3 Ia Aʻoaʻo le Mea Moni e Uiga iā Iesu
“O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.
AISEĀ E FAIGATĀ AI? O le a taumafai nisi e faatalitonu oe e leʻi soifua mai Iesu. Ae e amanaʻia e isi na ia soifua mai, ae toe faapea mai, o ia o se tagata e pei lava o i tatou ma ua leva ona maliu.
E FAAPEFEA ONA E MANUMALO MAI AI? Ia faaaʻoaʻo i le soo o Natanielu.a Na faapea atu lana uō o Filipo ua ia maua le Mesia—“o Iesu le atalii o Iosefa le Nasareta.” Peitaʻi, e leʻi matuaʻi talitonu Natanielu i upu a Filipo. Ae na ia tali atu: “Pe e iai se mea lelei e sau mai Nasareta?” E ui ina masalosalo o ia, ae na ia talia le valaaulia a Filipo ina ia ‘alu atu e vaai.’ (Ioane 1:43-51) O le a e mauaina foʻi aogā pe a e iloiloina faamaoniga e faatatau iā Iesu. O le ā e mafai ona e faia?
Ia suʻesuʻe i faamaoniga o talafaasolopito e moni na soifua Iesu. Na soifua ni tusitala faaaloalogia o talafaasolopito o Iosefasa ma Tacitus i le uluaʻi senituri, ma e lē o ni Kerisiano. Na la taʻua Iesu o se tagata moni lava na soifua. I le faamatalaina o le tuuaʻia e le emeperoa Roma o Nero o Kerisiano mo le afi lea na mū ai Roma i le 64 T.A., na tusi Tacitus e faapea: “Na tuuaʻia e Nero ma faataugāina i se auala e sili ona matuiā se vasega sa sili ona itagia ona o a latou gaoioiga, lea sa taʻua e tagata lautele, o Kerisiano. O Keriso, lea na māfua mai ai le igoa, sa puapuagatia i se faasalaga e sili ona leaga i le vaitaimi o le pulega a Tiperio i lima o se tasi o o tatou sui o le emeperoa, o Ponotio Pilato.”
E tusa ai ma faamatalaga na faia e tusitala o talafaasolopito o le senituri muamua ma le lua e faatatau iā Iesu ma uluaʻi Kerisiano, ua faapea mai le Encyclopædia Britannica, 2002 Edition: “Ua faamaonia e nei faamatalaga lē filogia e faapea, i aso anamua, e oo lava i tagata na tetee i le Faa-Kerisiano e latou te leʻi masalomia ia faamaoniga o le moni aʻiaʻi o le soifua ai o Iesu i le lalolagi. O lea sa finauina ai mo le uluaʻi taimi i le faaiʻuga o le senituri lona 18, le faagasologa o le senituri lona 19 ma le amataga o le senituri lona 20, e aunoa ma ni faavae moni.” I le 2002, na faapea mai ai se tala mai le nusipepa o le The Wall Street Journal: “O le toʻatele o tagata suʻesuʻe, ae lē aofia ai se isi vaega o ē lē talitonu i le Atua, ua latou talia na soifua moni lava Iesu le Nasareta.”
Mātau faamaoniga na toetū mai Iesu. Ina ua puʻeina Iesu e i latou e tetee, sa tuulafoaʻia o ia e ana aumea aupito i vavalalata, ma na faafiti lana uō o Peteru e na te lē iloa o ia ona o le fefe. (Mataio 26:55, 56, 69-75) Ina ua taofia Iesu, ona taapeape lea o ona soo. (Mataio 26:31) Ae na faafuaseʻia ona toe amata galuega maelega a ona soo. Sa tautatala atu ma le lototetele Peteru ma Ioane i tamāloloa na faapogaia le maliu o Iesu. Sa matuā faagaeetia lava soo o Iesu ma latou faalauaʻitele atu ai ana aʻoaʻoga i le Emepaea atoa o Roma, ma ua latou malilie e feoti nai lo le lafoaʻia o latou talitonuga.
O le ā se māfuaaga mo lenei suiga telē? Ua faamatala mai e le aposetolo o Paulo ua toe faatūina mai Iesu ma na ia “faaali atu o ia iā Kefa [Peteru], ona sosoo ai lea ma le toʻasefulu lua. Ina ua mavae lenā, ona faaali atu lea o ia i le ʻauuso pe ā ma le toʻalima selau.” Sa feola pea i latou na molimauina lenā tulaga i le taimi na tusia ai e Paulo nei upu. (1 Korinito 15:3-7) Sa faigofie ona faalēaogāina e tagata tetee ia molimau e na o le tasi pe lua. (Luka 24:1-11) Ae o le faamaoniga mai molimau e sili atu i le lima selau, ua atili ai ona faamaonia na toetū mai Iesu.
O LE Ā LE TAUI? O i latou e faatuatua iā Iesu ma usiusitai iā te ia, o le a mafai ona faamagaloina a latou agasala ma maua pea se lotofuatiaifo lelei. (Mareko 2:5-12; 1 Timoteo 1:19; 1 Peteru 3:16-22) Pe a latou maliliu, ua folafola mai e Iesu o le a ia toe faatutūina i latou “i le aso mulimuli.”—Ioane 6:40.
Mo nisi faamatalaga atili, tagaʻi i le mataupu e 4, “O ai Iesu Keriso?,” ma le mataupu e 5, “O le Togiola o le Meaalofa Sili Lea a le Atua,” i le tusi O ā Aʻoaʻoga Moni a le Tusi Paia?b
[Faaopoopoga i lalo]
a O tusitala o Evagelia o Mataio, Mareko, ma Luka, o loo latou faasino atu iā Natanielu o Patolomaio.
b Lomia e Molimau a Ieova.
[Ata i le itulau 7]
I le pei o Natanielu, ia iloilo faamaoniga e faatatau iā Iesu