O Lesona Tatou te Aʻoaʻoina Mai iā Iesu

E Uiga i le Tapuaʻiga Moni

Pe e talia e le Atua tapuaʻiga uma?

▪ Na alofa Iesu i tagata ua faasesēina e lotu sesē. Na ia lapataʻi e uiga i “perofeta pepelo, o ē e ō mai . . . i ofu mamoe, a o totonu o luko feʻai lava i latou.” (Mataio 7:15) Po o e mātauina ua faaaogā lotu e nisi o tagata, ina ia faataunuu ai ni mea leaga?

Na faapea atu Iesu i lana tatalo i le Atua: “O lau afioga o le upu moni lea.” (Ioane 17:17) E lē fiafia le Atua i tapuaʻiga e feteenaʻi ma upu moni o le Tusi Paia. O lea la, na faatatau atu e Iesu i nisi o tagata lotu faafiaamiotonu, fetalaiga a le Atua e faapea: “E lē aogā la latou tapuaʻiga o loo fai mai iā te aʻu, auā ua faavae a latou aʻoaʻoga i mataupu a tagata.”—Mataio 15:9.

Pe e iai se lotu moni?

▪ Ina ua feiloaʻi Iesu ma se fafine Samaria o lē na faasesēina e lotu sesē, na ia taʻu atu iā te ia: “Ua outou tapuaʻi i mea tou te lē iloa; . . . O ē o loo i le tapuaʻiga moni, latou te tapuaʻi i le Tamā i le agaga ma le upu moni, auā o loo saʻilia e le Tamā tagata faapena e tapuaʻi atu iā te ia.” (Ioane 4:22, 23) E manino mai, e mafai ona maua le tapuaʻiga moni.

Na fetalai Iesu: “Ou te lē faia se mea i loʻu lava loto; ae e pei ona aʻoaʻo mai e le Tamā iā te aʻu, o mea ia ou te tautala atu ai.” Sa silafia e Iesu, o le lotu lea e na te aʻoaʻoina atu, e na o le pau lea o le lotu moni. (Ioane 8:28) O lea na ia fetalai ai: “O aʻu o le ala, o le upu moni ma le ola. E leai se tasi e alu atu i le Tamā pe a lē ui mai iā te aʻu.” (Ioane 14:6) Talu ai o tagata tapuaʻi moni ua autasi i latou i le ala e tasi e faalatalata atu ai i le Tamā, e tatau foʻi la ona autasi i latou i le tapuaʻiga moni e tasi.

E faapefea ona e iloa tagata tapuaʻi moni?

▪ E mulimuli se Kerisiano iā Iesu Keriso. Seʻi manatu i ni auala se fā e faaalia manino ai, o le mulimuli i le faaaʻoaʻoga a Iesu e iloa ai ona soo.

1. Na tatalo Iesu Keriso iā Ieova: “Ua ou faailoa atu lou suafa.” (Ioane 17:26) O loo faapena foʻi ona faia e Kerisiano moni.

2. Na talaʻi e Iesu le Malo o Ieova, ma auina atu ona soo mai i lea fale i lea fale ia faia faapea. Na ia fetalai: “O so o se aai po o se nuu tou te ō atu i ai, ia saʻili po o iai sē ua tatau i ai le feʻau.” Mulimuli ane, na ia faapea atu i ona soo: “O le mea lea, ia outou ō atu e fai tagata o nuu uma lava ma soo.” (Mataio 10:7, 11; 28:19) E faigofie ona e mātauina Kerisiano i aso nei, ona o loo latou faia lea lava galuega.

3. Sa lē faia e Iesu sana vaega i faigāmalo. O lea, na ia fetalai atu e uiga i ona soo: “E lē o ni tagata o le lalolagi i latou, e pei foʻi o aʻu, e lē o aʻu o se tagata o le lalolagi.” (Ioane 17:14) E ao ona lauiloa tagata tapuaʻi moni i lo latou solitū i mataupufai a malo.

4. Ona o le alofa o Iesu, sa ia faamuamua ai manaʻoga o isi. Na ia fetalai: “O le mea lea e iloa ai e tagata uma o oʻu soo outou, pe afai ua outou alolofa o le tasi i le isi.” (Ioane 13:35) O Kerisiano moni e alofa le tasi i le isi, ma e lē auai i taua.

E faapefea ona aogā iā te oe le tapuaʻiga moni?

▪ Ina ia faatino le tapuaʻiga moni, e ao ona e iloa lelei Ieova. O le iloa lelei o le Atua, o le a mafai ai ona e maua le ala sili o le olaga, ma lagona ai i lou loto le alofa tele mo le Atua. Ua folafola mai e Ieova, le ola e faavavau mo i latou e alolofa iā te ia. O lea, na fetalai Iesu: “O le ola e faavavau foʻi lenei, ia latou iloa oe, le Atua moni e toʻatasi.”—Ioane 17:3.

Mo nisi faamatalaga, tagaʻi i le mataupu e 15 o le tusi lenei, O ā Aʻoaʻoga Moni a le Tusi Paia? ua Lomia e Molimau a Ieova.

[Ata i le itulau 16]

“Ia mataala pea i perofeta pepelo, o ē e ō mai iā te outou i ofu mamoe, a o totonu o luko feʻai lava i latou.”—Mataio 7:15