4 E Lē Faimeatonu le Atua—Pe e Moni?
Aʻoaʻoga atonu na e faalogo i ai: “E pule le Atua i le lalolagi, ma o mea uma o loo tutupu e finagalo malie i ai o ia. E tuuaʻia la le Atua mo le faailogalanu, faiga lē tonu, ma mafatiaga lea ua tumu ai le lalolagi.”
Le aʻoaʻoga a le Tusi Paia: E lē faapogaia e le Atua faiga lē tonu o loo tutupu i le lalolagi. Ua faamatalaina Ieova i le Tusi Paia e faapea: “E atoatoa ona lelei ana gaoioiga, auā e tonu ona ala uma.”—Teuteronome 32:4.
E agalelei le Atua i tagata uma, e aofia ai ma ē e foliga mai e lē tatau i ai. O se faataʻitaʻiga, e “na te faaoso lona lā i ē e amioleaga ma ē e amiolelei, ma faatotō mai le timu i ē e amiotonu ma ē e amiolētonu.” (Mataio 5:45) E faimeatonu o ia i le auala e feagai ai ma tagata o ituaiga ma atunuu uma, e pei ona faaalia mai i le Galuega 10:34, 35: “E lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”
O le ā la le pogai o faiga lē tonu? E toʻatele tagata ua lē mulimuli i le faaaʻoaʻoga a le Atua o le faamasinotonu, ae ua latou filifili e gaoioi ma le lē tonu. (Teuteronome 32:5) Ua faailoa mai foʻi i le Tusi Paia, o loo faatagaina e le Atua lona fili le Tiapolo, ina ia pule i le lalolagi.a (1 Ioane 5:19) Peitaʻi, e lē o toe umi ona faamutaina lea e le Atua o lenei pulega faimea lē tonu. Ua uma ona ia faatulagaina le auala o le a ia “faalēaogāina ai galuega a le Tiapolo.”—1 Ioane 3:8.
Aogā o le iloaina o aʻoaʻoga moni: Atonu o loo e fenuminumiaʻi i le tele o faamatalaga e uiga i mea leaga, mafatiaga, ma faiga lē tonu. O le iloaina o le pogai o le faafitauli, o le a fesoasoani ai iā te oe e malamalama i le māfuaaga ua matuā leaga ai le tulaga o mea, ma le lē taulau pea o taumafaiga a tagata ina ia avea le lalolagi ma nofoaga lelei. (Salamo 146:3) Nai lo o le alu uma o le taimi ma le malosi e faia ai ni suiga e lē tumau, e mafai ona e mauaina se faamoemoe mo le lumanaʻi, e faavae i le faatuatua i folafolaga a le Atua.—Faaaliga 21:3, 4.
O le malamalama i le pogai moni o faiga lē tonu, o le a fesoasoani ai iā i tatou pe a feagai ma faigatā. Pe afai e tatou te feagai ma faiga lē tonu, atonu e tatou te alalaga atu e pei o le auauna a le Atua o Sapakuka e faapea: “Ua lē toe faamalosia ai le tulafono, ma ua lē faia ai foʻi le faamasinotonu.” (Sapakuka 1:4) E leʻi otegiaina Sapakuka e le Atua i lona faia faapea. Nai lo lea, na faamautinoa atu e le Atua i Lana auauna e faapea, ua Ia faatulagaina se taimi e faasaʻo ai mea, ma fesoasoani iā Sapakuka ina ia maua pea le fiafia e ui i faafitauli. (Sapakuka 2:2-4; 3:17, 18) I se tulaga tutusa, o le faatuatua i le folafolaga a le Atua o le a ia faasaʻoina faiga lē tonu, o le a fesoasoani ai iā te oe ina ia maua pea le toʻafimālie ma le filemu o le mafaufau, i se lalolagi o faiga lē tonu.
[Faaopoopoga i lalo]
a Ina ia iloa le māfuaaga ua iai le Tiapolo, tagaʻi i le mataupu e 3 o le tusi, O ā Aʻoaʻoga Moni a le Tusi Paia?
[Ata i le itulau 7]
Pe e tuuaʻia le Atua mo puapuaga ma faiga lē tonu?
[Ata i le itulau 7]
© Sven Torfinn/Panos Pictures