Ia Mafuta Atu i le Atua
Faamāfanafanaga mo Ē Loto Momomo
NA TAʻUA e se fafine Kerisiano o lē na feagai ma le lotomafatia i lona olaga atoa: ʻE lē taitai ona alofa mai Ieova iā te aʻu.’ Na manatu o ia ua mamao ese Ieova mai iā te ia. Ae pe moni ea o loo taumamao Ieova mai i ona tagata tapuaʻi o loo maua i le lotomafatia? E maua le tali faamāfanafanaloto i upu a le faisalamo o Tavita i le Salamo 34:18.
Na malamalama lelei Tavita i āuga e oo i se tagata tapuaʻi faamaoni a Ieova pe a feagai ma mafatiaga. A o talavou Tavita, sa fesolasolataʻi ona sa tulituliloa e le tupu lotoleaga o Saulo ina ia fasiotia. Na sulufaʻi atu o ia i le aai o Kata i Filisitia, o se nofoaga na manatu e lē oo atu i ai le saʻiliga o ia e Saulo. Ae ina ua iloa Tavita e le nuu o Kata, na faafoliga atu e Tavita ua leaga lona ulu ma latou lē fasiotia ai o ia. Na viia ai e Tavita Ieova i lona laveaʻiina o ia, ma ia tusia ai le Salamo e 34.
Pe na talitonu Tavita ua faamamao ese le Atua mai ē mafatia, ma manatu ai ua tuulafoaʻia ma lē aogā i latou i le silafaga a le Atua? Na tusi Tavita: “E latalata mai Ieova iā i latou o ē e loto momomo; ma e faaola e ia i latou o ē ua loto nutimomoia.” (Fuaiupu 18) Seʻi vaai pe faapefea ona faamāfanafanaina i tatou i na upu ma maua ai le faamoemoe.
“E latalata mai Ieova.” O loo faamatalaina lenei faaupuga e se tasi o lomifefiloi e faapea, “o loo faamatala ai le Alii o sē e mataala ma ua nofosauni e fesoasoani mai e laveaʻiina ona tagata.” O se faalaeiauga le iloa o loo leoleoina e Ieova ona tagata. E na te silafia faafitauli o loo latou fesagaʻia i nei “aso e sili ona faigatā,” ma malamalama i o latou faalogona loloto.—2 Timoteo 3:1; Galuega 17:27.
“O ē e loto momomo.” I nisi aganuu, e faatatau le faaupuga “loto momomo” i le alofa faamamaʻi i se isi, ae e lē o ano mai i ai lenā tagata. Ae na taʻua e se tagata poto, o loo faatatau upu a le faisalamo i “lagona faavauvau ma le faanoanoa e masani ai.” Ioe, e feagai foʻi tagata tapuaʻi faamaoni o le Atua ma tulaga e sili ona faigatā, ma lagona ai le loto momomo.
“O ē ua loto nutimomoia.” O ē lotovaivai e ono manatu faatauvaa iā i latou lava, ma mou atu ai lo latou faamoemoe mo sina taimi. Ua faamatalaina lea faaupuga e se lomifefiloi mo le ʻau faaliliu o le Tusi Paia e faapea, “o ē e leai se mea lelei o faamoemoe i ai.”
O le ā le tali mai a Ieova i “ē e loto momomo” ma “loto nutimomoia”? Po o taumamao o ia mai iā i latou, ona e lē tatau ona alofa ma manatu mai fua iā i latou? E leai! Ae e pei Ieova o se matua alofa, o lē e opo ma faamāfanafana i lana tama ua mafatia, ma e lē taumamao foʻi mai i ona tagata tapuaʻi pe a ōle atu mo se fesoasoani. E naunau o ia e faamāfanafana ma faalaeiau i ē loto momomo ma loto nutimomoia. E na te foaʻi mai le atamai ma le malosi e manaʻomia a o latou feagai ai ma faigatā.—2 Korinito 4:7; Iakopo 1:5.
E lelei ona saʻili le auala e maua ai se mafutaga māfana ma Ieova. Ua folafola mai e lenei Atua alofa e faapea: “E ma te mau . . . ma lē ua nutimomoia ma faamaulalo, ina ia faafouina loto o ē ua faatauvaa ma faafouina loto o ē ua nutimomoia.”—Isaia 57:15.
Faitauga Tusi Paia mo Iuni: