Faauuga Lona 128 o le Aʻoga Kiliata
Auina Atu Misionare e “Fai Tagata ma Soo”
“INA ia faalogo atunuu uma i le tala lelei, ua ofoina atu e nisi Kerisiano i latou e tuua o latou aiga ma fale ae talaʻi le tala lelei i isi atunuu.” O upu na sa faatomua mai ai e David Splane, o se sui o le Vaega Pule o Molimau a Ieova, se aso e fiafia ma atiaʻe ai faaleagaga.
I le aso 13 o Mati, 2010, e lata i le 8,000 tagata na auai i le faauuga o le vasega lona 128 o le Aʻoga Faale-Tusi Paia a le Olomatamata o Kiliata. Na auai uō, o aiga, ma malo mai atunuu e 27.
“E Leʻi Nofonofo le ʻAusoo i le Fale”
O le uso o Splane sa taʻitaʻifono ma na ia amataina le polokalame i le iloiloina o le faatonuga lenei a Iesu: “O le mea lea, ia outou ō atu e fai tagata o nuu uma lava ma soo.” (Mataio 28:19, 20) Sa ia faamamafa le auina atu e Iesu o ona soo i tagata. E moni, na ō ane tagata i le Penetekoso 33 T.A. i Ierusalema mai Mesopotamia, Aferika i Mātū, ma le tele o isi vaega o le Emepaea o Roma ma latou faalogo ai i le tala lelei. E ui i lea, na taʻua e le failauga, “E leʻi nofonofo le ʻausoo i le fale ma faatalitali tagata mai i atunuu uma e ō mai iā i latou. Sa tatau ona latou ō atu i tuluʻiga uma o le lalolagi e saʻili tagata.”—Galuega 1:8.
Na taʻua e le uso o Splane, “E leʻi tau ina taʻu atu e Iesu i ona soo le mea e fai, ae na ia aʻoaʻo atu le auala e fai ai. E lē na o le fai atu e tatalo, ae i le auala e tatalo ai. E lē na o le fai atu e ō e talaʻi, ae na aʻoaʻo atu le auala e talaʻi ai. E lē gata ina fai atu ia avea i latou ma faiaʻoga lelei, ae na ia faataʻitaʻia metotia e lelei ma aogā.”
Na faamāfanafana atu le taʻitaʻifono i mātua o le ʻaufaauu i le sii mai o le faalaeiauga a Iesu i ona soo: “Faauta! ou te faatasi ma outou i aso uma lava seʻia oo i le taufaaiʻuiʻuga o le faiga o mea a le lalolagi.” (Mataio 28:20) Na faamautinoa atu e le uso o Splane i le aofia, o le a tausia pea e Iesu le ʻaufaauu i atunuu ua tofia i ai.
“Ia Mitamita”
Na faalaeiau e Anthony Morris o se sui o le Vaega Pule, le ʻaufaauu “ia mitamita.” Na ia taʻua, e iai le eseesega o le mitamita ma le mitamitavale. E na o i tatou e viia ai i le mitamitavale. Ae o loo faamatalaina i le 1 Korinito 1:31 le mitamita tatau e faapea: “O lē e mitamita, ia mitamita o ia iā Ieova.” Na taʻua e le uso o Morris: “O mea e mitamita ai, o le maua o le malamalama ma le poto e uiga iā Ieova le Atua. O le mea moni, o lo tatou faaeaga sili, o le tauaveina lea o le suafa paia o ni Molimau a Ieova.”—Ieremia 9:24.
Ona taʻua lea e le failauga se mea na tupu i se misionare i Aferika e faamamafa ai le tāua o le faailoa atu o le suafa o Ieova. Sa malaga atu le misionare ma lana avā e fai se lauga faale-Tusi Paia. Ina ua tau atu o poloka mai le auala e le vaegaau, na taʻi ai e se fitafita le fana i le uso ma fesili po o ai o ia. Na manatua e lana avā toleniga o le aʻoga o Kiliata ma musumusu atu iā te ia, “Fai i ai o oe o le Molimau a Ieova e te alu e fai se lauga faale-Tusi Paia.” Na ia faia le mea na fai atu ai lana avā, ma mafai ai loa ona ō. Ae i le aso na sosoo ai, na faalogo ai lenei ulugalii i le leitiō e faapea na faatonuina e le peresitene ana fitafita ina ia mataala i le ʻaufasioti tagata o loo faapea mai o i latou o misionare! O le taʻua o i laʻua o ni Molimau a Ieova i lo o le taʻu o misionare, na puipuia ai mai i faafitauli ogaoga. Na faaiʻu le lauga a le uso o Morris e faapea: “Pe a outou taunuu i o outou tofiga, ia outou mitamita. Ia mitamita i mea uma o le a faia e Ieova e faaaogā ai outou auā lona viiga e faavavau.”
“Pe e Tou te Faataunuu o Outou Tofiga?”
Na fesoasoani Geoffrey Jackson, o se sui o le Vaega Pule sa misionare muamua, i le ʻaufaauu e iloiloina lea fesili. Na fesili o ia, “O le ā le uiga o le avea o se tasi ma misionare?” Na ia faamatala o le upu “misionare,” e maua mai i se faaupuga Latina e faasino i se tagata, po o se vaega o tagata ua maua se tofiga faapitoa. O lo tatou tofiga o ni Molimau a Ieova, o le talaʻi lea o le tala lelei ma fesoasoani i isi ia iloa Ieova ma māfana atu iā te ia. E tatou te fai lenei galuega i le faataʻitaʻi iā Iesu Keriso o lē na iloa lelei lona tofiga i le lalolagi. Na faapea atu o ia i le Kovana Roma o Ponotio Pilato: ‘O le mea lea na ou sau ai i le lalolagi, ina ia ou molimau i le upu moni.’—Ioane 18:37.
Na fesoasoani le failauga i le ʻaufaauu ia mafaufau i le tala o le Tusi Paia i le taua i Ieriko. E ono aso sa usupō ai fitafita Isaraelu, ma fai o latou ofutau ma savavali faataamilo i Ieriko, ma toe foʻi. Na taʻua e le failauga, “i le vaaiga faaletagata e leai se uiga o la latou galuega o loo faia.” Na ia taʻua, atonu na manatu nisi fitafita, ‘E na o le maʻimauga o le taimi.’ Ae i le aso lona fitu, na faatonu ai Isaraelu e taamilo faafitu i le aai ona alalaga lea i le alaga tele o le taua. O le ā le mea na tupu? Na matuā soloia i lalo pā o Ieriko!—Iosua 6:13-15, 20.
E fā lesona na aumai e le uso o Jackson i le tala i Ieriko. (1) E tāua tele le usitaʻi. E tatau ona tatou faia mea i le auala a Ieova ae lē o le manatu e sili la tatou auala. (2) E tāua tele le faatuatua ma talitonu iā Ieova. “O le faatuatua na solo ai i lalo pā o Ieriko,” ae leʻi tuʻiina i ni laau mamafa. (Eperu 11:30) (3) Ia tatou onosaʻi. E oo ina “maua oe” e faamanuiaga a Ieova. (Teuteronome 28:2) (4) Ia aua lava le fiu. Aua lava neʻi galo lo outou tofiga. Na aotele e le uso o Jackson lana lauga e faapea, “Afai e tou te manatua nei manatu tāua, o le a outou faataunuu o outou tofiga ma viia ma faamamaluina ai Ieova.”
Isi Manatu Tāua o le Polokalame
“Ia Naunau i le Tusi Paia ma Alolofa i Lē e Ona.” O le matua lenā o le lauga a Maxwell Lloyd, o se sui o le Komiti o le Lālā o le Iunaite Setete. Na fai atu o ia i le vasega, “Ia olaola iā te outou le Tusi Paia.” Na ia faalaeiau atu: Ia aua neʻi maalili lo outou alofa iā Ieova le Atua. Ia aua neʻi manatu o loo malamalama uma tagata i mea ua e aʻoaʻo atu. Ia faafaigofie upu moni o le Tusi Paia ina ia goto ai i loto o au tagata aʻoga. Ia e lotomaulalo. Aua neʻi foliga atu e maoaʻe sou poto. Ia aʻoaʻo e ala i lau faaaʻoaʻoga. Ia iloa mai e au tagata aʻoga lou naunau i le Tusi Paia.
“Vaavaai Lelei i Oreva.” O le matua lenā o le lauga a Michael Burnett o se faiaʻoga ma o sē sa misionare muamua. Na ia taʻua, e iai taimi e tatou te popole ai. Ae ia manatua le fautuaga a Iesu: “Ia vaavaai lelei i oreva, auā latou te lē lūlū ni fatu pe selesele, . . . ae e fafagaina i latou e le Atua.” (Luka 12:24) E tusa ai ma le Tulafono, o oreva e lē mamā, ma e lē lelei i le tausami. O se manulele sa inosia. (Levitiko 11:13, 15) Ae e tausia e le Atua. O lea na faapea atu ai le uso o Burnett, “Afai e tulaʻi mai sou popolega, manatua le oreva. Afai o loo tausia e le Atua le oreva e lē mamā ma inosia, e sili atu ona ia tausia oe o lē e mamā i lana silafaga.”
“E Leai se Mea Sesē ua Ou Faia iā te Oe.” Sa fesoasoani Mark Noumair, o se faiaʻoga o Kiliata i le aofia ina ia iloilo le talafaatusa a Iesu e uiga i ē na galulue i le togāvine. Sa galulue isi i le aso atoa. A o isi na galulue na o le itula. Ae na tutusa o latou totogi! Na faitio i latou na galulue umi. Na fai atu lē e ana le togāvine i ē na faitio: “E leai se mea sesē ua ou faia iā te oe, pe ta te leʻi malilie faatasi ea i le tenari e tasi? Ia tago loa i lou totogi ma e alu.” (Mataio 20:13, 14) O le ā se lesona mo i tatou? Aua e te faatusatusa oe i isi. Na fai mai le uso o Noumair: “O le a mou atu lou fiafia pe a e faatusatusa oe i isi. Ae e sili ona leaga pe a e tuua ai lou tofiga ma leiloa ai lou faaeaga tāua.” Na faamanatu atu e le failauga i le vasega faauu, o loo faatonutonuina e Iesu le seleselega faaleagaga i o tatou aso, ma e na te faia i ona soo e tusa ma le mea e loto i ai. Pe afai e finagalo Ieova ma Iesu e la te faia se mea e sili mo isi, e leai se mea sesē ua la faia iā te oe. Ia taulaʻi i mea ua e maua, ae aua le avea “totogi” ua maua e isi e faavaatuʻia ai lou faia o le galuega ua tuuina atu e Ieova.
Mea na Tutupu ma Faatalanoaga
E talaʻi faatasi le ʻauaʻoʻoga o Kiliata ma faapotopotoga o Molimau a Ieova i o latou vaipanoa, pe afai e lē o i le aʻoga pe faia ni mea aʻoga. Sa faatalanoa e Sam Roberson o se faiaʻoga o Kiliata nisi o le ʻaufaauu e tusa o mea na tutupu iā i latou i le talaʻiga. O se faataʻitaʻiga, na fetaui le tuafafine o Alessandra Kirchler, ma se fafine e popole lava ona o le ulaula o lana tama tama. Na foʻi Alessandra e toe asi ma ave se Awake! o loo iai le mataupu i le ulaula. E leʻi maua atu se isi i le fale, ae na tuu e le tuafafine le mekasini. Na feiloaʻi Alessandra ma le fafine mulimuli ane ma ia valaaulia ai o ia e alu atu i totonu. Na fiafia le fafine i le mekasini ma fai mai, “E masani ona ou fia iloa po o le ā se mea ou te aʻoaʻoina mai mala ua aumai e le Atua iā te aʻu.” Na faasino i ai e Alessandra mai i le Tusi Paia, e lē o le Atua le pogai o mea leaga ua tutupu iā i tatou. (Iakopo 1:13) O loo faia se suʻesuʻega a le fafine ma lana tama i le taimi nei.
E toʻatolu nisi sa aʻoʻoga muamua i Kiliata sa faatalanoa e Melvin Jones, o sē e galue i le Matagaluega o le Auaunaga: o Jon Sommerud, e auauna i Alepania; o Mark Anderson, e auauna i Kenya; ma James Hinderer, e galue i le Matagaluega o Aʻoga Faatiokarate. Na ioe uma i latou, o loo aʻoaʻoina i le aʻoga o Kiliata upu moni faavae o le Tusi Paia ma le auala e faatatauina ai, e tusa lava po o ā tulaga ma atunuu e ō mai ai le ʻauaʻoʻoga.
Ona faitauina lea e se tasi o le ʻaufaauu se tusi e faaalia ai lo latou talisapaia o le aʻoga. Na faaiʻu e John Barr, o le sui e pito i matua o le Vaega Pule ua 96 ona tausaga, le polokalame i le talosagaina o le faamanuia a Ieova i le vasega lona 128 o le aʻoga o Kiliata.
[Siata/Faafanua i le itulau 31]
FAAMAUMAUGA O LE VASEGA
8 atunuu o sui auai
54 le ʻaufaauu
27 ulugalii
35.2 faatatauga o tausaga
19.1 faatatauga o tausaga papatiso
13.8 faatatauga o tausaga paeonia
[Faafanua]
(Tagaʻi i le lomiga mo le ata atoa)
ATUNUU UA TOFIA I AI MISIONARE
Ua taʻua i lalo atunuu e 25 o loo galulue ai le ʻaufaauu:
HONDURAS
GUATEMALA
NICARAGUA
DOMINICAN REPUBLIC
ARUBA
GUYANA
ECUADOR
POLIVIA
PARAGUAY
LATVIA
ROMANIA
KOSOVO
SERBIA
ALEPANIA
GUINEA
LIBERIA
CÔTE D’IVOIRE
GHANA
NAMIBIA
RWANDA
MADAGASCAR
MONGOLIA
TAIWAN
CAMBODIA
INITONESIA
(SE ATUNUU O LOO VAAVAAIA E LE LĀLĀ O AUSETALIA)
[Ata i le itulau 30]
Ua toe faataʻitaʻi e le ʻaufaauu o Kiliata se mea na tupu i le talaʻiga
[Ata i le itulau 31]
Vasega Faauu Lona 128 o le Aʻoga Faale-Tusi Paia a le Olomatamata o Kiliata
I le lisi o i lalo, e faanumera laina mai i luma i tua, ma o suafa e lisi mai i le agavale i le taumatau.
(1) Keller, E.; Ostopowich, I.; Jacobsen, S.; Arias, M.; Dieckmann, Y.; Tanaka, J.; Harada, K.
(2) Camacho, L.; Kirchler, A.; Rodríguez, S.; Ward, B.; Trenalone, K.; Victoria, V.; Oxley, F.; Nguyen, K.
(3) Oxley, O.; De Dios, A.; Lindström, C.; Allen, J.; Meads, T.; Waddington, J.; Victoria, E.
(4) Harada, H.; Lindström, A.; Orsini, E.; Logue, D.; Missud, T.; Bergeron, S.; Camacho, G.; Ward, T.
(5) Kirchler, W.; Nguyen, H.; Kremer, E.; Burgaud, C.; Titmas, N.; De Dios, C.; Rodríguez, A.; Waddington, M.
(6) Dieckmann, J.; Allen, C.; Titmas, R.; Arias, J.; Bergeron, E.; Keller, J.; Ostopowich, F.; Burgaud, F.
(7) Tanaka, K.; Kremer, J.; Jacobsen, R.; Trenalone, J.; Logue, J.; Meads, D.; Missud, D.; Orsini, A.