Ia E Nofosauni!

“Ia outou nofosauni . . . , auā o le itula tou te lē manatunatu ai, e sau ai le Atalii o le tagata.”—MATA. 24:44.

1, 2. (a) O ā mea o le a tutupu ua valoia i le Tusi Paia ua faatusa i se osofaʻiga a se taika? (e) E faapefea ona aafia ai oe i le osofaʻiga o le a oo mai?

E TELE tausaga na faafiafiaina ai tagata e se tagata lauiloa, e ala i le taaalo ma ana taika mai i Initia ua aʻoaʻoina lelei. Na ia taʻua: “Pe a lata se meaola iā te oe, e te lagona o se mea e matuā faafiafiaina ai.” Ae na suia lenā tulaga iā Oketopa 3, i le 2003. E aunoa ma se māfuaaga, na osofaʻi o ia ma ʻai e se tasi o ana manu, o se taika paʻepaʻe e 380 pauna (172 kilokalama). E leʻi faatalitalia lenā tulaga ma e leʻi nofosauni foʻi lea tamāloa.

² O le mea mataʻina, ua valoia i le Tusi Paia le osofaʻiga a se “manufeʻai,” ma e ao ona tatou nofosauni i ai. (Faitau le Faaaliga 17:15-18.) O ai e osofaʻia e lenei manufeʻai? I se suiga e faateʻia ai, o le a fevaevaeaʻi le lalolagi a le Tiapolo. Ua faaāta mai e le manufeʻai lanu mūmū sesega Malo Aufaatasi, a o “seu e sefulu” ua faaāta mai ai faigāmalo uma. O le a latou faasagatau atu ma matuā faaumatia Papelonia le Aai Tele ua pei o se fafine talitane, o lotu sesē uma i le lalolagi. O afea e tupu ai lenei mea? E tatou te lē iloa le aso ma le itula. (Mata. 24:36) Ae e tatou te iloa e oo mai i se itula e lē faatalitalia, ma ua itiiti le taimi o totoe a o leʻi tupu lenei osofaʻiga. (Mata. 24:44; 1 Kori. 7:29) E tāua ona tatou nofosauni pea i le itu faaleagaga, ina ia avea Keriso ma o tatou Faaola pe a tupu lenā osofaʻiga, ma afio mai o le Faaoosala. (Luka 21:28) Ua tatou iloa le auala e nofosauni ai, mai i auauna faamaoni a le Atua, o ē na nofosauni ma vāaitino i le faataunuuina o folafolaga a le Atua. Po o le a tatou teulotoina nei tala moni?

Ia E Nofosauni e Pei o Noa

3. O ā luʻi na feagai ma Noa a o auauna ma le faamaoni i le Atua?

³ E ui lava i tulaga matuā leaga na taatele i aso o Noa, ae na nofosauni o ia mo le taimi e faataunuu ai folafolaga a le Atua. Seʻi manatu i luʻi na feagai ma Noa ona o agelu fouvale na liutino tagata ma faia feusuaʻiga ma fafine lalelei! O nei feusuaʻiga na fananau mai ai tagata tinoeese na taʻua o ē “malolosi,” ma na faaaogā lo latou malosi e sili atu e sauāina ai isi. (Kene. 6:4) Seʻi manatu i sauāga na tutupu a o faia solo mea leaga e nei tagata tinoeese. O lea na matuā taatele ai le amioleaga ma faaleagaina ai mafaufauga ma amioga a tagata. Ona faatulaga lea e Ieova o le Alii Pule Silisili Ese, se taimi e faaumatia ai na tagata amioleaga.—Faitau le Kenese 6:3, 5, 11, 12.a

4, 5. O ā auala e tutusa ai o tatou aso ma aso o Noa?

⁴ Na valoia e Iesu o le a pei o tatou aso o aso o Noa. (Mata. 24:37) O se faaaʻoaʻoga, ua tatou vaaia taaʻiga leaga a agelu leaga. (Faaa. 12:7-9, 12) Na liutino tagata nei agelu po o temoni i aso o Noa. E ui lava e lē o toe faatagaina ona latou toe liutino tagata, ae o loo taumafai pea e pulea olaga o ē laiti ma ē matutua. E lē o iloa e tagata, e fiafia tele nei agelu leaga i amioga matagā tau feusuaʻiga, ma gaoioiga matuā leaga a ē ua pulea i a latou taaʻiga i le lalolagi.—Efe. 6:11, 12.

⁵ O loo faamatalaina le Tiapolo i le Afioga a le Atua, o le “fasioti tagata” ma “o lē ua iai le malosi e faaoo ai le oti.” (Ioa. 8:44; Epe. 2:14) Ae e gata mai lona mana pe a oo i le fasiotia tuusaʻo o tagata. Peitaʻi, e na te uunaʻia tagata e fai mea e latou te mafatia ma maliliu ai. E na te totō foʻi uiga fia fasioti tagata i manatu ma loto o tagata. O se faaaʻoaʻoga, e 1 mai i le 142 o tamaiti e fananau i Amerika, o le a iʻu ina fasiotia. Sa matuā amanaʻia e Ieova mea leaga i aso o Noa, ma ona o le taatele o faiga sauā lē mafaufau i aso nei, pe e te manatu la e na te lē o faia faapea i o tatou aso? Po o le a leai se gaoioiga e faia e Ieova?

6, 7. Na faaalia faapefea e Noa ma lona aiga le faatuatua ma le mataʻu i le Atua?

⁶ Mulimuli ane, sa faailoa mai e le Atua iā Noa lona finagalo ia faaoo mai le lolo ma fano ai ola uma i le lalolagi. (Kene. 6:13, 17) Na faatonu e Ieova Noa ia fau se vaa e pei o se pusa telē. Ona amata loa lea ona galulue Noa ma lona aiga. O le ā na fesoasoani iā i latou e usiusitaʻi ma nofosauni ai i le taimi e faaoo mai ai le faasalaga a le Atua?

⁷ O le faatuatua ma le mataʻu i le Atua na uunaʻia ai Noa ma lona aiga e usitaʻia poloaʻiga a le Atua. (Kene. 6:22; Epe. 11:7) Talu ai o ia o le ulu o le aiga, na mataala ai faaleagaga Noa ma ʻalofia amioga leaga a tagata na ola i na aso. (Kene. 6:9) Sa ia iloa e tatau ona puipuia lona aiga mai i le mulimuli i amioga sauā ma uiga fouvale o tagata. Sa lē tatau ona latou faamuamua mea masani o le olaga. Sa tuu atu e le Atua iā i latou se galuega e fai, ma sa tatau ona faamuamua i o latou olaga.—Faitau le Kenese 6:14, 18.

Sa Nofosauni Noa ma Lona Aiga

8. E faapefea ona iloa na tapuaʻi le aiga o Noa i le Atua?

⁸ O loo taulaʻi atu le tala a le Tusi Paia iā Noa, o le ulu o le aiga, ae na tapuaʻi foʻi lana avā ma ona atalii ma a latou avā iā Ieova. Sa faamaonia e le perofeta o Esekielu lenei tulaga. Na ia taʻua pe ana ola Noa i aso o Esekielu, e lē faasaoina lana fanau i le amiotonu a lo latou tamā. Sa mafai lava ona usiusitaʻi pe lē usiusitaʻi foʻi lana fanau. O lea la, sa alolofa lana fanau i le Atua ma ona ala. (Eseki. 14:19, 20) Sa talia e le aiga o Noa ana faatonuga, tutusa o latou talitonuga, ma e leʻi avea taaʻiga a isi ma itu e taofia ai le latou galuega mai i le Atua.

9. O ai i aso nei o loo faaaʻoaʻo i le faatuatua o Noa?

⁹ O se faalaeiauga i aso nei le iloaina o loo iai ulu o aiga i lo tatou ʻauuso i le lalolagi aoao, o loo finafinau e faaaʻoaʻo iā Noa! Ua latou iloa e lē lava le tau ina saunia o meaʻai, lavalava, fale ma aʻoaʻoga mo o latou aiga. E tatau foʻi ona latou tausia le itu faaleagaga o o latou aiga. O le faia faapea, e iloa ai ua latou nofosauni mo mea ua lē o toe umi ona faia lea e Ieova.

10, 11. (a) E lē taumatea o ā lagona o Noa ma lona aiga a o iai i le vaa? (e) O le ā le fesili e lelei ona fesili ifo ai iā i tatou lava?

¹⁰ Pe tusa ma le 50 tausaga na fau ai e Noa ma lona aiga le vaa. Manatu i galuega fitā uma sa latou faia. Na latou puluti le vaa i le ta, laʻu i totonu meaʻai ma ave i ai meaola. E lē taumatea e tele taimi na latou ō atu ai i totonu o le vaa ma toe ō mai i fafo. Ina ua māeʻa nei galuega uma, ona oo mai loa lea o le lolo i le aso lona 17 o le masina lona lua, i le 2370 T.L.M. Manatu i le mea na tupu. Na latou ō atu i totonu o le vaa i lenā aso ma nonofo ai. Na tapuni e Ieova le faitotoʻa o le vaa ma amata loa ona timu. E lē o se lologa e masani ai. Na matala ma toʻulu malolosi mai i luga o le vaa, vai na i luga aʻe o le vanimonimo. (Kene. 7:11, 16) Sa feoti tagata e leʻi iai i totonu o le vaa, ae na faasaoina ē na iai i totonu. O ā ni lagona o le aiga o Noa? E mautinoa na latou matuā lotofaafetai i le Atua. Ma e lē taumatea na latou manatu, ‘Se mea ina a lelei o lo tatou savavali faatasi ma le Atua moni ma nofosauni!’ (Kene. 6:9) Pe mafai ona e faaāta ua e sao atu mai i le taua iā Amaketo, ma ua e matuā lotofaafetai foʻi?

¹¹ E leai se mea e mafai ona taofia ai Lē e ona le malosi uma lava, mai i le faataunuuina o lana folafolaga e faamuta lenei faiga o mea a Satani. Ia fesili ifo iā te oe lava, ‘Po o ou talitonu ma le mautinoa e leai se folafolaga a le Atua e lē faataunuuina, e oo lava i ni nai mea laiti, ma e faataunuuina uma i lana taimi atofaina?’ Pe afai o lea, ia e nofosauni e ala i le manatua pea e vave ona oo mai le “aso o Ieova.”—2 Pete. 3:12.

Sa Mataala Pea Mose

12. O ā mea sa ono mafai ona afāina ai le vaaiga faaleagaga a Mose?

¹² Seʻi o tatou talanoa i se isi faaaʻoaʻoga. E foliga mai sa manuia le tulaga faaletino o Mose i Aikupito. Talu ai na fai o ia ma tamafai a le afafine o Farao, e mautinoa la sa faaaloalogia tele o ia ma maua meaʻai ma ofu e sili ona lelei, ma nofo i se maota e matuā matagofie. Sa lelei ana aʻoaʻoga. (Faitau le Galuega 7:20-22.) Atonu foʻi sa ia ono mauaina se tofi tāua.

13. Sa faapefea ona taulaʻi atu pea Mose i folafolaga a le Atua?

¹³ Sa tapuaʻi tagata Aikupito i tupua, ae na iloa e Mose e valea lenā faiga, auā sa aʻoaʻoina o ia e ona mātua ua na o Ieova o le Atua moni. (Eso. 32:8) E leʻi avea aʻoaʻoga i Aikupito ma mea matagofie i le maota o le tupu, ma itu na lafoaʻia ai e Mose le tapuaʻiga moni. Sa manatunatu loloto o ia i folafolaga a le Atua i ona augātamā, ma na maumauaʻi e nofosauni e fai le finagalo o le Atua. Auā na faapea atu Mose iā Isaraelu: “Ua auina mai aʻu iā te outou e Ieova . . . le Atua o Aperaamo, le Atua o Isaako, ma le Atua o Iakopo.”—Faitau le Esoto 3:15-17.

14. Na faapefea ona tofotofoina le faatuatua ma le lototele o Mose?

¹⁴ E ese mai i faatusa o atua pepelo o Aikupito, sa moni iā Mose Ieova le Atua. Sa ola o ia e pei lava o loo mafai ona vaai atu i “Lē e lē o vaaia.” Sa faatuatua Mose o le a faasaʻolotoina tagata o le Atua, ae e na te leʻi iloa po o afea. (Epe. 11:24, 25, 27) Sa iloa lona matuā naunau e faasaʻoloto tagata Eperu, e ala i le puipuia o se pologa Isaraelu na faileagaina. (Eso. 2:11, 12) Peitaʻi, e leʻi oo i le taimi a Ieova e faasaʻoloto ai i latou, o lea na fesolasolataʻi ai Mose i se nuu mamao. E mautinoa sa matuā faigatā iā te ia ona ola i lea taimi i le toafa, a ua leva ona nofo i le maota matagofie o le tupu i Aikupito. E ui i lea, sa nofosauni Mose e ala i le usitaʻia o faatonuga uma a Ieova. O lea la, ina ua mavae le 40 tausaga na nofo ai i Mitiana, sa faaaogā o ia e le Atua e avatu le mapusaga i ona uso. Ina ua faatonuina e le Atua, na usitaʻi Mose ma toe foʻi i Aikupito. Ua oo i le taimi e faia ai e Mose le mea na poloaʻi mai ai le Atua, ma ia faia le galuega a le Atua i le auala ua finagalo i ai. (Eso. 3:2, 7, 8, 10) Ina ua toe foʻi i Aikupito, sa manaʻomia e Mose, “le tagata e sili ona agamalu i tagata uma,” ona faatuatua ma lototele ina ia tū ai i luma o Farao. (Nu. 12:3) E lē tasi se taimi, ae na ia faia faapea i le tele o taimi a o tutupu mala, e aunoa ma le iloaina pe fia mala o le a tutupu ma manaʻomia ai ona tū i luma o Farao.

15. Aiseā na nofosauni ai pea Mose mo avanoa e faamamaluina ai lona Tamā i le lagi, e ui i mea na faanoanoa ai?

¹⁵ I le 40 tausaga na sosoo ai, mai i le 1513 T.L.M. e oo i le 1473 T.L.M., na feagai ai Mose ma mea e faanoanoa ai. Peitaʻi, sa ia saʻilia avanoa e faamamaluina ai Ieova ma matuā faalaeiau ona uso Isaraelu e faia faapea. (Teu. 31:1-8) Aiseā? Auā sa sili ona tāua iā te ia le pule silisili ese ma le suafa o Ieova, i lo lona lava igoa. (Eso. 32:10-13; Nu. 14:11-16) E ui i mea e faanoanoa ma faavaivaia ai, ae ia tatou lagolagoina pea le pulega a le Atua, i le mautinoa e sili atu ona atamai, tonu ma lelei ana auala e faatautaia ai mea i lo se isi. (Isa. 55:8-11; Iere. 10:23) Po o lou lagona lenā?

Ia Mataala Pea!

16, 17. Aiseā e tāua tele ai iā te oe upu o loo i le Mareko 13:35-37?

¹⁶ “Ia vaavaai pea, ia mataala pea, auā tou te lē iloa le taimi atofaina.” (Mare. 13:33) Na avatu e Iesu lenā lapataʻiga ina ua talanoaina le faailoga e iloa ai le taufaaiʻuiʻuga o lenei faiga amioleaga o mea. Seʻi manatu i upu faaiʻu o le valoaga a Iesu na tusia e Mareko: “Ia faaauau ona mataala, auā tou te lē iloa pe e sau afea le matai o le aiga, po o le afiafipō, po o le vaeluapō, po o le vivini o moa po o le taeaopō; ina neʻi taunuu faafuaseʻi mai o ia ma maua mai outou o loo momoe. A o aʻu upu ou te fai atu ai iā te outou, ou te fai atu ai foʻi i tagata uma, Ia faaauau ona mataala.”—Mare. 13:35-37.

¹⁷ E faatupu manatu le apoapoaʻiga a Iesu. Sa ia faasino atu i leoleoga eseese e fā i le pō. E faigatā tele ona mataala i le leoleoga faaiʻu, auā e amata mai pe tusa o le tā o le tolu i le vaveao e oo atu i le oso aʻe o le lā. E manatu tagata e popoto i faigātaua, o le taimi lenei e sili ona lelei e osofaʻi ai le fili, auā o le taimi tonu lenā e maua atu ai i latou o loo “momoe.” Talu ai ua matuā momoe faaleagaga le lalolagi i aso nei, e ono faigatā ai foʻi iā i tatou ona mataala pea. Peitaʻi, e ao ona tatou “mataala pea” ma “vaavaai pea” mo le iʻuga ma lo tatou faaolataga.

18. I le avea ai ma Molimau a Ieova, o le ā le faaeaga e lē mafaatusalia ua tatou maua?

¹⁸ E leʻi oti le tagata e aʻoaʻoina manu lea na taʻua muamua, ina ua osofaʻia ma ʻai e le taika mai i Initia. Ae ua faaalia ma le manino i le valoaga a le Tusi Paia, pe a oo mai le iʻuga, o le a lē sao lotu sesē po o isi mea uma o lenei lalolagi amioleaga. (Faaa. 18:4-8) Tau ina ia iloa e auauna uma a le Atua, o ē laiti ma ē matutua, le tāua o le faia o mea uma e latou te mafaia ina ia nofosauni ai i le aso o Ieova, e pei ona faia e Noa ma lona aiga. Ua tatou ola i se lalolagi e lē matataʻu i le Atua, ua faalumaina ai e aʻoaʻo o lotu sesē ma ē e lē talitonu i le Atua, Lē na faia mea e ala i a latou upu, ae e lē tatau ona tatou aafia ai. Tau ina ia manatua faaaʻoaʻoga na talanoaina, ma ia nofosauni mo avanoa e lagolagoina ma faamamaluina ai Ieova “le Atua o atua,” ma “o le Atua silisili, e malosi, ma mataʻutia.”—Teu. 10:17.

[Faamatalaga faaopoopo]

Pe E te Manatua?

• Aiseā na faamuamua ai e Noa le itu faaleagaga o lona aiga?

• E faapefea ona tutusa o tatou aso ma aso o Noa?

• Aiseā na taulaʻi atu ai pea Mose i folafolaga a Ieova, e ui i mea na faanoanoa ai?

• O ā valoaga a le Tusi Paia e uunaʻia ai oe e mataala pea faaleagaga?

[Ata i le itulau 25]

Sa taulaʻi atu Noa ma lona aiga i le galuega a Ieova

[Ata i le itulau 26]

Sa aogā folafolaga mautinoa a le Atua e mataala ai pea Mose