Po ua Tatou Lē Toe Lagona le Matuiā o le Agasala?

O LE tulaga masani, sa lauga leotele mai le faifeʻau i le pulelaa i le ʻaulotu ma taʻusalaina “agasala matuiā e fitu,” o le tuʻinanau i feusuaʻiga, ʻaitele ma le inutele, matapeʻapeʻa, paiē, ita, losilosi, ma le faamaualuga. Sa masani ona faamatala e le faifeʻau iʻuga mataʻutia o le agasala, ma uunaʻia lana ʻaulotu ia salamō. Ua faapea mai se tasi tusitala: “I le taimi nei, ua lē toe taʻua le agasala i le tele o lauga, a ua lauga atu e uiga i mataupu e fiafia i ai le ʻaulotu.”

Ua iloa foʻi e le ʻautusitala lenā faiga. O faamatalaga nei mai i nisi o i latou:

▪ “Ua lē toe lauga atu faifeʻau e uiga i le agasala, salamō ma le faaolataga, a ua lauga atu ia faatāua e le tagata o ia lava, ma alofa iā te ia lava.”—Star Beacon, Ashtabula, Ohio.

▪ “Ua tauau ina lē ano tagata i le agasala.”—Newsweek.

▪ “Ua tatou lē toe fesili, ‘⁠Po o le ā o manaʻomia e le Atua mai iā te aʻu,’ ae ua fesili, ‘⁠O le ā le mea o le a faia e le Atua mo aʻu?’ ”—Chicago Sun-Times.

I lenei lalolagi o tagata o atunuu eseese, o lotu ma faigāmalo, ua faatalatū tagata e faamasino fua amioga a isi. Ua fai mai isi, e lē faaaloalo le faia faapea. E foliga mai o se agasala tele le faamasino fua o amioga a isi. Ma o le manatu o tagata: ‘⁠Atonu o loo lelei lava iā te oe ou talitonuga, ae aua e te taumafai e faaofi atu ou manatu i isi. I nei aso, ua faia e tagata mea e tāua iā i latou. Ae e lē na o oe ua iloa le mea e saʻo. E iai le aiā a isi tagata e filifili ai i le mea e saʻo, e pei foʻi o oe.’

O lenei manatu ua suia ai faaupuga a tagata. I aso nei, ua lē o toe matuiā i tagata le upu agasala. Ua avea ma tausuaga i le toʻatele. Ua lē o toe taʻua e tagata le faaupuga, “o loo nonofo faapouliuli,” ae faapea, o la “ua nonofo.” Ua lē o toe taʻua, o ni “tagata mulilua,” ae o la “e feoaʻi ma le isi fafine po o le isi tamāloa.” Ua lē o toe taʻua o ni “tauatane po o ni tauafafine,” a ua taʻua “o le ulugalii tama po o le ulugalii teine.”

E mautinoa, ua suia mea sa manatu i ai tagata o “amioga masani” po o le “agasala.” Ae aiseā ua suia ai? Aiseā ua manatu māmā ai tagata i le agasala? Ae, pe e afāina po o le ā lou manatu i lenei mea?