Ua La Lē Toe Fefefe i le Iʻuga

A O LATA i le 1980, na talitonu ai Gary ma Karen ua lata le iʻuga o le lalolagi. O lea na la ō ese ai mai i le taulaga ae ō atu i se vaipanoa maotua, ma manatu e tatau ona la matuā tagi i o laʻua lava lima. Na la mananaʻo ia faasaoina.

Ina ia maua tomai na la manaʻomia, na la faatau mai tusi, auai i aʻoga ma seminā, ma talanoa atu i tagata i le tele e mafai ai. Na la totō se togālaau ʻaina ma ni laau e fua pupuu e 50. Na la faaputu fatu ma meafaigaluega. Na la aʻoaʻo le auala e totō ai laau ma teu meaʻai. Na faasino iai e se uō le auala e la te fasi ai manu ma faamasima aano o manu. Na mafai e Karen ona faavasega laau eseese ma aa o laau i le vaomatua, ina ia la aai ai pe a leai ni meaʻai. Ae na iloa e Gary fai le suāuu mai i sana, fau se ogaumu uʻamea e faaaogā ai fafie, ma se fale e lē faalagolago i ni mea mai i fafo.

Ua taʻua e Karen: “Ona o le mataʻutia o mea e tutupu i le lalolagi i lenā taimi, na ou manatu ai ua lata le faaumatiaga o tagata.” Ua fai mai Gary: “I le pei o isi talavou, sa ou taumafai e foʻia le faafitauli o le faailogalanu, le Taua i Vietiname ma faiga faapiʻopiʻo. Ae na vave ona mou atu loʻu fiafia. Na ou manatu o le a faaumatia e tagata i latou lava, pe a faaauau pea nei faiga.”

Ua taʻua e Gary: “I se tasi pō ina ua leai saʻu mea e fai, na ou tago atu i le Tusi Paia ma faitau mai i le Mataio e oo i le Faaaliga. Na ou toe faitauina i isi pō e fā na sosoo ai. I le taeao lona lima, na ou faapea atu iā Karen: ‘Ua ta ola i aso e gata ai. Ua lata ona gaoioi le Atua e faamamā le lalolagi. E tatau ona ta saʻili ē o le a faasaoina.’” Na amata loa ona ō atu Gary ma Karen i lotu eseese, e saʻili tagata e fia sauni mo le iʻuga.

E leʻi umi ae asiasi atu se Molimau a Ieova i lo la fale, ma amata ai se suʻesuʻega faale-Tusi Paia. Ua faapea mai Karen: “Sa ou matuā fiafia lava, ona sa manino ona faamatala mai le Tusi Paia. Sa ou saʻilia le upu moni e uiga i le taimi o le iʻuga, ma o lea ua ou maua. E iai le faamoemoe mautinoa mo le lumanaʻi. Ae o le itu sili, ua iai sa ma faauōga ma loʻu Tamā i le lagi, o Lē na foafoaina mea ma o le Atua o le aoao o mea.”

Ua fai mai Gary: “Ua ou maua se mea tāua i loʻu olaga. Ina ua ou suʻesuʻeina le Tusi Paia, ou te leʻi manaʻo e toe misi. Sa ou faitauina valoaga o le Tusi Paia, iloilo faamaoniga e iloa ai na faataunuuina moni, ma ou iloa ua toeitiiti gaoioi le Atua. Na ou manatu, ‘E tatau ona sauniuni tagata, e lē i se mala, ae i le olaga lea e finagalo ai le Atua mo i tatou.’” Na maua e Gary ma Karen se talitonuga mautinoa e uiga i le lumanaʻi. Nai lo o le popole e uiga i le iʻuga o le lalolagi, na la mautinoa o le a aveesea e le Atua faafitauli o loo mafatia ai tagata, ma toe faia le lalolagi e avea ma parataiso.

O le ā o loo faia e Gary ma Karen i le taimi nei, i le silia i le 25 tausaga mulimuli ane? Ua taʻua e Karen: “O loo faaauau pea ona ou alofa iā Ieova le Atua ma faatuatua iā te ia, ma taumafai e fesoasoani atu i isi ia faia foʻi faapea. Ua ma taumafai ma Gary e felagolagomaʻi, a o faamalosia pea lo ma aiga ma autasi i le tapuaʻiga i le Atua. O loo ma taumafai e faamaopoopo ma faafaigofie o ma olaga, ina ia fesoasoani atu i isi ma o latou manaʻoga.”

Ua faaopoopo mai Gary: “Ou te tatalo e lē aunoa ia oo mai le Malo o le Atua ma aumaia le mapusaga i le faitau miliona o tagata. Pe a ou talaʻi atu le tala lelei o le Malo o le Atua i isi, ou te tatalo a itiiti mai e tasi se tagata ou te faailoa atu i ai le faamoemoe mai i le Tusi Paia. Ua silia i le 25 tausaga o tali mai ma le agalelei Ieova i lenā tatalo. Ua ma talitonu ma Karen, ua toe o se aga ona aumaia lea e Ieova o suiga tetele i le lalolagi, ma ua ma lē toe fefefe i le iʻuga.”—Mataio 6:9, 10; 2 Peteru 3:11, 12.

[Ata i le itulau 9]

O loo olioli nei Gary ma Karen e fesoasoani atu i isi e maua le faamoemoe mai i le feʻau o loo i le Tusi Paia