O Fea e Iai le Parataiso ua Ta‘ua i le Tusi Paia? — Lomiga Faale-Tusi Paia I LE INITANETI

Ua Fesili Mai le ʻAufaitau . . .

O Fea e Iai le Parataiso ua Taʻua i le Tusi Paia?

▪ Na folafola atu e Iesu i se tamāloa ua lata ina oti, o lē na lototele e faailoa atu lona faatuatua iā te ia: “O le a ta faatasi ma oe i le Parataiso.” (Luka 23:43) O fea o le a iai le tamāloa? O fea o le a iai le Parataiso, o le lagi, lalolagi, po o se isi nofoaga e faatalitali ai tagata i le faamasinoga?

Sa ola o tatou uluaʻi mātua i le Parataiso. Ua taʻua i le Tusi Paia: “Ua totōina foʻi e Ieova le Atua le faatoʻaga i Etena i le itu i sasaʻe, ona ia tuu ai lea i inā o le tagata na ia faia. Ona ave lea e Ieova le Atua o le tagata ma tuu o ia i le faatoʻaga o Etena e galueaʻiina ma tausia.” (Kenese 2:8, 15) Ina ua faaliliuina na upu i le gagana Eleni, na faaliliuina le upu “faatoʻaga” i le pa·raʹdei·sos, lea e maua mai ai le upu “parataiso.”

E pei ona faatelē e se ulugalii lo la fale pe a toʻatele le fanau, sa tatau foʻi la ona faalautele atu e o tatou uluaʻi mātua le Parataiso i tala atu o Etena, a o faatoʻateleina tagata. Na fetalai mai le Atua iā i laʻua: ‘Ia faatumu le lalolagi ma ia galueaʻiina.’—Kenese 1:28.

O le finagalo la o Lē na faia i tatou, ia ola tagata ma fanafanau i le Parataiso i inei i le lalolagi. Ia latou ola e faavavau i se lalolagi matagofie e aunoa ma ni fanuatanu. E tatau ona avea le lalolagi ma aiga tumau o tagata uma. E lētioa ona tatou matuā fiafia i vaaiga matagofie uma o loo iai i lenei lalolagi! Na faia i tatou ia soifua i se lalolagi matagofie.

Po ua suia le finagalo o le Atua? E leai. Auā ua faamautinoa mai e Ieova iā i tatou: “E faapea foʻi laʻu upu e alu atu mai i loʻu gutu. E lē foʻi fua mai iā te aʻu, ae e faia le mea ou te fiafia i ai.” (Isaia 55:11) I le silia i le 3,000 tausaga talu ona faia le tagata, na taʻua ai i le Tusi Paia e uiga i “le Mataisau o Lē na faia le lalolagi,” e faapea “na ia lē foafoaina fua ae na ia faia ina ia ʻainā.” (Isaia 45:18) E lē o suia le finagalo o le Atua. E mautinoa o le a avea le lalolagi ma parataiso.

O le mea mataʻina, o le tele o mau o le Tusi Paia e uiga i le Parataiso, o ni faamatalaga e uiga i le olaga i le lalolagi. O se faaaʻoaʻoga, ua taʻua i se valoaga i le Isaia: “O le a latou fausia fale ma nonofo ai; e latou te totō foʻi togāvine ma latou aai i ona fua.” (Isaia 65:21) O fea e fau ai fale ma totō ai togāvine? O fea e aai ai fua o laau? I le lalolagi. Ua taʻua i le Faataoto 2:21: “O ē e amio saʻo e latou te mau i le lalolagi.”

Na fetalai foʻi Iesu e uiga i se parataiso i le lalolagi. E moni na ia valoia se parataiso i le lagi, ae e na o se vaega toʻaitiiti o tagata e ola ai. (Luka 12:32) Pe a maliliu i latou nei, o le a toe faatutūina aʻe i le Parataiso i le lagi ma pule mai faatasi ma Keriso, i le Parataiso i le lalolagi. (Faaaliga 5:10; 14:1-3) O i latou nei e pule faatasi ma Iesu i le lagi, e latou te faamautinoa ua pulea lelei le Parataiso i le lalolagi, ma tausia e tusa ai ma tulafono a le Atua.

Na iloa lelei e Iesu o le finagalo lenei o le Atua mo le lalolagi. Auā na la faatasi ma lona Tamā i le lagi ina ua faia le faatoʻaga i Etena. E mafai e tagata faatuatua uma i aso nei ona ola i se parataiso i le lalolagi i le lumanaʻi. (Ioane 3:16) Ua folafola mai e Iesu iā i latou taʻitoʻatasi: “O le a ta faatasi ma oe i le Parataiso.”—Luka 23:43.

[Ē Ana le Ata i le itulau 25]