Pe Alofa Mai le Atua iā te Aʻu?

Tali masani:

▪ “E maualuga ma tāua le Atua, ailoga e popole mai i oʻu faafitauli.”

▪ “Ou te manatu e lē ano mai iā te aʻu.”

O ā fetalaiga a Iesu?

▪ “Pe e lē faatauina atu ea ni tamaʻi manulele e lima i tupe iti e lua? Ae e lē galo i le Atua se tasi o na tamaʻi manulele. Ae ua faitaulia lauulu uma o o outou ulu. Aua neʻi outou fefefe; e sili atu ona tāua outou nai lo tamaʻi manulele e tele.” (Luka 12:6, 7) E mautinoa lava, na aʻoaʻo e Iesu tagata, e alofa le Atua iā i tatou.

▪ “Aua lava neʻi outou popole ma faapea ane, ‘O le ā se mea tatou te aai ai?’ ‘O le ā se mea tatou te inu ai?’ ‘O le ā foʻi se mea tatou te oofu ai?’ Auā o mea uma ia o loo saʻilia ma le naunau e tagata o nuu ese. Ae ua silafia e lo outou Tamā o i le lagi, o mea uma ia o loo outou manaʻomia.” (Mataio 6:31, 32) Na talitonu Iesu, e silafia e le Atua manaʻoga o tagata taʻitoʻatasi.

O LOO taʻu manino mai e le Tusi Paia, e alofa le Atua iā i tatou. (Salamo 55:22; 1 Peteru 5:7) Afai e alofa mai o ia, aiseā la ua tele ai mafatiaga ua tutupu iā i tatou i aso nei? Afai e alofa ma aupito i malosi le Atua, aiseā e lē faalaa mai ai o ia e faaiʻuina nei puapuaga uma?

E toʻatele e lē o iloa le mea moni, o loo puleaina lenei lalolagi amioleaga e Satani le Tiapolo. Ina ua faaosoosoina e Satani Iesu, sa ia ofo atu malo uma o le lalolagi i lona faapea atu: “Ou te avatua iā te oe nei malo uma ma o latou mamalu auā ua tuuina mai iā te aʻu, ma ou te foaʻiina atu i lē ou te loto i ai.”—Luka 4:5-7.

O ai na tofiaina Satani e avea ma pule o le lalolagi? Ina ua fouvale o tatou uluaʻi mātua o Atamu ma Eva i le Atua ae usiusitai iā Satani, e tusa lava ua la filifilia Satani e avea ma o la pule. Talu mai lenā fouvalega, o loo faapalepale pea Ieova le Atua ma faataga le taimi e faaalia ai o le a iʻuvale le pulega a Satani. E lē o faamalosia e Ieova tagata e auauna iā te ia, ae o loo ia tuu mai pea le avanoa iā i tatou e toe foʻi atu ai iā te ia.—Roma 5:10.

Ona e alofa mai le Atua iā i tatou, ua ia faataatia ai le fuafuaga ina ia laveaʻiina i tatou e Iesu mai le pule a Satani. I le lumanaʻi lata mai, o le a ‘faaumatia e Iesu lē ua māfua ai le oti o le Tiapolo lea.’ (Eperu 2:14) I lona faia faapea, o le a ia “faalēaogāina ai galuega a le Tiapolo.”—1 Ioane 3:8.

O le a toe avea le lalolagi ma parataiso. I lenā taimi, o le a “soloiesea foʻi [e le Atua] loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:4, 5.a

[Faaopoopoga i lalo]

[Faamatalaga faaopoopo i le itulau 8]

O le a toe avea le lalolagi ma parataiso