E Aogā le Feʻau a Iesu Keriso iā te Oe

“Ua ou sau ina ia latou maua le ola, ma saga maua atili ai.” —IOANE 10:10.

O LE māfuaaga autū na afio mai ai Iesu Keriso i le lalolagi, ia foaʻi atu, ae lē ia talia mai. E ala i lana faiva, na ia foaʻi mai ai se meaalofa tautele i le fanau a tagata, o se feʻau ua faaalia ai le upu moni e uiga i le Atua ma Lona finagalo. O i latou e tali atu i lenā feʻau, e mafai ona olioli i se olaga e sili ona lelei i le taimi nei, e pei ona molimauina e le faitau miliona o Kerisiano moni.a Ae o le vala sili o le feʻau na talaʻia e Iesu, o le meaalofa e pito sili ona tautele i mea uma, o lona soifua lelei atoatoa lea na ia foaʻi mai mo i tatou. E faalagolago lo tatou lelei e faavavau, i la tatou tali atu i lenei vala autū o lana feʻau.

Le mea na foaʻi mai e le Atua ma Keriso Na silafia e Iesu, o le a maliu o ia i se maliu tigā i lima o ona fili. (Mataio 20:17-19) Ae i ana upu lauiloa o loo i le Ioane 3:16, na ia fetalai ai: “O le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.” Na fetalai foʻi Iesu na sau o ia e “foaʻi atu lona ola e fai ma togiola e sui aʻi tagata e toʻatele.” (Mataio 20:28) Aiseā na fai mai ai o ia o le a foaʻi atu lona ola na i lo o le aveesea?

Ona o le alofa tele, na faia ai e le Atua sauniuniga ina ia laveaʻi ai tagata mai le agasala tuufaasolo ma ona āuga, o le lē lelei atoatoa ma le oti. Na faia e le Atua lenei mea i le auina mai o lona Alo e toʻatasi i le lalolagi, ina ia maliu ma fai ai le taulaga. Na lotomalie Iesu e faia lenā mea, i le foaʻi mai o lona soifua lelei atoatoa faaletagata mo i tatou. O lenei sauniuniga o le togiola, o le meaalofa aupito sili lea a le Atua i le fanau a tagata.b O le meaalofa lea e maua ai le ola e faavavau.

Le mea e tatau ona e faia Pe e aogā iā te oe le meaalofa o le togiola? E faitalia lava oe. Seʻi faataʻitaʻi: Seʻi faapea ua faalālā atu e se tasi iā te oe se meaalofa ua uma ona afīfī. O le mea moni, e lē avea ma oe lenā meaalofa seʻiloga ua e tago atu i ai ma aumai. Ua faapena foʻi ona ofo mai e Ieova le togiola iā te oe, ae e lē avea ma oe seʻiloga ua e tago atu i ai ma aumai. E faapefea ona e tago atu i ai ma aumai?

Na fetalai Iesu, o i latou e “faatuatua” iā te ia o le a maua le ola e faavavau. O le faatuatua e aofia ai le auala e te ola ai. (Iakopo 2:26) O le faatuatua iā Iesu, o le faaōgatusa lea o lou olaga ma mea na ia fetalai mai ai ma faia. Ina ia faia faapea, e tatau ona e iloa lelei Iesu ma lona Tamā. Na fetalai Iesu: “O le ola e faavavau foʻi lenei, ia latou iloa oe, le Atua moni e toʻatasi, atoa ma lē na e auina mai, o Iesu Keriso.”—Ioane 17:3.

E tusa ma le 2,000 tausaga ua mavae, na folafola atu ai e Iesu Keriso se feʻau na suia ai olaga o le faitau miliona o tagata i le lalolagi atoa. Pe e te fia iloa atili lenā feʻau ma le auala e maua mai ai aogā e oe ma ē pele iā te oe, e lē na o le taimi nei ae e oo i le faavavau? E fiafia Molimau a Ieova e fesoasoani atu iā te oe.

O mataupu o loo mulimuli mai o le a faamasani atili ai oe iā Iesu Keriso, le tagata na talaʻia se feʻau e mafai ona suia ai lou olaga e oo i le faavavau.

[Faamatalaga pito i lalo]