Po o Iesu o le Atua e Ona le Malosi Uma Lava?

Tali masani:

▪ “Ioe, o Iesu o le Atua e ona le malosi uma lava.”

▪ “Na liu tagata le Atua ma afio mai o Iesu.”

O ā fetalaiga a Iesu?

▪ “Afai tou te alolofa mai iā te aʻu, tou te olioli i loʻu alu atu i le Tamā, auā e sili le Tamā iā te aʻu.” (Ioane 14:28) Na faapea mai Iesu e lē tutusa lona Tamā ma ia.

▪ “Ou te alu aʻe i loʻu Tamā, ma lo outou Tamā, i loʻu Atua ma lo outou Atua.” (Ioane 20:17) E leʻi faapea mai Iesu o ia o le Atua, ae na ia faapea mai e ese lava le Atua ia.

▪ “Ou te lē tautala atu i oʻu lava manatu, a o le Tamā o lē na auina mai aʻu, ua ia tuuina mai le poloaʻiga e tusa ma le mea e taʻu atu ma tautala atu ai.” (Ioane 12:49) E leʻi fafau aʻe e Iesu ana lava aʻoaʻoga; auā sa ia maua mai i lona Tamā.

UA FAAPEA mai Iesu o ia o le Alo o le Atua, ae lē o le Atua e ona le malosi uma lava. Pe afai o Iesu le Atua, o ai la na ia tatalo i ai a o iai o ia i le lalolagi? (Mataio 14:23; 26:26-29) E mautinoa lava e leʻi faatagā talanoa Iesu i se tagata!

Ina ua talosaga atu soo e toʻalua iā Iesu mo ni tofiga faapitoa i lona Malo, na ia tali atu: “Ou te lē pule po o ai e nofo i loʻu itu taumatau ma loʻu itu tauagavale, ae e maua lenā tulaga e i latou ua saunia e loʻu Tamā.” (Mataio 20:23) Pe na pepelo ea Iesu ina ua ia faapea atu, e leai sana pule e faatino ai le la talosaga? E leai! Nai lo lea, na ia faapea atu ma le agamalu, ua na o le Atua e iai le pule e faia ai lenā faaiʻuga. Sa faamalamalama atu e Iesu, e iai mea e na te lē iloa faapea foʻi ma agelu, ae e na o lona Tamā lava e silafia.—Mareko 13:32.

Pe na o le pau le taimi na maulalo ai Iesu i le Atua, o le taimi lea sa iai ai i le lalolagi? E leai. E oo lava i le taimi o lona maliu ma le toetū mai, o loo faamatalaina Iesu i le Tusi Paia e lona lua i le Atua. Ua faamanatu mai e le aposetolo o Paulo iā i tatou “e sili atu le Atua i le Keriso.” (1 Korinito 11:3, Today’s English Version) O loo faapea mai le Tusi Paia i le lumanaʻi, “pe a uma foʻi ona tuuina i lalo iā te ia o mea uma, ona tuuina i lalo foʻi lea o le Alo lava i lē na tuuina i lalo iā te ia o mea uma, ina ia pule aoao le Atua i le aoao o mea.”—1 Korinito 15:28, O le Tusi Paia Samoa, 1969.

E manino lava la, e ese lava Iesu ese foʻi le Atua e ona le malosi uma lava. O le māfuaaga lenā na ia taʻua ai lona Tamā o “loʻu Atua.”—Faaaliga 3:2, 12; 2 Korinito 1:3, 4.a

[Faaopoopoga i lalo]

[Faamatalaga faaopoopo i le itulau 7]

Na faapea mai Iesu e iai mea e na te lē iloa faapea foʻi ma agelu, ae na o lona Tamā e silafia