Le Pogai e Aogā ai le Tusi Paia i o Tatou Aso

“O Tusi Paia uma e mai le Agaga o le Atua ma e aogā . . . e taʻitaʻiina ai olaga o tagata.”—2 TIMOTEO 3:16, The Jerusalem Bible.

A O FAAGASOLO le tele o senituri, ua uunaʻia e le Tusi Paia tagata i le tele o aganuu ina ia suia o latou olaga, auā le agaʻigaʻi i luma. O loo faamatala i le mau o loo i luga le pogai e aogā ai le Tusi Paia, auā e mai le Atua lona poto. E ui na tusia e ni tane, ae o loo auala mai i le Tusi Paia manatunatuga o le Atua. Ua faamatala mai e le Tusi Paia: “Na tautatala tagata i mea na faailoa mai e le Atua e ala i le taʻitaʻiga a le agaga paia.”—2 Peteru 1:21.

E lua ni auala e maua ai le taʻitaʻiga aogā mai le Tusi Paia. Muamua, o loo maua ai se vaaiga paleni i le mea e taʻua o se olaga e sili atu. Lona lua, o loo iai le malosiaga e uunaʻia ai tagata e faia ni suiga ina ia maua ai lenā olaga e sili atu. Seʻi o tatou iloiloina nei vala e lua.

Ia Malamalama i Sini Aogā

I le Tusi Paia, ua folafola mai ai e le Atua: “Ou te aʻoaʻo iā te oe, ma faasino iā te oe i lea lava ala e te savali ai; ou te faatonu iā te oe, ma ou vaai iā te oe.” (Salamo 32:8) Ia mātau foʻi, o loo ofo mai e le Atua e lē gata o fautuaga a o le malamalama, lea e mafai ona e iloa ai le pogai po o le aa o se mataupu. O le iai o le malamalama e filifilia ai sini e aogā moni, o le a puipuia ai i tatou mai le faaalu o o tatou olaga i le saʻilia o mea e lē aogā.

O se faataʻitaʻiga, e toʻatele tagata ua fai ma o latou sini i lenei olaga le mauaina o tulaga taualoa po o le tamaoaiga. O tusi e fesoasoani i le tagata lava ia, e matele i le auala e te mauaina ai le mamalu ma le tamaoaiga. Ae i le isi itu, ua faapea mai le Tusi Paia iā i tatou: ‘O le matauʻa o le tagata ona o mea a lē la te tuaoi. O le mea faatauvaa foʻi lea, ma le ʻai a le matagi.’ “O lē ua manaʻo i le ario, e lē malie o ia i le ario.” (Failauga 4:4; 5:10) Po o aogā nei fautuaga tāua mo tatou aso?

Ina ia faaāta le auala e aogā ai fautuaga mai le Tusi Paia, seʻi o tatou iloiloina le mea na tupu iā Akinori, i Iapani. I lona manumalo i taumafaiga ma isi tagata, na taunuu ai le sini o Akinori ina ua faauu i se iunivesite taʻutaʻua, ma maua lana galuega i se kamupani telē. E foliga mai na sologa lelei mea uma mo ia. E ui i lea, e na te leʻi mauaina le fiafia na ia manaʻo e maua. Nai lo lea, sa lē fiafia o ia ma faalētonu ai lona soifua mālōlōina. E leʻi fesoasoani ana uō i le galuega i lona tulaga. Ona o lona lē fiafia tele, sa lē mafai ai ona ia puleaina le ʻava malosi, ma ia manatu ai ua sili ai pe a oti. Ae amata ona loa ona fai ni ana lesona faale-Tusi Paia ma Molimau a Ieova. Sa suia lana vaaiga i mea e tāua i le olaga ona o mea na ia aʻoaʻoina. E leʻi umi, ae amata ona leai ni ona maʻi ia na māfua mai le lē fiafia. Nai lo le uunaʻia o ia e le faamaualuga ma le fia taʻutaʻua, sa tofo ai Akinori i le moni o se faataoto i le Tusi Paia, lea na faapea mai: “O se loto e filemu, e manuia ai le tino.”—Faataoto 14:30, The Holy Bible—New International Version.

O le ā e te manatu o le sini aupito i aogā i le olaga? O ā mea e te faia o le a e maua ai le fiafia moni? Po o le mauaina o se faaipoipoga taulau manuia? Po o le aʻoaʻoina o lau fanau ina ia latou maua se faavae lelei i o latou olaga? Po o le tele o uō? Pe ia fiafia le olaga? E aogā uma sini nei. O le mea moni, e faalaeiauina e le Tusi Paia nei sini, ae e lē o mea na e faamuamuaina i o tatou olaga. I le iai o le malamalama, ua faasino mai ai e le Tusi Paia se tulaga e ao ona iai e maua ai se olaga faamalieina, i le faapea mai: “Ia e mataʻu i le Atua, ma e anaana i ana poloaʻiga; auā o mea ia e tatau i tagata uma.” (Failauga 12:13) Pe a tatou faatalatū e faataunuu lenei matafaioi, ua leai la se uiga o lenei olaga, ma tumu i le lē fiafia. Ae i le isi itu, ua faamautinoa mai e le Tusi Paia iā i tatou: “O lē faatuatua foʻi iā Ieova, amuia o ia.”—Faataoto 16:20.

Le Auala e Sui ai Tagata Ona o le Tusi Paia

Na tusi le aposetolo o Paulo, “O loo ola le afioga a le Atua ma e matuā malosi foʻi.” I le pei o se pelu e faatau maai ona itu, e mafai ona pāʻia ai faalogona ma manatunatuga loloto o se tagata. (Eperu 4:12) O loo i le Tusi Paia le mana e suia ai le auala e ola ai tagata, ona e fesoasoani iā i latou e iloa ai o latou tulaga moni, ae lē na o le auala latou te mafaufau ai iā i latou lava. O i latou e lelei o latou loto, e mulimuli ane latou iloa e tatau ona latou faia se suiga. O se faaaʻoaʻoga, o i latou na iai i le faapotopotoga Kerisiano i Korinito anamua, na avea muamua i latou ma ē gāoi, onanā, mulilulua, ae na faapea mai Paulo: ‘Sa faapena foʻi nisi o outou. A ua faamamāina outou i le agaga o lo tatou Atua.’ (1 Korinito 6:9-11) O loo galue malosi pea le agaga paia o Ieova i aso nei, ma e mafai ona uunaʻia ai tagata e faia ni suiga manaʻomia.

O Mario o se tamāloa e nofo i Europa, ma o ia o se tagata e sauā ma e lē gata e ulaula mariuana ae na te faatauina atu foʻi. I se tasi aso, na fao ai e se leoleo ana fualaau faasāina, sa ita tele o ia ma faaoolima ai i le leoleo ma faaleaga lana taavale. E lē gata i lea, sa leai se galuega a Mario ma tele ni ana aitalafu na iai. Ina ua ia iloa e lē mafai ona ia foʻia ona lava faafitauli, sa ia malie loa e faia sana suʻesuʻega faale-Tusi Paia. A o ia agaʻigaʻi i luma, sa teuteu e Mario ona foliga vaaia, ua ia lē toe faaaogā ma faatau atu fualaau faasāina, ma ua pulea lona maitaita soo. Sa matuā maofa i latou na iloaina o ia. Sa latou fesili iā te ia, “Sole Mario, o le ā le mea ua tupu iā te oe?”

O le ā na uunaʻia ai tagata e pei o Akinori ma Mario e suia o la olaga, ma la maua ai le fiafia ma le faamalieina moni i le olaga? O le mea moni, sa uunaʻia e lo la poto fou e uiga i le Atua, lea na maua mai le suʻesuʻeina o le Tusi Paia. E na o le Atua e mafai ona tuuina mai faatonuga aogā, lea e tatou te manaʻomia ina ia taulau manuia ai i le olaga i le taimi nei, ma le faamoemoe e ola e faavavau i le lumanaʻi. I le pei o se Tamā, ua fetalai mai Ieova le Atua iā i tatou e ala mai i le Tusi Paia: “Faalogo mai, loʻu atalii e, ma e talia aʻu upu, ona faateleina ai lea o tausaga o lou olaga. . . . A e savali e lē faalavelaveina lau laasaga; a e momoʻe e te lē tausuai. Ia e taofi mau i upu e aʻoaʻoina, aua neʻi tuuina atu; ia e leoleo i ai; auā o lou ola lava lea.” (Faataoto 4:10-13) E leai se isi mea e sili e saʻili i ai mo fautuaga, nai lo Lē na faia i tatou.

[Pusa/Ata i le itulau 7]

Fautuaga Aogā mo Tatou Aso

E faigofie ae aogā taʻiala o loo i le Tusi Paia, lea e mafai ona taʻitaʻia ai i tatou i so o se vala o lenei olaga. O nisi nei o faataʻitaʻiga:

• Ia maua se faiā lelei ma isi

“O mea uma tou te mananaʻo e faia mai e tagata iā te outou, ia faapea lava ona outou faia iā i latou.”—Mataio 7:12.

“O lē e fai o ia lava ma tagata faatauvaa iā te outou uma, e sili lava o ia.”—Luka 9:48.

“Ia faaalia le agaga talimālō.”—Roma 12:13.

• Ia tuu masaniga leaga

“O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.”—Faataoto 13:20.

“Aua neʻi fai oe ma so latou o ē inu tele i uaina.”—Faataoto 23:20.

“Aua neʻi fefaauōaʻi ma le tagata itagofie.”—Faataoto 22:24.

• Maua ai se faaipoipoga lelei

“Ia taʻitasi outou ma alofa i lana lava avā e pei ona ia alofa iā te ia lava; a o le avā, ia matuā faaaloalo o ia i lana tane.”—Efeso 5:33.

“Ia oofu outou i le alofa mutimutivale, le agalelei, lotomaulalo, agamalu ma le faapalepale. Ia faaauau ona onosai le tasi i le isi, ma ia fefaamagaloaʻi ma le lotoatoa.”—Kolose 3:12, 13.

• Aʻoaʻo le fanau

“Aʻoaʻo ia i le tama e tusa ma lona ala; a oo ina toeaina lava o ia, e lē teʻa ese ai.”—Faataoto 22:6.

“O outou tamā foʻi, aua le faatigā loto i a outou fanau, a ia tausia pea i latou i aʻoaʻiga ma apoapoaʻiga a Ieova.”—Efeso 6:4.

• ʻAlofia fevesiaʻiga

“O le tali filemu e liliueseina ai le ita; a o le upu faatigā e tupu ai le ita.”—Faataoto 15:1.

“Ia tausolomua ona faaaloalo le tasi i le isi.”—Roma 12:10.

E oo lava i uō, o feeseeseaʻiga ona o faiga faapisinisi, e mafai ona ʻalofia e ala i le faia o se maliega tusitusia. O lea la, na tusi le auauna a le Atua o Ieremia e faapea: “Ona ou tusia lea i le tusi, ma ou faamaufaailogaina ai, ma ou amia mai molimau, ma ou fuatia le ario i le fua faatautau.”—Ieremia 32:10.

• Atiaʻe se vaaiga saʻo

“O mea uma ua moni, . . . o mea uma e faatupu ai le lotofiafia, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.”—Filipi 4:8.

E lē o faalaeiauina e le Tusi Paia le teuloto o mafaufauga lē lelei ma e taʻusalaina tagata e “faitio i o latou lava olaga.” O loo faapea mai: “Ia olioli i le faamoemoe.”—Iuta 4, 16; Roma 12:12.

O le faatatauina o nei taʻiala mataʻina, e lē gata o le a tatou maua ai le filemu ma le faamalieina i le taimi nei, ae o le a fesoasoani foʻi iā i tatou e ausia ai tapulaa a le Atua ma maua ai lana faamanuiaga. Ua faapea mai le Tusi Paia: “E fai lava le nuu mo tagata amiotonu, e nonofo ai pea i latou.”—Salamo 37:29.

[Ata i le itulau 5]

Akinori a o avea o ia ma tagata faipisinisi (agavale), ma a o faatasi ma lana avā a o tufa atu ma le fiafia mea moni mai le Tusi Paia i aso nei