Olioli e ui i Faalavelave—Na Aogā le Tusi Paia Ou te Onosaia ai Nei Tulaga

Faamatalaina e Enrique Caravaca Acosta

O le aso o Aperila 15, 1971, na ou asiasi atu ai i le fale o lo matou aiga lea e tu i se faatoʻaga. Ona o le umi tele ou te leʻi toe oo i lo matou aiga, sa ou naunau tele ai e feiloaʻi ma i latou uma. Sa ou mafaufau po o ai o loo i le fale, ma o ai foʻi o le a ou feiloaʻi muamua i ai. Ina ua ou taunuu i le fale, sa matuā faateʻia aʻu i le mea na ou vaaia, e toʻafā tagata o lo matou aiga ua fasiotia, e aofia ai ma si oʻu tinā!

OU TE lē iloa faamatala loʻu teʻi i le mea ua tupu. O le ā lenei mea ua tupu? O le ā laʻu mea o le a fai? E leai ma se isi o latalata mai, ma na ou lagona le lē mautonu ma lē iloa le mea o le a fai. A o leʻi faaauau ona ou faamatalaina le mea na tupu, seʻi faamatala puupuu atu loʻu olaga. O le a e malamalama ai i oʻu faalogona i le mea ua tupu faapea foʻi ma isi faalavelave na tutupu i loʻu olaga.

Ua Matou Maua le Upu Moni

Na ou fanau i Quirimán, e latalata i Nicoya, i Costa Rica. I le 1953, ina ua 37 oʻu tausaga, sa ou nofo faatasi ma oʻu mātua i le faatoʻaga a lo matou aiga. E ui na matou feola aʻe o ni Katoliko, ae sa matou lē fiafia i nisi o a latou aʻoaʻoga, ma na tele a matou fesili e leʻi taliina.

I se tasi taeao, na sau ai se tamāloa e igoa iā Anatolio Alfaro i lo matou aiga, ma faalaeiau i matou e suʻesuʻe le Tusi Paia. E tele mau ma aʻoaʻoga faale-Tusi Paia na ia faasoa mai. Na faalogologo atu loʻu tamā, tinā, se tasi o oʻu uso, o loʻu tuafafine, o lana uō na matou nonofo faatasi. Sa alu le aso atoa ma oo atu i le leva o le pō la matou talanoaga. E tele a matou fesili.

Sa moe Anatolio i lo matou aiga ma na alu ai ma le isi ona aso. Sa matou fiafia i mea na faalogo i ai, ae sa sili atu lo matou fiafia ina ua taliina a matou fesili mai le Tusi Paia. Na telē le aafiaga o lenā talanoaga iā i matou. Sa matou manatunatu i mea na matou aʻoaʻoina, ma na matou iloa ai, ua matou maua le upu moni. Sa tuu e Anatolio mekasini faale-Tusi Paia mo i matou. I afiafi, e matou te faitau ma suʻesuʻe faatasi o se aiga i nei lomiga. Sa avea ma luʻi lenei tulaga, auā sa leai se eletise o le matou fale. A o leʻi amata la matou suʻesuʻega, sa tofu i matou ma atigi taga pateta e ufiufi ai o matou vae mai namu.

I le ono masina mulimuli ane ai, e toʻalima tagata o lo matou aiga na papatiso, e aofia ai oʻu mātua ma aʻu. Sa matou naunau tele e taʻutaʻu atu i isi mea ua matou aʻoaʻoina e ala i le talaʻiga mai lea fale i lea fale. Sa matou savavali i le pe tusa ma le lua itula, a o nisi taimi e matou te tiʻetiʻe ai i solofanua i le aai e taʻua o Carrillo, ina ia matou feiloaʻi ai ma se vaega o Molimau a Ieova. Na faaauau pea ona asiasi mai Anatolio i lo matou aiga, ina ia faia a matou lesona faale-Tusi Paia. Ona fuafua lea e fai se sauniga i lo matou fale, ma pe ā ma le toʻavalu o le a ō atu i ai. Ma na iʻu ina papatisoina uma i latou. E leʻi umi ae avea lenā vaega toʻaitiiti ma se faapotopotoga e pe ā ma le toʻa 20 tagata.

Galulue Faataimi Atoa mo le Atua

O le taimi lea na valaaulia ai e le ofisa o le lālā o Molimau a Ieova i Costa Rica i latou e mafai ona auai i le galuega faaevagelia faataimi atoa. I le 1957, na ou talia ai lenā valaaulia ma ou galue ai i le auaunaga faataimi atoa. E ese le manaia o lenei galuega. E masani ona umi se taimi o oʻu savali ina ia maua tagata i nuu maotua. O nisi taimi e leʻi talia aʻu e tagata. Ou te manatua e pe ā ma le faatolu taimi na faamataʻu mai ai nisi tamāloloa ma ni agaese, ona sa latou fia iloa po o ai aʻu ma o ā foʻi aʻu mea o loo faia i inā.

I tuā i tausaga e amata mai le 1950, o le tele o auala o auala galue i le togāvao, ma na faigatā ona matou oo atu i tagata. Ina ia oo atu i isi vaipanoa, sa tatau ona matou ō i solofanua. Sa matou asā vaitafe ma o nisi taimi e matou te momoe ai i fafo. Na faigatā le tulaga o mea ona o le tele o namu. Sa tatau foʻi ona matou faaeteete mo gata ma kolokotaila. E ui i nei mea uma, sa ou matuā fiafia lava e aʻoaʻo tagata e uiga iā Ieova le Atua. Ina ua ou taunuu i lo matou aiga, sa ou lagona le fiafia ma le faamalieina ona o le mafai ona ou faasoa atu o upu moni o le Tusi Paia i isi. A o faaauau ona ou talaʻi ma suʻesuʻeina le Tusi Paia i aso taʻitasi, na faaauau pea ona tupu loʻu alofa mo Ieova le Atua, ma ou māfana ai iā te ia.

A o faagasolo taimi, sa ou mauaina ai nisi faaeaga. E sili atu i le sefulu tausaga, sa ou auauna ai o se ovasia femalagaaʻi, lea e asiasi ma faamalosia ai faapotopotoga, ma e eseese faapotopotoga i vaiaso taʻitasi i vaipanoa patino. E ui na faamuta laʻu auaunaga o se uso femalagaaʻi ona o maʻi, ae sa faaauau pea ona ou olioli i le auaunaga faataimi atoa i le Atua.

Tutupu ni Faalavelave

A o ou iai i Nicoya i le 1971, sa ou toe alu ai e asi loʻu aiga. Ina ua ou ulu atu i le fale, o loo taatia mai si oʻu tinā ua 80 tausaga, i le fola. Sa fana ma tuiina o ia. Ina ua ou punou atu e opo o ia, o loo ola pea. E leʻi umi ae oti loa o ia i oʻu lima. Sa ou tilotilo solo ma iloa atu ai o loo taatia mai le kuka lea ua valu masina lona maʻitō, ma ua oti foʻi. Na ou faapea ua uma ai i inā tagata feoti, ae sa ou tau atu i se sui o le faapotopotoga ua oti foʻi, ae o loo oti le tama tama a le kuka i le fale taʻele. E ogaoga uma o latou manuʻaga mai le naifi, ma na tafanaina foʻi i latou. O ai e mafai ona faia lenei mea, ma aiseā?

Ina ua ou alu atu i fafo, sa ou tau atu i si oʻu tamā. Sa fanaina lona ulu ae o loo ola pea! Sa ou faatopetope atu i le fale o loʻu uso, lea e pe ā ma le 15 minute le mamao ese, ma na ou tau atu ai ua fasiotia foʻi se isi fafine ma si ana tama tama. Na matuā faateʻia lava aʻu ina ua ou iloa, o le fasioti tagata o le tama tama a loʻu tuafafine ma e 17 ona tausaga, e lē o se Molimau a Ieova ma e faalētonu lona mafaufau! Ua sola ese o ia mai lenā vaipanoa. O le taimi muamua lea ua saʻilia faapea ai se tagata i le talafaasolopito o Costa Rica.

Sa faasalalauina i tala fou le mea na tupu. Sa maua e leoleo le fasioti tagata ina ua māeʻa aso e fitu, ma na ia umia se naifi umī ma se tamaʻi fana, lea na faatau atu e se tagata iā te ia e ui o loo ia iloa e faalētonu le mafaufau. Sa fanaina ma oti ai le tama a loʻu tuafafine a o tuliloaina o ia e leoleo.

A o saʻilia e leoleo le fasioti tagata, e toʻatele na fautua mai ou te sola atu i se isi vaipanoa, neʻi toe foʻi mai le tama a loʻu tuafafine ma ou afāina ai. Sa ou tatalo e faatatau i le mea o loo tupu, auā na ou lagona e tatau ona ou faatasi ma tagata o loʻu aiga na sao mai, aemaise foʻi le auaufaatasi ma le faapotopotoga. Ma na iʻu ai ina ou nofo.

Sosoo Mai Faalavelave

O se mea e faanoanoa ai, e na o le tausaga na ola ai si oʻu tamā. I le tausaga na sosoo ai, na fasiotia ai loʻu tuafafine o lē na auauna faamaoni iā Ieova, i se isi foʻi faalavelave ese. Na toe faateʻia foʻi oʻu aiga ona o le toesea foʻi o si oʻu tuafafine. E lē mafai ona faamatalaina faalogona faanoanoa na matou fesagaʻia ma a matou uō. A o tutupu nei faalavelave, sa ou matuā faalagolago atu iā Ieova ma ou ʻaiʻoi atu pea mo le malosi.

I le 1985, sa ou auai ai i se aʻoga e tolu aso le umi mo toeaina Kerisiano, lea na fai i le laumua o San José. I le māeʻa ai o le aʻoga, na faamalosia atili ai laʻu faiā ma Ieova. I le vaveao o le aso Gafua na sosoo ai, na puʻe ai laʻu pasi ou te alu ai i le fale. A o oʻu savali atu i le fale faatali pasi, na osofaʻia ai aʻu e se vaega, sa latou titinaina aʻu ma gaoi aʻu mea totino. Sa vave ona tupu lenā mea ou te leʻi iloa atu o latou foliga. Ona o lenā osofaʻiga, ua lē o toe mafai ai ona ou toe tautala i le auala e masani ai tagata Costa Rica. I le vaipanoa o Guanacaste, e feʻei pe tauvalaau tamāloloa pe a latou feiloaʻi ma isi po o tau ina faailoa atu ai o loo latou iai i inā. Sa lelei tele laʻu tauvalaau, a ua lē o toe mafai ona ou faia faapena.

I le 1979, na ma faaipoipo ai ma Celia, o se Molimau mai le faapotopotoga o loo lata ane. O Celia o se tagata e naunau i le Tusi Paia. E ma te faitau ma suʻesuʻe faatasi le Tusi Paia i aso uma. O se mea e faanoanoa ai, na motusia le ma mafutaga iā Iulai 2001, ona o le kanesa. O nisi taimi ou te lagona ai le tuua toʻatasi, ae e faamalosia lava aʻu e le faamoemoe mo le toetū.—Ioane 5:28, 29.

Olioli Pea e ui i Nei Faalavelave

E ui e tele atu faalavelave ua ou tofo i ai i loʻu olaga nai lo isi, ae ou te vaai i nei faalavelave o se avanoa e faamaonia ai loʻu faatuatua ma le faamaoni iā Ieova. (Iakopo 1:13) Ina ia tumau pea ona paleni laʻu vaai i mea na tutupu, e fai ma ou faapea ifo iā te aʻu lava, “o le tausaga ma le mea e tupu ai e oo iā te i [tatou] uma.” (Failauga 9:11) Ou te manatua foʻi o “aso e sili ona faigatā” lea ua tatou iai, auā e amio lē pulea tagata, e sauā, ma e lē fiafia i mea lelei. (2 Timoteo 3:1-5) Ou te manatua foʻi le faaaʻoaʻoga a Iopu. E ui i ona mafatiaga uma, le feoti o lona aiga, o maʻi, ma le leai o ni mea e ola ai, ae na faapea mai Iopu ma le faamaoni: “Ia faamanūina le suafa o Ieova.” Ae na matuā faamanuiaina e Ieova le faamaoni o Iopu. (Iopu 1:13-22; 42:12-15) O nei manatu uma mai le Tusi Paia, o loo fesoasoani e faatumauina ai loʻu olioli e ui i le tele o faalavelave.

Ua fesoasoani mai pea Ieova iā te aʻu e faaauau ona ou faamuamuaina o ia i loʻu olaga. O le faitauina o le Tusi Paia i aso taʻitasi, o se puna lea o faamāfanafanaga ma ua ia tuuina mai le malosi e onosaia ai. Ona o le tatalo atu iā Ieova, ua mafai ai nei ona ou olioli i le “filemu mai le Atua, lea e silisili i mea uma lava.” (Filipi 4:6, 7) Ua ou mauaina ai le filemu o le mafaufau. O le auai ma le faia o se sao i sauniga faa-Kerisiano, e faamalosia ai foʻi loʻu faatuatua.—Eperu 10:24, 25.

E ui ua ou matua, ae ou te faafetaia Ieova ona o loo maua pea loʻu malosi e galulue ai ma le ʻauuso Kerisiano, faia lesona faale-Tusi Paia ma isi, ma faia se sao i le talaʻiga. O le fesoasoani i isi i na auala, ua ou maua ai le malosi e fesagaʻia ai faafitauli. E mai le taʻele o loʻu fatu, ou te matuā faafetaia Ieova e ui i le tele o faafitauli i loʻu olaga.a

[Faaopoopoga i lalo]

[Faamatalaga faaopoopo i le itulau 20]

O le faitauina o le Tusi Paia i aso taʻitasi, ua avea lea ma puna e faamāfanafanaina ai aʻu, ma ou maua ai le malosi e onosai ai

[Ata i le itulau 19]

O aʻu uluaʻi taumafaiga e faia se lauga faale-Tusi Paia

[Ata i le itulau 20]

I le talaʻiga a o oʻu malosi