Ua Ou Maua se Mea Aogā i le Olaga

Faamatalaina e Gaspar Martínez

O laʻu tala e faigofie, o le tala a se tama mativa mai i se nuu i tua o lē na tamaoaiga i le aai. Ae o le a e iloa o le tamaoaiga na ou faaputuina, e lē o le mea lenā na ou faatalitalia.

NA OU ola aʻe i se nuu i tua valevalenoa, i vaitausaga o le 1930, i Rioja i le itu i mātū o Sepania. I le sefulu o oʻu tausaga, na ou lē toe aʻoga ai, ae ua ou iloa lava faitau ma tusitusi i lenā taimi. Sa matou galulue faatasi ma oʻu uso ma tuafāfine e toʻaono i le fanua, i le tausiaina o mamoe ma faatoʻa si o matou fasi fanua.

O le mativa, na matou manatu ai e tāua tupe ma le saʻilia o mea faitino. Na matou matauʻa iā i latou e tele atu a latou mea i lo o i matou. Ae na fai mai le epikopō, o lo matou nuu “e sili atu ona toʻaʻaga i le lotu i lana matagaluega faa-epikopō.” Ae e na te leʻi iloa e toʻatele i latou o le a ō ese mai i le lotu Katoliko.

Le Saʻiliga mo se Mea e Sili Atu

Na ma faaipoipo ma Mercedes, o se teine o lo matou nuu. E leʻi umi, ae maua sa ma tama tama. I le 1957, na matou siitia atu ai i le aai e lata ane o Logroño, ma na mulimuli ane siitia atu foʻi ma lo matou aiga atoa. Ona e leai soʻu tomai i mea tau galuega, e leʻi umi ae ou iloaina, e itiiti la ni avanoa ou te maua ai se galuega e lava le totogi e tausi ai le aiga. Sa ou tau mafaufau po o fea e maua ai se fesoasoani. Na amata ona ou saʻili i le faletusi i le aai, e ui ou te leʻi iloa po o le ā le mea o loo oʻu saʻilia.

Mulimuli ane, na ou faalogo ai i se polokalame i le leitiō, o loo faasalalau mai ai se aʻoga faale-Tusi Paia e ala i fetusiaʻiga. E leʻi umi ae uma laʻu aʻoga, ma na faafesootaʻi aʻu e nisi o Faievagelia o le lotu Porotesano. Ina ua uma ni nai aʻu asiasiga i lo latou falesā, na ou iloa ai le feteenaʻi o taʻitaʻi o le lotu. Ou te leʻi toe alu i ai, ma ua ou manatu e tutusa uma lava lotu.

Ua Ou Iloa Mea e Tāua i le Olaga

I le 1964, na asiasi mai ai i lo matou aiga se tauleʻaleʻa e igoa iā Eugenio. O ia o se Molimau a Ieova, o se lotu ou te leʻi faalogo muamua lava i ai. Ae sa ou fia talanoa lava i le Tusi Paia. Sa ou manatu ua ou malamalama lelei i le Tusi Paia. Sa ou tali atu iā te ia e ala i le faaaogā o ni nai mau na ou iloa mai i laʻu aʻoga fetusiaʻi. E ui lava sa ou taumafai e puipuia nisi o aʻoaʻoga faa-Porotesano, ae i loʻu loto ou te leʻi talitonu moni i ai.

Ina ua uma ni talanoaga uumi se lua, na ou ioe ai i le tomai o Eugenio e faaaogā le Afioga a le Atua. Sa ou maofa i le auala e na te suʻeina ai mau ma faamatala mai lo latou faatatauga, e ui e maualuga atu aʻu aʻoaʻoga nai lo o ia. Na faailoa mai e Eugenio iā te aʻu mai i le Tusi Paia e faapea, ua tatou ola i aso e gata ai, ma ua toeitiiti ona aumaia lea e le Malo o le Atua se lalolagi parataiso. Sa oso aʻe loʻu naunau e fia iloa atili.—Sala. 37:11, 29; Isa. 9:6, 7; Mata. 6:9, 10.

Na ou talia fiafia se suʻesuʻega faale-Tusi Paia. Na toetoe lava o mea uma na ou aʻoaʻoina e fou, ma na pāʻia ai loʻu loto. Na taatia mai i oʻu luma ni faamoemoega fou e tatau ai ona ou ola. Ua iʻu laʻu saʻiliʻiliga. E foliga mai nei ua lē talafeagai aʻu taumafaiga, ina ia faaleleia loʻu tulaga i le va fealoaʻi, ma ua lē tāua tele foʻi aʻu taumafaiga, ina ia suʻe se galuega e lava le totogi e tausi ai loʻu aiga. E oo lava i maʻi ma le oti o le a aveesea.—Isa. 33:24; 35:5, 6; Faaa. 21:4.

Na amata loa ona ou taʻu atu i oʻu tauaiga mea na ou aʻoaʻoina, ma faamatala atu ma le naunau iā i latou, ua folafola mai e le Atua o le a ia aumaia se lalolagi parataiso, lea o le a ola ai e faavavau tagata faamaoni.

Talia e Loʻu Aiga Upu Moni o le Tusi Paia

E leʻi umi, ae filifili loa le tusa ma le toʻasefululua o i matou, e feiloaʻi i aoauli o Aso Sa i le fale o le uso laʻitiiti o loʻu tamā, ina ia talanoa ai e uiga i folafolaga a le Tusi Paia. E tolu i le fā itula i vaiaso taʻitasi e matou te faia ai faapea. Ina ua vaai atu Eugenio i le toʻatele o oʻu tauaiga e fiafia i le Tusi Paia, sa ia fuafua loa e uaʻi atu i aiga taʻitasi.

Na iai foʻi nisi oʻu tauaiga i Durango, o se tamaʻi taulaga e tusa ma le 80 maila (120 kilomita) le mamao, e leai ni Molimau e nonofo ai. O lea, i le tolu masina mulimuli ane, na ave ai ni oʻu aso mālōlō se lua e asiasi atu ai iā i latou ina ia faamatala atu i ai loʻu faatuatuaga fou. I lenā taimi, e tusa ma le toʻasefulu o i matou na faapotopoto i afiafi taʻitasi, ma ou talanoa atu iā i latou seʻia oo i le vaveao. Na fiafia i latou uma e faalogologo. Ina ua uma si aʻu asiasiga puupuu, na ou tuu iā i latou ni Tusi Paia ma lomiga faale-Tusi Paia. Mai i lenā taimi, sa faaauau pea ona matou fesootaʻi.

Ina ua taunuu Molimau i Durango—lea e leʻi i ai lava se tasi na talaʻi ai muamua—na latou maua ai ni tagata se toʻasefuluvalu, o loo faatalitali ma le naunau mo se suʻesuʻega faale-Tusi Paia. Sa fiafia Molimau e faatulaga se suʻesuʻega mo aiga taʻitasi.

E oo ane i lenā taimi, e leʻi fiafia lava Mercedes i le upu moni ona o le fefe i tagata, ae e lē ona o le musu e talia aʻoaʻoga a le Tusi Paia. Sa faasāina le galuega a Molimau a Ieova i Sepania i lenā taimi, o lea na ia manatu ai, o le a tutuli e tagata o le malo la ma fanau e toʻalua mai i le aʻoga, ma faaesea ai i matou uma. Ae ina ua ia iloa ua talia e le aiga atoa le upu moni o le Tusi Paia, sa manaʻo loa o ia e suʻesuʻe.

E leʻi atoa le lua tausaga, ae ua 40 tagata o loʻu aiga ua avea ma Molimau, ma ua papatisoina e faailoga ai lo latou tuuina atu e auauna i le Atua. Ioe, ua tasi lava le sini ma le faamoemoe o lo matou aiga. Ua ou lagona ua ou ausia se mea e aogā moni lava. Ua faamanuiaina i matou i le anoanoaʻi o ʻoa faaleagaga.

Ua Sili Ona Faamalieina le Olaga a o Faasolo Ina Matua

I le isi 20 tausaga, na ou uaʻi atu ai i le tausiaina o la ma fanau tama e toʻalua, ma fesoasoani atu i le faapotopotoga. Ina ua ma siitia atu ma Mercedes i Logroño, sa na o le 20 Molimau i lenā aai, e tusa ma le 100,000 i latou e nonofo ai. E leʻi umi, ae ou maua le tele o tiute tauave i le faapotopotoga.

I le taimi lenā, ina ua 56 oʻu tausaga, na faafuaseʻi lava ona tapunia le kamupani na ou faigaluega ai, ma ua leai ai saʻu galuega. Sa ou faanaunau pea ia auai i le faiva faataimi atoa, ma o lea na ou faaaogā ai ia avanoa fou e avea ai o se paeonia. E laʻitiiti si penisione na ou maua, ma sa lē faigofie ona ola ai. Na fesoasoani Mercedes e ala i le faia o ni galuega faamamā. Sa mafai lava ona ma tausia lo matou aiga, ma e leai se mea na matou matitiva ai. O loo avea pea aʻu ma paeonia, a o Mercedes o loo fiafia e avea ma paeonia lagolago mai i lea taimi i lea taimi, ma matuā olioli ai i le galuega talaʻi.

I nai tausaga ua tuanaʻi, sa masani ona tuu ai e Mercedes a matou mekasini i se fafine talavou e igoa iā Merche, o lē na suʻesuʻeina le Tusi Paia a o laʻitiiti. Sa faitau ma le naunau e Merche a tatou lomiga, ma na mātauina e Mercedes o loo talisapaia pea e Merche upu moni o le Tusi Paia. I le iʻuga na taliaina e Merche se suʻesuʻega faale-Tusi Paia ma amata ona agaʻigaʻi i luma. A o lana tane o Vicente, e inu pia tele ma e lē mau i sana galuega. O le iʻuga, e leʻi mafai ona ia tausia o ia i le itu tau tupe; sa faalētonu la la faaipoipoga ona o le faaaogā sesē o le ʻava malosi.

Na fautua atu laʻu avā iā Merche e fai iā Vicente e sau ma te talanoa, ma na iʻu ina sau. Ina ua uma ni nai asiasiga, na ia talia ai se suʻesuʻega faale-Tusi Paia. Na amata ona suia uiga o Vicente, o nisi taimi ua lē toe inu mo ni nai aso. Ona sosoo ai lea ma le atoa o le vaiaso pe sili atu foʻi ua lē toe inu. Mulimuli ane na matuā tuu ai loa lana inu. Na iloa atu le suiga i ona foliga, ma ua autasi lona aiga. Ua lagolagoina e lona aiga atoa, o lana avā, ma lona afafine, si tamaʻi faapotopotoga i Canary Islands, lea o loo latou nonofo ai i le taimi nei.

Toe Tepa i Tua i se Olaga Lelei ua Ou Maua

E ui lava ua maliliu nisi o oʻu tauaiga na aʻoaʻoina upu moni o le Tusi i tausaga ua mavae, ae o loo faaauau pea ona tupu lo matou aiga, ma ua matuā faamanuiaina i matou e le Atua. (Faata. 10:22) Maʻeu le faamalieina i le vaai atu e toetoe lava o i latou uma, na amata ona suʻesuʻeina le Tusi Paia i le 40 tausaga ua mavae, o loo faaauau pea ona auauna ma le faamaoni iā Ieova, faatasi ma a latou fanau, ma fanau a a latou fanau!

I le taimi nei ua toʻatele oʻu tauaiga ua avea ma Molimau, e toʻatele o loo auauna o ni toeaina, auauna o le faiva, ma paeonia. O loo galulue loʻu atalii matua ma lana avā i le ofisa o le lālā o Molimau a Ieova i Madrid, i Sepania. Ina ua avea aʻu ma Molimau, e tusa ma le 3,000 i matou i Sepania. Ae i le taimi nei ua silia i le 100,000. O loo oʻu matuā olioli i le faiva faataimi atoa, ma ou te matuā lotofaafetai i le Atua mo se olaga matagofie i le auaunaga iā te ia. E ui e itiiti le tulaga tau aʻoaʻoga, ae o loo mafai ona ou auauna mai i lea taimi i lea taimi, e sui tulaga i le ovasia matagaluega.

I nai tausaga ua mavae, na ou iloa ai, ua toetoe lava ina a leai ni tagata e nonofo i le nuu lea na ou ola aʻe ai. O le mativa na iʻu ai ina faamalosia tagata uma na nonofo ai, e tuua o latou fanua ma aiga ae saʻili mo se olaga lelei. O le itu e fiafia ai, ona o nisi o i latou na ō ese mai ma aumau i inei, e aofia ai ma aʻu—ua maua ʻoa faaleagaga. Ua matou iloa e iai se fuafuaga o le olaga, ma o le auauna iā Ieova, e maua ai le olioli sili e lē mafaatusalia.

[Ata i le itulau 32]

E toetoe lava o le aiga uma o le uso o Martínez o loo i le upu moni