E te Silafia?

O ai tusiupu na tetee iā Iesu?

A o faagasolo lana faiva, sa fetaiaʻi Iesu ma le ʻautusiupu e lē gata i Ierusalema, ae faapea foʻi i aai laiti ma nuu. I fafo atu o Ierusalema, e oo foʻi i vaipanoa Iutaia i fafo o Palesitina, na avea na tane o ni tagata faigaluega e lē maualuluga tele o latou tulaga, ae na aʻoaʻoina i le Tulafono, o ē atonu na galulue e toe tusia tusi ma faamasinoina le nuu.—Mareko 2:6; 9:14; Luka 5:17-21.

I Ierusalema, sa galulue soosootauʻau ai tusiupu ma le malo o Iutaia. (Mataio 16:21) Na taʻua i le The Anchor Bible Dictionary e faapea, o le matafaioi a tusiupu i Ierusalema, “e foliga mai e auaufaatasi ma ositaulaga, i faamasinoga ma le faamalosia o aganuu ma tulafono Iutaia, ma pisinisi faaauau pea i le Saniterini.” I le avea o ni faiaʻoga taualoa o le Tulafono, o nisi o nei tusiupu o ni sui o le Saniterini, po o le faamasinoga maualuga a Iutaia. E galulue faatasi i latou ma ositaulaga sili ma le ʻau Faresaio.

E masani ona taʻua i le Tusi Paia le ʻautusiupu o ni tagata lotu e tetee iā Iesu. Ae e leʻi tetee nisi o i latou iā te ia. O se faaaʻoaʻoga, na faapea atu se tusiupu iā Iesu: “Ou te mulimuli atu iā te oe i mea uma e te maliu atu i ai.” Na fetalai atu Iesu i se isi tusiupu e faapea: “E te lē o mamao mai le malo o le Atua.”—Mataio 8:19; Mareko 12:28-34.

O le ā sa uiga i ai le faauuina o se tagata?

I Sasaʻe Tutotonu i le vaitaimi o le Tusi Paia, o le uuina o le ulu o se tagata i le suāuu, o se faailoga lea o le taliaina o ia po o le faaalia o le agaga talimālō iā te ia. E masani lava o le uu na faaaogā, o le suāuu olive e faaopoopo i ai mea faamanogi. Sa liligi foʻi e tagata Eperu le suāuu i ulu o tagata, po o le faauuina o ia, pe a tofia aloaʻia o ia i se tulaga faapitoa e tuu atu i ai le pule. O se faaaʻoaʻoga, sa faauuina Arona ina ua tofia o ia e avea ma ositaulaga sili. (Levitiko 8:12) Ina ua faauuina le tupu o Tavita, “Ona tago lea o Samuelu i le fagu nifo o suāuu, ua faauu aʻi iā te ia . . . ona osofia lea o Tavita e le Agaga o Ieova, na afua mai i lea lava aso.”—1 Samuelu 16:13.

I le gagana Eperu, o le faaupuga mo lenā ituaiga faauuga o le ma·shachʹ, lea e maua mai ai le upu ma·shiʹach, po o le Mesia. O le upu Eleni e talitutusa ma lenā upu, o le khriʹo, lea e maua mai ai le upu khri·stosʹ, po o le Keriso. O lea la, e mafai ona faasino atu iā Arona ma Tavita o ni mesia, po o ē ua faauuina. Na taʻua foʻi Mose o le keriso, po o sē ua faauuina, i le uiga e faapea na tofia o ia e le Atua e fai ma Ona sui.—Eperu 11:24-26.

Na tofia e le Atua Iesu mai Nasareta i se tulaga pule e maualuga atu. Nai lo le faauuina i le suāuu, sa faauuina Iesu i le agaga paia o le Atua. (Mataio 3:16) I le avea ma Lē ua Faauuina e Ieova, ua talafeagai ai ona faasino atu iā Iesu o le Mesia, po o le Keriso.—Luka 4:18.