Ua Fesili Mai le ʻAufaitau

E Fia se Tupe e Tatau Ona Ou Foaʻi Atu?

“E alofa le Atua i lē e foaʻi ma le lotofiafia.” (2 Korinito 9:7) Ua lauiloa na upu i le faitau miliona o tagata i le lalolagi. Peitaʻi, ua manatu nisi tagata lotu, e tatau ona foaʻi tupe e sili atu nai lo o mea e latou te mafai. O le mea moni, o nisi o lotu e latou te manaʻomia se aofaʻiga patino e foaʻi atu e ona tagata. E taʻu lenā mea o le sefuluaʻi, o le foaʻi atu lea o le 10 pasene o le tupe maua a le tagata mo le lotu.

Pe e manaʻomia e le Tusi Paia ona tatou foaʻi atu se aofaʻiga patino? Ia fesili ifo iā te oe lava, e fia se tupe e tatau ona ou foaʻi atu?

Foaʻi na Manaʻomia ma Foaʻi Tauofo i Taimi ua Teʻa

O loo iai i le Tusi Paia faatonuga manino i le nuu o Isaraelu, e tusa ai ma le aofaʻi e manaʻomia e le Atua ona latou avatu. (Levitiko 27:30-32; Numera 18:21, 24; Teuteronome 12:4-7, 11, 17, 18; 14:22-27) E lē o se foaʻi telē lenā foaʻi. Na folafola mai e Ieova o le a ia ‘faateleina mea lelei’ mo i latou, pe afai e latou te usitaia ana tulafono.—Teuteronome 28:1, 2, 11, 12.

I nisi taimi, sa mafai ai e tagata Isaraelu ona tauofo atu a latou foaʻi, pe telē pe itiiti foʻi e tusa ma le mea e loto i ai. O se faaaʻoaʻoga, ina ua fuafua le tupu o Tavita e fausia se malumalu mo Ieova, sa foaʻi atu e ona tagatānuu “auro e lima gaafe o taleni.”a (1 Nofoaiga a Tupu 29:7) Ia faatusatusa lenei aofaʻi i le mea na mātauina e Iesu a o iai i le lalolagi. Na ia silafia foʻi “le tasi fafine mativa ua oti lana tane, ua lafo i ai ni tupe itiiti se lua” i le pusa e teu ai tupe i le malumalu. O le ā le telē o lana foaʻi? E na o le 1/64 o le totogi o se tagata faigaluega i le aso. Peitaʻi, na taʻua e Iesu o lenei foaʻi itiiti, sa taliaina.—Luka 21:1-4.

Pe e Manaʻomia Ona Foaʻi Atu e Kerisiano se Aofaʻiga Patino?

E lē o ola Kerisiano i lalo o le feagaiga o le Tulafono na tuu atu iā Isaraelu. O lea, e lē manaʻomia ona latou avatu se aofaʻiga patino i le Atua. Ae peitaʻi, i faapotopotoga o Kerisiano moni, e avea le foaʻi o se mea e fiafia ai. Na taʻua e Iesu Keriso e faapea: “E sili le fiafia e maua i le foaʻi atu i lo o le talia mai.”—Galuega 20:35.

E lagolagoina e Molimau a Ieova le galuega talaʻi i le lalolagi aoao e ala i foaʻi tauofo. O nei foaʻi e faaaogā e lomia ai lomiga, e pei o le mekasini o loo e faitauina, ma fausia ma tausia ai o latou nofoaga mo tapuaʻiga, e taʻua o Maota mo Sauniga. E lē faaaogāina nei foaʻi tauofo e totogi ai tagata. E faaalu e nisi lo latou taimi atoa e galulue ai i le galuega o le faia o isi ma soo, ma e latou te maua se fesoasoani mo a latou pasese ma isi mea e latou te manaʻomia. Ae e leai se tasi e finau e tatau ona ia mauaina lenā fesoasoani. O le mea moni, o le toʻatele o Molimau a Ieova, e latou te lē mauaina se fesoasoani tautupe e lagolago ai le latou galuega talaʻi. Nai lo lea, o le toʻatele e faigaluega e tausia i latou, e pei lava o Paulo sa galue i le faiga o faleʻie.—2 Korinito 11:9; 1 Tesalonia 2:9.

Pe a manaʻo se tagata e fai se foaʻi i le galuega o loo faia e Molimau a Ieova, e fia se tupe e tatau ona foaʻi atu? Na tusi le aposetolo o Paulo e faapea: “Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.”—2 Korinito 8:12; 9:7.

[Faaopoopoga i lalo]