Ua Fesili Mai le ʻAufaitau . . .

Pe e Fai e Molimau a Ieova Faamālōlōga Faavavega?

▪ E leʻi faia lava e Molimau a Ieova ni faamālōlōga faavavega. E latou te ioe e pei o Iesu, o la latou galuega autū o le talaʻia atu lea o le tala lelei o le Malo o le Atua. E latou te ioe foʻi e lē o faamālōlōga faavavega e iloa ai Kerisiano moni, ae o se isi mea e sili atu ona tāua.

E moni e tāua iā i tatou uma le faamālōlōina ma le alofa e Iesu Keriso o ē mamaʻi i le uluaʻi senituri T.A. O na vavega ua ia faaalia mai ai, i lana pulega o le Tupu o le Malo o le Atua, “e lē fai mai foʻi se tasi ua nofo ai: ‘Ou te maʻi.’”—Isaia 33:24.

Ae faapefea aso nei? Ua fai mai le ʻaufaifaamālōlōga i lotu ua taʻua o Kerisiano ma nisi lotu e lē o ni Kerisiano, e latou te faia faamālōlōga faavavega. Peitaʻi na matuā lapataʻi mai Iesu e uiga i ē o le a faapea mai, o lona igoa na latou “fai ai vavega e tele.” O le a faapea atu o ia iā i latou: “Ou te leʻi iloa lava outou; inā ō ese ia outou iā te aʻu, o outou o ē fai amio leaga.” (Mataio 7:22, 23, Tusi Paia Samoa—Faaliliuga o le 1969) Po o gaoioiga la a le ʻaufaifaamālōlōga i aso nei ia e manatu i ai o ni vavega, o se faailoga lea o le finagalo malie po o le faamanuia a le Atua?

Seʻi iloilo faamatalaga a le Tusi Paia e uiga i faamālōlōga na faia e Iesu. O le faatusatusa o na faamatalaga ma auala o loo fai e le ʻaufaifaamālōlōga i aso nei, e vave ai lava ona tatou iloa pe e mai i le Atua na faamālōlōga.

E leʻi faia e Iesu faamālōlōga ina ia faatosina mai ai le toʻatele o tagata. Auā na ia faia le tele o faamālōlōga e lē o vaavaai atu nisi. O le tele o taimi na ia fai atu i ē na ia faamālōlōina, ia aua nei taʻuina i se tasi le vavega.—Luka 5:13, 14.

E leʻi tāpā e Iesu se totogi o ana vavega. (Mataio 10:8) Ma sa taulau manuia ana vavega uma. Na faamālōlōina atoatoa tagata mamaʻi uma na ō atu iā te ia, ma e leʻi faalagolago le faamālōlōina i le faatuatua o le tagata. (Luka 6:19; Ioane 5:5-9, 13) Auā e oo lava i ē ua maliliu na toe faatutūina e Iesu!—Luka 7:11-17; 8:40-56; Ioane 11:38-44.

E ui lava na faia e Iesu na vavega, ae e lē o le autū o lana faiva o le liliuina o tagata i le faa-Kerisiano, e ala i ni sauniga e faagaee ai faalogona ona o le faia o vavega. Ae o lana galuega autū o le talaʻia atu o le tala lelei o le Malo o le Atua. Na faamaopoopo e Iesu ona soo ina ia faia isi ma soo, o ē o le a aʻoaʻo atu i isi le faamoemoe o le mauaina o le ola mālōlōina atoatoa, i lalo o le pulega a le Malo o le Atua.—Mataio 28:19, 20.

Sa iai i nisi o soo o Iesu i le uluaʻi senituri meaalofa faapitoa o le faia o faamālōlōga, ae na iai le taimi na muta ai. (1 Korinito 12:29, 30; 13:8, 13) E lē o le faia o faamālōlōga ua iloa ai Kerisiano moni i aso nei, ae o le fusi o le alofa lē manatu faapito. (Ioane 13:35) E lē o faia e le ʻaufaifaamālōlōga i aso nei se aiga moni o Kerisiano mai i atunuu ma talaaga uma, o ē ua fusia i lenā alofa.

Peitaʻi, e iai Kerisiano ua matuā autasia i le fusi o le alofa, lea e latou te lē fia faia ai se mea leaga i se isi Kerisiano po o se isi lava tagata, e tusa po o le ā le vevesi o fetauaʻiga a tagata. O ai i latou na? O Molimau a Ieova. Ua lauiloa i latou i le lalolagi aoao i le faaalia o le alofa e pei o Keriso. Ua pei o se vavega le autasia o tagata e eseese o latou lanu, atunuu, aganuu ma ituaiga, ma ua mafai ona o le agaga paia o le Atua. Aiseā e te lē auai ai i se tasi o a latou sauniga ma vaaitino i lenā mea?

[Ata i le itulau 13]

Po o lagolagoina e le Atua le ʻaufaifaamālōlōga (ata i le itu taumatau) i aso nei?