Ia Aʻoaʻo Lau Fanau

Le Māfuaaga na Lē Fefe ai Tavita

PE NA iai se taimi na e fefe ai?—a O le toʻatele o i tatou e fefefe i nisi o taimi. O le ā lau mea e fai pe a e fefe?—E mafai ona e alu atu i se tagata e matua ma malosi atu nai lo oe. Atonu e fesoasoani mai lou tamā ma lou tinā iā te oe. E tatou te aʻoaʻoina se lesona mai iā Tavita i le mea na ia liliu atu i ai mo se fesoasoani. Na ia pese atu i le Atua e faapea: ‘⁠Ou te faatuatua iā te oe; ou te faatuatua i le Atua; ou te lē fefe i se mea e faia e tagata iā te aʻu.’—Salamo 56:3, 4.

O ai na aʻoaʻoina Tavita e aua le fefe? Po o ona mātua?—E mautinoa lava na la aʻoaʻoina o ia. O lona tamā o Iese, o se tasi o augātamā faamaoni o Iesu Keriso, le “Alii o le filemu” lea na folafola mai e le Atua. (Isaia 9:6; 11:1-3, 10) O Iese, o lona tamā Opeta—ma o le tamā lenā o le tamā o Tavita. O loo faaigoaina se tusi o le Tusi Paia i le igoa o le tinā o Opeta. Pe e te iloa o ai lona igoa?—O Ruta, le fafine faamaoni lea na fai ma avā a Poasa.—Ruta 4:21, 22.

Ua leva ona maliliu Ruta ma Poasa a o leʻi fanau mai Tavita. E te ono iloa foʻi le igoa o le tinā o Poasa, le tuaa o Tavita. Sa nofo o ia i Ieriko ma sa ia fesoasoani e faasaoina ni tagata asiasi mai Isaraelu. Ina ua soloia pā o Ieriko, sa mafai ona ia puipuia lona aiga e ala i le faatautauina o se maea mūmū mai le faamalama o lona fale. O ai lona igoa?— O Raava, o lē na avea ma auauna a Ieova, ma o ia o se faaaʻoaʻoga lelei o le lototele, e faataʻitaʻi i ai Kerisiano.—Iosua 2:1-21; 6:22-25; Eperu 11:30, 31.

E mafai ona tatou mautinoa sa aʻoaʻoina e mātua o Tavita o ia i mea uma e faatatau i na auauna faamaoni a Ieova, ona sa faatonuina mātua e aʻoaʻo a latou fanau i na mea. (Teuteronome 6:4-9) Na oo mai le taimi na filifilia ai e le perofeta a le Atua o Samuelu ia Tavita, le atalii aupito i laʻitiiti o Iese, e avea ma tupu o Isaraelu i le lumanaʻi.—1 Samuelu 16:4-13.

I se tasi aso, na auina atu ai e Iese Tavita e avatu meaʻai i ona uso matutua e toʻatolu, lea o loo tau ma Filisitia, o ē na avea ma fili o le Atua. Ina ua taunuu atu Tavita, sa ia momoʻe atu i le mea o loo fai ai le taua ma lagona atu ai Koliata, o se tagata tinoese, o loo faifai i “ʻau a le Atua soifua.” Na matuā palaaai uma le toʻatele e talia le luʻi a Koliata mo se tasi e la te tau. Ina ua faalogo le tupu o Saulo o loo manaʻo Tavita e alu atu e tau ma Koliata, ona ia aami lea iā Tavita. Ae ina ua vaai atu Saulo iā Tavita, na ia faapea atu: ‘O oe o le tama itiiti.’

Na faailoa atu e Tavita iā Saulo sa ia fasia le leona ma le urosa lea na taumafai e ʻaina lana lafu mamoe. Na ia faapea atu, o le a pei Koliata “o so laʻua.” Ona faapea mai lea o Saulo: “Alu ia oe, ia iā te oe foʻi Ieova.” Na maua e Tavita ni maa lamolemole se lima ma fafao i lana ato leoleo mamoe, ma tago i lana maatā, ma alu atu loa e tau ma lenei tagata tinoese. Ina ua vaai mai Koliata iā Tavita o se tamaitiiti o loo alu atu, na ia valaau mai: ‘Sau ia iā te aʻu, ou te foaʻi atu lou tino i manu felelei.’ Na tali atu Tavita: “Ou te alu atu iā te oe i le suafa o Ieova,” ona ia valaau atu lea: “Ou te fasi iā te oe.”

Ona tamoʻe atu lea o Tavita e faafetaiaʻi iā Koliata, ma ua ia avaʻe se maa mai lana ato, ua tuu i lana maatā ma sasau tonu atu lava i le muāulu o Koliata. Ina ua vāai atu tagata Filisitia ua oti le tagata tinoese, sa latou fefefe ma sosola loa. Na tuliloa atu i latou e tagata Isaraelu ma latou manumalo ai loa i le taua. Faamolemole, faitau faatasi ma lou aiga lenei tala atoa o loo i le 1 Samuelu 17:12-54.

I le avea ai ma talavou, e iai taimi e tatou te ono fefefe ai e usiusitai i faatonuga a le Atua. Sa lagona e le talavou o Ieremia le fefe i le taimi muamua, ae na fetalai atu le Atua iā te ia: “Aua e te fefe . . . auā ou te iā te oe.” Sa toe lototele Ieremia ma talaʻi atu loa e pei ona sa faatonuina ai o ia e le Atua. I le pei o Tavita ma Ieremia, e mafai foʻi ona aveesea lou fefe pe afai e te faalagolago iā Ieova.—Ieremia 1:6-8.

[Faaopoopoga i lalo]

Fesili:

• Ina ua faifai Koliata i le ʻautau a le Atua, o le ā sa faia e Tavita?

• Sa faapefea ona faatoʻilalo e Tavita Koliata?

• O le ā e fesoasoani iā i tatou i aso nei ina ia aua ai neʻi fefefe?