2 Ia Iloa Lelei le Atua
“Ina ia maua le ola e faavavau, e tatau ona latou iloa lelei oe, le Atua moni e toʻatasi.”—Ioane 17:3.
AISEĀ E FAIGATĀ AI? Ua faapea mai nisi e leai se Atua. Ae o le taofi o nisi, o le Atua ua na o se malosiaga ae leai ni ona uiga. O i latou e talitonu o ia o se Atua moni, e latou te aʻoaʻoina ni aʻoaʻoga e feteenaʻi e faatatau iā te ia faapea ma ona uiga.
E FAAPEFEA ONA E MANUMALO MAI AI? O se tasi o auala e tatou te iloa ai le Atua, o le mātauina lea o mea na ia faia. Na faapea mai le aposetolo o Paulo: ‘O uiga lē vaaia o le Atua, ua vaaia lava ia talu ona faia le lalolagi, ona ua mafai ona vaaia i mea na faia, e oo foʻi i lona mana e faavavau ma lona tulaga o le Atua.’ (Roma 1:20) E ala i le mātauina o mea na faia e iai meaola ma laau, e tele mea e mafai ona e aʻoaʻoina mai le poto ma le malosi o Lē na faia mea uma.—Salamo 104:24; Isaia 40:26.
Peitaʻi, ina ia tatou iloa lelei uiga o le Atua, e manaʻomia e tagata uma ona tatala le Afioga a le Atua, le Tusi Paia, ma iloilo lava e ia. Aua neʻi faia e isi le faaiʻuga mo oe. Nai lo lea, ia mulimuli i le fautuaga a le Tusi Paia e faapea: “Aua tou te mulimuli i faiga o mea a lenei lalolagi, ae ia liua e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma le lelei atoatoa.” (Roma 12:2) O se faaaʻoaʻoga, tagaʻi i faamatalaga a le Tusi Paia e faatatau i le Atua.
E iai le suafa o le Atua. E faitau afe taimi e aliaʻe ai le suafa o le Atua i le Tusi Paia. O le tele o faaliliuga o loo maua ai le suafa o le Atua i le Salamo 83:18, lea e faapea mai: “Ina ia iloa e i latou, o oe, e ou le suafa o Ieova, na o oe lava o le Silisili ese i le lalolagi uma.”
E aafia faalogona o le Atua i mea e faia e tagata. I le māeʻa ona faasaʻolotoina e Ieova o tagata Isaraelu mai le nofo pologa i Aikupito, sa fai ma latou lē amanaʻia ana fautuaga aogā. Sa latou “faaonoono iā te ia” ona o lo latou fouvale. Sa latou “faaonoono i le Paia o Isaraelu” ona o ā latou gaoioiga.—Salamo 78:40, 41.
E naunau Ieova i tagata uma. Na fetalai atu Iesu i ona soo e faapea: “Po ua lē faatauina atu ea ni tamaʻi manulele se lua i se tupe itiiti? Ae pe a paʻū se tasi o na tamaʻi manulele i le eleele, e silafia lava e lo outou Tamā. E oo foʻi i o outou lauulu, ua faitaulia uma. O lea la, aua neʻi outou fefefe: E sili atu ona tāua outou nai lo o tamaʻi manulele e tele.”—Mataio 10:29-31.
E lē faailoga lanu pe faailoga tagata le Atua. Sa faapea atu le aposetolo o Paulo i tagata Eleni i Atenai, o le Atua ‘na faia nuu uma mai le tagata e toʻatasi, ina ia nonofo i le fogāeleele uma o le lalolagi.’ Sa ia faapea mai foʻi “e lē o mamao o ia [le Atua] mai iā i tatou taʻitoʻatasi.” (Galuega 17:26, 27) Na faapea mai le aposetolo o Peteru: “E lē faailoga tagata le Atua, ae o lē e mataʻu iā te ia i nuu uma lava, ma fai le amiotonu, e talia e ia.”—Galuega 10:34, 35.
O LE Ā LE TAUI? Ua iai i isi le “maelega i le Atua; ae e lē tusa ai ma le iloa lelei o le Atua.” (Roma 10:2) Pe afai e te iloa le aʻoaʻoga moni a le Tusi Paia e faatatau i le Atua, o le a ʻalofia ai le taʻitaʻisesēina o oe, ae o le a mafai ona e “mafuta vavalalata atu i le Atua.”—Iakopo 4:8.
Mo nisi faamatalaga atili, tagaʻi i le mataupu e 1, “O le ā le Aʻoaʻoga Moni e Uiga i le Atua?,” i le tusi O ā Aʻoaʻoga Moni a le Tusi Paia?a
[Faaopoopoga i lalo]
a Lomia e Molimau a Ieova.
[Ata i le itulau 6]
O se tasi o auala e tatou te iloa ai le Atua, o le mātauina lea o mea na ia faia