Ua Fesili Mai le ʻAufaitau

Pe e Iai Moni se Tiapolo?

Ioe, o loo aʻoaʻo i le Tusi Paia e faapea o Satani le Tiapolo, o se peresona moni. Peitaʻi, ua ulagia e le ʻaufaitio o le Tusi Paia lenā manatu. Ua latou faapea mai o Satani ua na o se uiga leaga o loo i totonu o le tagata.

Pe e faateʻia i tatou i lenei fenuminumiaʻi pe e iai moni se Satani? E leai. O se faataʻitaʻiga: E soloiesea e se tagata solitulafono ona tulaga lima mai i se nofoaga na ia faia ai le solitulafono ina ia lē maua ai o ia, ma faaauau pea ana faiga faasolitulafono, ae lē maua. E faapena Satani, ua pei o ia o lenā tagata e faatogafiti ona ia uunaʻia le faia o amioga leaga. Na faamanino mai e Iesu, o Satani le pogai o tulaga leaga o tagata. Na ia taʻua o Satani o le “pule o lenei lalolagi.”—Ioane 12:31.

E mai i fea le Tiapolo? Sa avea muamua o ia ma foafoaga agaga e lelei atoatoa i le lagi, ae na fouvale lenei agelu ma avea o ia ma Tiapolo ina ua manaʻo ia tapuaʻi atu tagata iā te ia ae lē o le Atua. Ua faamauina i le Tusi Paia le talanoaga a Satani ma Iesu i inei i le lalolagi, ma na faaalia ai e le Tiapolo lona tuʻinanauga manatu faapito. Sa taumafai o ia ia “faapaʻū ma tapuaʻi” atu Iesu iā te ia.—Mataio 4:8, 9.

O loo taʻua i le tusi o Iopu talanoaga a Satani ma le Atua, ma na atagia mai ai foʻi tuʻinanauga o Satani. E na te faia so o se mea ina ia lafoaʻia ai e tagata le Atua.—Iopu 1:13-19; 2:7, 8.

Mātau mai: Afai na talanoa Satani ma Ieova le Atua, ma Iesu Keriso, e faapefea la ona avea Satani o se uiga leaga i totonu o se tagata? E lē ponā le Atua, ma lona Alo! O lea la, o Satani o se peresona moni, o se foafoaga agaga leaga e lē migao i le Atua ma Iesu.

Ua taʻu mai e le tulaga leaga o tagata le iai moni o Satani. E ui o loo tele tagata e fia aai ma matelāina, ae o le matapeʻapeʻa o malo ua mumusu ai e tufa taumafa i tagata. O le feitagaʻi ua faaputu ai e atunuu auupega e fasiotia ai tagata o isi atunuu. O i latou ua māfua ai ona faalētonu le siʻosiʻomaga. Peitaʻi, e lē o iloa e le toʻatele o tagata le pogai o na amioga feitagaʻi ma fefasiotiaʻi. Aiseā?

Ua faaalia i le Tusi Paia ‘ua faatauasoina manatu o ē e lē talitonu’ e Satani. (2 Korinito 4:4) Ua faasesēina e Satani tagata e ala i se faalapotopotoga lē vaaia. O ia o le “pule o temoni.” (Mataio 12:24) E faaaogā e le pule o se faalapotopotoga faalilolilo tagata e faatinoina ana faiga faasolitulafono e aunoa ma le iloa e na tagata, ma e faapena foʻi ona faaaogā e Satani lana faalapotopotoga o agelu leaga e pulea tagata e aunoa ma so latou iloa o ana gaoioiga ma taaʻiga.

E tatou te fiafia ona ua faailoa mai e le Tusi Paia le Tiapolo, ma lana faalapotopotoga! Ua mafai ai ona tatou tetee atu i taaʻiga a le Tiapolo. Ua lapataʻi mai le Tusi Pai: “Ia outou gauaʻi atu i le Atua ae ia tetee atu i le Tiapolo, ona sola ese ai lea o ia mai iā te outou.”—Iakopo 4:7.