ʻFaaaloalogia Ona O le Tutūmausalī’
SA MAUAINA e Adolf Hitler le faitau sefulu afe o tusi a o avea o ia ma taʻitaʻi e sili ona leaga o Siamani. I le 1945, ina ua mavae le nofoia e le ʻau Rusia o le laueleele o loo siʻomia ai Perelini, ona avatu lea o le tele o nei tusi ma teuina i Moscow. Sa iloiloina e se tusitala o talafaasolopito o Henrik Eberle, le faitau afe o nei tusi sa maua i mea na teu ai faamaumauga i Moscow, ina ia mafai ai ona iloa po o ai na tusiaina nei tusi iā Hitila, ae po o ā foʻi māfuaaga. Na lomiaina e Eberle le iʻuga o ana suʻesuʻega i le tusi Briefe an Hitler (Tusi iā Hitila).
Na tusi Eberle: “O faiaʻoga ma tamaiti aʻoga, o taupousa ma faifeʻau, o tagata e lē faigaluega ma ē e maualuluga i faiga faapisinisi, o taʻitaʻi o fuāvaa ma ʻautau sauā—na latou tusi uma atu iā Hitila. Na faamamaluina e nisi o ia e faapea o le Mesia ua toe fanau mai, ae na manatu nisi, e matuā leaga mea uma e uiga iā te ia.” Pe na mauaina e Hitila ni tusi mai i taʻitaʻi lotu e tetee atu ai i sauāga matuā leaga, e māfua mai i Pulega Tautalatasi po o le ʻau Nasi? Na iai ni tusi, peitaʻi e leʻi tele.
Na maua e Eberle i mea na teu ai faamaumauga i Moscow, se faila o loo iai le tele o tusi na tusia e Molimau a Ieova mai i vaega eseese o Siamani, e tetee atu ai i gaoioiga a le ʻau Nasi. O le mea moni, e 20,000 tusi ma feʻau faauaealesi na auina atu e Molimau mai i atunuu e 50, e tetee atu ai i le sauāina o Molimau a Ieova. E faitau afe Molimau na faafalepuipuiina, ma e faitau selau na faasalaoti pe e maliliu foʻi ona o sauāga mai i le ʻau Nasi. Na faaiʻu mai le faamatalaga a Eberle e faapea: “Pe a manatu i le faitau miliona o tagata na sauāina e le pulega a le ʻau Nasi, e aliali mai e toʻaitiiti lava le aofaʻi o lenei vaega [Molimau na sauāina]. Peitaʻi, ua faamaonia e ao ona faaaloalogia i latou ona o le tutū faatasi ma le mausalī e tetee atu i pulega sauā a le ʻau Nasi.”