Talitonuga 2: E Faasalaina Ē Amioleaga i Seoli
O fea e tupuga mai ai lea aʻoaʻoga? “I le ʻaufaifilosofia Eleni e sili ona lauiloa, o lē sa sili ana taaʻiga i manatu faaanamua e faatatau i Seoli, o Palato.”—Histoire des enfers (Talafaasolopito o Seoli), tusia e Georges Minois, itulau 50.
“Mai le ogatotonu o le senituri lona 2 T.A, na mananaʻo ai nisi Kerisiano o ē na iai so latou malamalama i filosofia faa-Eleni, e faamatala o latou talitonuga i faaupuga o nei filosofia . . . Na sili ona latou fiafia i filosofia a Palato.”—The New Encyclopædia Britannica (1988), Tusi 25, itulau 890.
“Ua faamaonia e le aʻoaʻoga a le Lotu le iai o seoli e faavavau. I le taimi e maliu ai le tagata agasala, e alu o ia i seoli e faasalaina ai i le ‘afi e faavavau.’ O le faasalaga autū i seoli, o le faaesea lea e faavavau mai le Atua.”—Catechism of the Catholic Church, lomiga 1994, itulau 270.
O le ā le tala a le Tusi Paia? “Auā o ē ua ola, ua latou iloa e oti i latou; a o ē ua oti, latou te lē iloa se mea, . . . auā e leai se galuega, po o se mafaufau, po o se iloa, po o se poto i Seoli o loo e alu atu i ai.”—Failauga 9:5, 10.
O le upu Eperu Sheol, o loo faasino i le “nofoaga o ē ua oti,” ma ua faaliliuina o “seoli” i nisi faaliliuga o le Tusi Paia. O le ā ua faaalia i lenei mau e faatatau i ē ua oti? Po o faasalaina i latou i Seoli ina ia totogi ai a latou agasala? E leai, auā ua latou ‘lē toe iloa se mea.’ Ina ua feagai Iopu ma se maʻi tugā, na ia talosaga atu i le Atua: “Ia e puipui iā te aʻu i Seoli.” (Iopu 14:13; Douay-Rheims Version) Faamata e talosaga atu Iopu e puipuia o ia i Seoli pe ana faapea o Seoli o se nofoaga e puapuagatia ai e faavavau? O lona uiga i le Tusi Paia, o Seoli, o le tuugamau taatele o le fanau a tagata, e leai se galuega o faia ai.
Ua talafeagai lea faamatalaga ma aʻoaʻoga a le Tusi Paia. E lē mafai e le Atua alofa ona ia faapuapuagatia e faavavau se isi, e ui ina matuiā sana agasala na fai. (1 Ioane 4:8) O lea, afai e lē moni le aʻoaʻoga i le afi, ae ā le aʻoaʻoga e ō tagata lelei i le lagi?
Faatusatusa mau nei: Salamo 146:3, 4; Galuega 2:25-27; Roma 6:7, 23
LE AʻOAʻOGA MONI:
E lē faasalaina e le Atua tagata i seoli
[Ata i le itulau 5]
[Ē Ana le Ata i le itulau 5]
Barrators—Giampolo/The Doré Illustrations For Dante’s Divine Comedy/Dover Publications Inc.