona faaali atu ou faavauvauga i se auala lelei? O loo iai i le Tusi Paia nisi o fautuaga aogā.a

Auala e Onosaia ai le Faavauvau

O le toʻatele o tagata sa faavauvau, ua latou iloa le aogā o le talanoa e aveese atu ai na lagona. Mo se faaaʻoaʻoga, mātau upu a le tagata iloga o loo i le Tusi Paia o Iopu, o lē sa mafatia ina ua maliliu lana fanau e toʻasefulu ma onosaia isi mala. Na ia faapea mai: “Ua musu loʻu loto i loʻu ola; ou te tuuina atu aʻu ia tagi pea; ou te tautala i le tigā o loʻu loto.” (Iopu 1:2, 18, 19; 10:1) Mātau, sa manaʻomia ona “tuuina atu” e Iopu ona popolega. E faapefea ona ia faia faapea? Na ia faapea mai: “Ou te tautala.”

Na taʻua e Paulo, o lē ua maliu lona tinā e faapea: “O se tasi o mea na fesoasoani tele iā te aʻu, o le talanoa lea e faatatau i loʻu tinā.” O lona uiga, o le talanoa i sau uō maufaatuatuaina e faatatau i ou faalogona, e maua ai sina toʻafilemu. (Faataoto 17:17) Ina ua maliu le tinā o Yone, sa ia talosaga atu i uso Kerisiano ina ia asiasi atu pea iā te ia. Sa ia faapea mai: “O le talanoa, sa fesoasoani tele ina ia tau faamāmā ai faalogona ootia.” O le a e iloa foʻi, pe a e taumafai e talanoa atu i se tagata e tigā alofa e faatatau i ou faalogona, o le a faigofie ai ona e onosaia na faalogona.

E fesoasoani foʻi le tusia i lalo o ou lagona e aveese atu ai mai iā te oe. O nisi e faigatā ona latou talanoa e uiga i o latou faalogona, ae faigofie ona latou faaali mai o latou lagona e ala i le tusia i lalo. Ina ua maliliu Saulo ma Ionatana, sa tusia e le tagata faamaoni o Tavita se pese faanoanoa lea na ia faaali mai ai lona faavauvau. Ua avea lenei pese faamomoiloto ma vaega o le tusi o le Tusi Paia, o le Lua le Samuelu.—2 Samuelu 1:17–27.

E ono fesoasoani foʻi le tagi i le aveesea o lagona faavauvau. O loo taʻua i le Tusi Paia, “O le mea ma lona tausaga i mea uma, ma . . . ona pō e tagi ai.” (Failauga 3:1, 4) E mautinoa lava o le maliu o se tasi e pele iā i tatou, o ona ‘pō na e tagi ai.’ E lē o se mea e māsiasi ai le maligi o loimata ona o le faavauvau. O loo iai i le Tusi Paia le tele o faaaʻoaʻoga o tane ma fafine faamaoni sa iloa lo latou faavauvau e ala i le tagi auēuē. (Kenese 23:2; 2 Samuelu 1:11, 12) Sa “tagi” Iesu Keriso ina ua latalata atu i le tuugamau o lana uō pele o Lasalo, lea ua maliu.—Ioane 11:33, 35.

E manaʻomia le onosaʻi a o taumafai e foʻia le faavauvau, ona atonu e te lagona le fesuisuiaʻi vave o ou faalogona. Ia manatua, e lē tatau ona e māsiasi i le maligi o ou loimata. E toʻatele tagata faamaoni ua latou iloa, o le maligi o loimata o le faavauvau, o se vaega masani ma talafeagai o le toe faaleleia o faalogona.

Ia Mafuta Vavalalata Atu i le Atua

Ua taʻu mai e le Tusi Paia iā i tatou: “Ia outou mafuta vavalalata atu i le Atua, ona mafuta vavalalata mai lea o ia iā te outou.” (Iakopo 4:8) O se tasi o auala lelei e mafuta ai i le Atua, o le tatalo. Aua le manatu māmā i le aogā o le tatalo! Ua aumaia e le Tusi Paia le folafolaga faamāfanafana lenei: “Ua latalata mai Ieova i ē ua loto momomo; ua ia faaola foʻi i ē ua loto nutimomoia.” (Salamo 34:18) O loo faamautinoa mai foʻi e le Tusi Paia e faapea: “Ia e tuuina atu iā Ieova o mea e te popole vale ai; o ia lava na te tausia oe.” (Salamo 55:22) Seʻi mafaufau i le mea lenei. E pei ona tatou mātauina muamua, e toʻatele ua latou iloa le aogā o le talanoa i se uō maufaatuatuaina e faatatau i o latou faalogona. Pe lē sili atu ea le aogā o le sasaa atu o tatou faalogona i le Atua, o lē na folafola mai na te faamāfanafanaina o tatou loto?—2 Tesalonia 2:16, 17.

Na faapea mai Paulo lea na taʻua muamua: “Ina ua lē mafai ona ou onosaia faalogona ootia ma manatu ua lē mafai ona ou foʻia, sa ou tootuli ma tatalo i le Atua. Na ou talosaga atu iā te ia mo se fesoasoani.” Sa faatalitonuina Paulo na mafai e lana tatalo ona faia se suiga. E mafai foʻi ona e talitonu i le tali mai i a tatou tatalo faatauanau e faapea, o le a aumaia e “le Atua o faamāfanafanaga uma” le lototele ma le malosi e onosaʻi ai.—2 Korinito 1:3, 4; Roma 12:12.

Le Faamoemoe o le Toetū

Na fetalai Iesu: “O aʻu o le toetū ma le ola. O lē e faatuatua mai iā te aʻu, e ui ina oti o ia, ae e toe ola mai lava.” (Ioane 11:25) O loo aʻoaʻoina i le Tusi Paia o le a toetutū mai i latou ua maliliu.b A o iai Iesu i le lalolagi, sa ia faailoa mai e mafai ona ia faatutūina ē ua maliliu. I se tasi taimi, sa ia faatūina ai se teineitiiti e 12 tausaga mai le oti. O ā ni lagona sa oo i ona mātua? Sa “matuā olioli” i laʻua. (Mareko 5:42) I lalo o le pulega o lona Malo, o le a toe faatutūina ai e le Tupu faalelagi o Iesu Keriso, le toʻatele o tagata e ola i luga o le lalolagi—ae i se tulaga filemu ma amiotonu. (Galuega 24:15; 2 Peteru 3:13) Seʻi faaāta i lou mafaufau le olioli o le a iai pe a toe faatutū mai tagata ua maliliu, ma toe faatasi ma ē pele iā i latou!

Sa tuu e Claudete, lea na maliu lana tama i le faalavelave tau vaalele, le ata o lana tama, o Reonato, i luma o le pusaʻaisa. E masani ona ia vaai i le ata ma faapea ifo iā te ia lava, ‘⁠O le a tā feiloaʻi i le toetū.’ Ua faaāta i le mafaufau o Leo le toe soifua mai o lona tamā i le lalolagi fou a le Atua na folafola mai. Ioe, o le faamoemoe o le toetū, o se puna moni o faamāfanafanaga iā i latou, ma le toʻatele o tagata ua maliliu ē pele iā i latou. E mafai foʻi ona faamāfanafanaina ai oe!

[Faaopoopoga i lalo]

[Pusa/Ata i le itulau 7]

“Le Atua o Faamāfanafanaga Uma”

“Ia viia le Atua o le Tamā o lo tatou Alii o Iesu Keriso, le Tamā o le alofa mutimutivale, ma le Atua o faamāfanafanaga uma.”—2 Korinito 1:3.

O loo faailoa mai e le mau lenei o le Tusi Paia, e mafai ona fesoasoani le Atua i ana auauna faamaoni ina ia onosaia so o se faafitauli, po o se luʻi e ono fesagaʻi ma i latou. O se tasi o auala, atonu e saunia e Ieova se faamāfanafanaga e ala mai i se uō po o se tasi e pele iā te oe e tutusa o oulua faafitauli.

Na manatua e Leo o lē ua maliu lona tamā, se mea na tupu sa mafai ai ona ia maua le malosi ma se faamāfanafanaga. Ina ua ia taunuu i le fale, ma manatua ai e leai se isi o iai, ona matuā tagi masūsū lea o ia. Na ia alu atu i se paka e latalata ane ma saofaʻi i se nofoa umī, ma faaauau ai ona tagi. A o maligi ona loimata, na ia ʻaiʻoi i le Atua mo se fesoasoani. Na faateʻia Leo i le tū ane o se veni i ona tafatafa, ma ia iloa ai le avetaavale, o se tasi o ona uso Kerisiano. Na alu atu lea uso e tiliva ana oloa i tagata faatau ae teʻi ua sesē le auala e ui ai. Sa mafai ona faamāfanafanaina ai Leo ona o le iai o lea uso.

I se tasi aso, na lagona ai e se tamāloa ua oti lana avā le tuua toʻatasi ma le mafatia. E leʻi mafai ona taofi lona tagi ona ua foliga mai ua leai se faamoemoe. Na ia ōle atu i le Atua mo se fesoasoani. A o tatalo pea o ia, ae tatagi loa ma le telefoni. O le tama teine a lona afafine. Na ia faapea mai: “Na toe maua loʻu lototele i le ma talanoaga puupuu sa fai. Na ou iloa o lana telefoni mai, na avea ma tali i laʻu tatalo mo se fesoasoani.”

[Pusa i le itulau 9]

Ia Faamāfanafana Atu i Isi

“O [le Atua] na te faamāfanafanaina i tatou i o tatou puapuaga uma, ina ia mafai foʻi ona tatou faamāfanafana atu i ē ua oo i ai so o se puapuaga, i le faamāfanafanaga ua faamāfanafanaina ai i tatou e le Atua.”—2 Korinito 1:4.

E toʻatele Kerisiano moni ua latou iloa le uiga o nei faaupuga. Ona ua latou maua se faamāfanafanaga mai le maliu o se tasi e pele iā i latou, ua latou iloa ai e mafai foʻi ona latou avatu faalaeiauga ma faamāfanafanaga i isi.

Seʻi manatu i le faaaʻoaʻoga a Claudete, o lē e masani ona asiasi i isi ina ia faasoa atu iā i latou ona talitonuga faale-Tusi Paia. A o leʻi maliu lana tama, sa ia asiasi atu i se fafine ua maliu lana tama i le maʻi o le leukemia. Sa fiafia le fafine i lona asiasi atu, ae sa ia manatu e lē taitai malamalama atoatoa Claudete i ona faalogona ootia. Peitaʻi, ina ua maliu le tama a Claudete, sa asiasi atu le fafine iā te ia ina ia vaai po o tumau pea le faatuatua o Claudete i lona Atua, ona o lea ua maliu si ana tama. Ona o le māofa o le fafine i le malosi o le faatuatua o Claudete, na uunaʻia ai o ia e faia sana suʻesuʻega faale-Tusi Paia e lē aunoa ma Claudete, ma ua maua ai le tele o faamāfanafanaga mai le Afioga a le Atua.

Ina ua maliu le tamā o Leo, sa ia manaʻo e aʻoaʻoina le gagana e faaaogā ai taga, ina ia avatu ai faamāfanafanaga mai le Tusi Paia iā i latou e logonoa. Na ia iloa le matuā aogā iā te ia o ana taumafaiga ina ia fesoasoani i tagata logonoa. Na ia faapea mai: “O se tasi o mea sa aogā tele iā te aʻu e onosaia ai loʻu faavauvau, o loʻu faanaunau lea e fesoasoani i le ʻau logonoa ina ia iloa le Atua. Ua faaaluina le tele o loʻu taimi ma loʻu malosi ina ia fesoasoani iā i latou. Na liua loʻu faanoanoa i le olioli ina ua papatiso laʻu tagata aʻoga muamua! O le mea moni, o le taimi muamua lea talu ona maliu si oʻu tamā, ua ou lagona ai le matuā fiafia tele.”—Galuega 20:35.

[Ata i le itulau 5]

O le talanoa i sau uō maufaatuatuaina e faatatau i ou faalogona, e maua ai sina toʻafilemu

[Ata i le itulau 6]

E fesoasoani foʻi le tusia i lalo o faalogona faavauvau

[Ata i le itulau 6]

O le faitau e uiga i le faamoemoe o le toetū, e mafai ona avea ma puna o faamāfanafanaga

[Ata i le itulau 8, 9]

Ua folafola mai e Iesu le toetū mo ē uma e faatuatua iā te ia