Ua Fesili Mai le ʻAufaitau
Afai sa Lelei Atoatoa Atamu, sa Faapefea la Ona Agasala o Ia?
Sa mafai ona agasala Atamu ona sa tuu atu e le Atua iā te ia le filifiliga saʻoloto i le taimi na foafoaina ai. O lenā meaalofa na ia maua, e lē feteenaʻi ma le mea moni e faapea sa lelei atoatoa Atamu. E na o le Atua lava e atoatoa ona lelei. (Teuteronome 32:3, 4; Salamo 18:30; Mareko 10:18) E gata mai le lelei atoatoa o se tagata po so o se isi lava mea. Mo se faataʻitaʻiga, e ono lelei atoatoa le naifi mo le tipiina o le fasipovi, ae e lē mafai ona e faaaogā e taumafa ai se supo. E mafai ona atoatoa le lelei o se mea pe a faaaogā tau lava o le fuafuaga na faia ai.
O le ā la le fuafuaga na foafoaina ai e le Atua Atamu? O le fuafuaga a le Atua ia tupuga mai iā Atamu ni tagata e atamamai ma e iai le filifiliga saʻoloto. O i latou e mananaʻo e atiaʻe le alofa mo le Atua ma ona ala, o le a latou filifili e usitai i ana tulafono. O le usiusitai la, e lē o se mea ua uma ona faapolokalameina i le mafaufau o le tagata, ae o se mea e maua mai i le filifiliga a le tagata lava ia. (Teuteronome 10:12, 13; 30:19, 20) O lea la, ana faapea sa leai se tomai o Atamu e filifili ai e usiusitai, o le a lē atoatoa o ia. O le auala la na faaaogā ai e Atamu lana filifiliga saʻoloto, ua taʻua e le Tusi Paia na ia lolo atu i lana avā, ma lē usiusitai ai i le faatonuga a le Atua e faatatau i le “laau e iloa ai le lelei ma le leaga.”—Kenese 2:17; 3:1-6.
Po o lona uiga la sa faia e le Atua Atamu ma se faalētonu ina ua foafoaina o ia, ma leai ai sona tomai e faia ai se filifiliga lelei, pe teena ai se tofotofoga? A o leʻi oo ina lē usiusitai Atamu, sa suʻesuʻe e Ieova le Atua ana foafoaga uma i le lalolagi, lea e aofia ai ma le uluaʻi ulugalii, ma ua silasila atu “ua matuā lelei lava.” (Kenese 1:31) O lea, ina ua agasala Atamu, e leʻi faapea na manaʻomia ona faasaʻo e Lē na faia o ia se mea na faalētonu, ae sa tuuaʻia ma le tonu lava Atamu. (Kenese 3:17-19) Sa leʻi taulau Atamu i le avea o le alofa mo le Atua ma le manaʻo e faia le mea tonu, e uunaʻia ai o ia e usiusitai i le Atua.
Mātau foʻi, sa lelei atoatoa Iesu a o iai i le lalolagi e pei lava o Atamu. Peitaʻi, o Iesu e lē pei o isi tagata na tupuga mai iā Atamu, ona sa afuafuaina o ia i le manava o lona tinā e ala i le agaga paia, o lea, sa leʻi faia o ia ma se faalētonu, lea e ono mafai ai ona lolo atu i faaosoosoga. (Luka 1:30, 31; 2:21; 3:23, 38) Sa filifili Iesu e faamaoni pea i lona Tamā e ui lava i le malolosi o tofotofoga. Ioe, e tusa ai ma le faaaogāina o le filifiliga saʻoloto a Atamu, e ao ona tuuaʻia lava o ia i lona lē taulau e usiusitai i le faatonuga a Ieova.
Aiseā na filifili ai Atamu e lē usiusitai i le Atua? Pe sa ia talitonu o le a ia faaleleia lona tulaga i se isi auala? E leai, auā na tusi le aposetolo o Paulo e faapea, “E leʻi ʻolegia foʻi Atamu.” (1 Timoteo 2:14) Sa filifili Atamu e lolo atu i lana avā, o lē ua uma ona filifili e ʻai le fua o le laau faasāina. Sa sili atu ona ia naunau e faafiafia lana avā nai lo le faafiafia o Lē na faia o ia. Ina ua avatu iā Atamu le fua o le laau faasāina, sa tatau lava ona ia manatunatu i aafiaga e oo i ai le la faiā ma le Atua pe a lē usiusitai. Sa faigofie ona lolo atu Atamu i tofotofoga, lea e aofia ai le tofotofoga mai lana avā, ona sa aunoa o ia ma se alofa loloto mo Ieova.
Na agasala Atamu a o leʻi fanauina ni fanau, o lona uiga o i latou uma sa tupuga mai iā Atamu, sa lē lelei atoatoa. Ae e pei lava o Atamu, ua tatou maua foʻi le meaalofa o le filifiliga saʻoloto. Seʻi tau ina tatou filifili e manatunatu ma le loto talisapaia i le agalelei o Ieova, ma atiaʻe se alofa loloto mo le Atua, o lē e tatau ona tatou usiusitai ma tapuaʻi i ai.—Salamo 63:6; Mataio 22:36, 37.