“E lē Atoatoa i le Taimi Nei [loʻu] Malosi, ae e lē Faavavau ai Pea!”

Ua Faamatalaina e Sara Van Der Monde

E masani ona fai mai tagata iā te aʻu, “Sara, e ese lou laumata fiafia. Aiseā e te fiafia tele ai i taimi uma?” Ou te taʻu atu iā i latou e iai soʻu faamoemoe faapitoa. E mafai ona faamatalaina loʻu faamoemoe i upu nei, “E lē atoatoa i le taimi nei loʻu malosi, ae e lē faavavau ai pea!”

SA OU fanau i Pale i Falani i le 1974. Sa iai ni faafitauli i le taimi na ou fanau mai ai, ma na mulimuli ane faailoa mai e le fomaʻi ua maua aʻu i se gasegase e māfua mai i se aafiaga i le faiʻai (cerebral palsy). Sa lē faigofie ona gaoioi oʻu lima ma vae, ma sa lē manino laʻu tautala. Sa ou maua foʻi i le maʻimāliu ma aafia i isi faamaʻi.

Ina ua lua oʻu tausaga, sa siitia atu lo matou aiga i Melepone i Ausetalia. I le lua tausaga mulimuli ane ai, na alu ese ai loʻu tamā ae tuua i maʻua ma loʻu tinā. O le taimi muamua lenā ou te manatua na ou lagona ai le vavalalata atu i le Atua. O loʻu tinā o se Molimau a Ieova, ma sa masani ona ia ave aʻu i sauniga faa-Kerisiano, ia na ou aʻoaʻoina ai e alofa ma tausia aʻu e le Atua. O le iloaina o lenā mea faatasi ai ma le alofa ma faalaeiauga a loʻu tinā, sa fesoasoani iā te aʻu e lagona ai le saogalemu, e ui ina suia le tulaga o mea mo i maʻua.

Sa aʻoaʻo foʻi aʻu e loʻu tinā i le auala e tatalo atu ai iā Ieova. O le mea moni, ua ou iloa e sili atu ona faigofie le tatalo nai lo o le talanoa. Pe a ou tatalo, e lē manaʻomia ona ou taumafai e faaleo atu upu, ae o loo manino lelei i loʻu mafaufau upu e ao ona fai atu. Ma ona e faigatā ona malamalama i laʻu tautala, o se faalaeiauga iā te aʻu le iloaina e malamalama Ieova i mea uma, e tusa lava pe e na ona ou mafaufau i ai pe tautoʻai foʻi laʻu tautala.—Sala. 65:2.

Fesagaʻi ma Faafitauli

E oo ane i le taimi ua lima oʻu tausaga, ua matuā faigatā ona ou savali, ma iʻu ai ina ou manaʻomia ni lapalapa faapitoa mo le faasaʻoina o vae ina ia savali ai. E tele lava ina lē saʻo laʻu savali! E 11 ane oʻu tausaga, ua lē mafai lava ona ou savali. Mulimuli ane, ua lē mafai ona ou alu i luga ma toe oso mai i lalo o le moega e aunoa ma le fesoasoani o se siligi e alu i le eletise, ina ia lifi ai aʻu i luga o loʻu nofoa faataavalevale e alu i se maa, lea ou te faatonutonuina.

Ou te taʻu saʻo atu e iai taimi ou te faanoanoa ai ona o le lē atoatoa o loʻu malosi. Peitaʻi, ou te toe manatua le faaupuga masani a lo matou aiga: “Aua le popole i mea e te lē mafai ona faia. Ia taulaʻi i mea e mafai ona e faia.” Ua fesoasoani lenei faaupuga iā te aʻu e faia ai mea e pei o le tiʻetiʻe solofanua, folau i le vaa, tiʻetiʻe i se paopao, tafao ma moe i se paka, ma aveave taavale faataamilo i se auala e tau lē pisi ai ni taavale. Ou te faailoa atu aʻu taleni tusiata e ala i le valiina o ata, suʻisuʻi, suʻi ʻie ufi moega, fai tolosē, ma gaosia mea mai i le omea.

Ona o le matuā lē atoatoa o loʻu malosi, ua fesiligia ai e nisi loʻu tomai e faia ai se filifiliga e tapuaʻi atu i le Atua. Ina ua 18 oʻu tausaga, sa uunaʻia aʻu e se faiaʻoga ia tuua loʻu aiga, ina ia saʻoloto ai mai le lotu a loʻu tinā. Sa oo lava foʻi ina fai mai e mafai ona fesoasoani iā te aʻu e suʻe se mea ou te nofo ai. Peitaʻi, sa ou taʻu atu iā te ia e lē taitai ona ou tuua loʻu faatuatuaga, ma e faatoʻā ou tuua loʻu aiga pe afai ua ou nofosauni e tausia aʻu lava.

E leʻi leva ona mavae lenā talanoaga ma le faiaʻoga, ae ou papatiso o se Molimau a Ieova. I le lua tausaga mulimuli ane ai, na ou siitia ai e nofo i se tamaʻi fale mautotogi. O lea ua ou maua ai se tulaga paleni, ou te maua le fesoasoani mai i isi, ae e mafai foʻi ona ou tausia aʻu lava.

Se Talosaga e Fia Faaipoipo e Leʻi Faatalitalia

A o faagasolo tausaga, sa ou fesagaʻi ma nisi o tulaga e tofotofoina ai loʻu faamaoni. I se tasi aso, na matuā faateʻia ai aʻu ina ua talosaga mai se tama e ma te aʻoʻoga faatasi, e lē atoatoa foʻi lona malosi, e fia faaipoipo iā te aʻu. I le taimi muamua, sa ou lagona le fiafia. I le pei o le toʻatele lava o teine talavou, ou te moomoo ia maua se tasi e faaipoipo i ai. Peitaʻi, e ui e tutusa o ma tulaga e lē atoatoa le malosi, ae e lē faapea ai o le a maua se faaipoipoga fiafia. E lē gata i lea, e lē tutusa o ma talitonuga ma lea tauleʻaleʻa. E matuā eseese lava o ma talitonuga, a ma mea e fai ma o ma sini. E mafai la faapefea ona ma nonofo faatasi? Sa ou maumauaʻi foʻi e usitaʻi i le faatonuga manino a le Atua ia faaipoipo tau o lē e tutusa talitonuga. (1 Kori. 7:39) O lea la, na ou faapea atu ma le agalelei i le tauleʻaleʻa, e lē mafai ona ou talia lana talosaga.

E oo mai lava i le asō, ou te iloa sa ou faia se filifiliga saʻo. Ma e lē taumatea o le a ou fiafia i le lalolagi fou ua folafola mai e le Atua. (Sala. 145:16; 2 Pete. 3:13) A o faatalitali i lenā taimi, ou te maumauaʻi e tumau ona faamaoni iā Ieova, ma lotomalie i tulaga ua ou iai i le taimi nei.

Ou te matuā naunau atu i le aso o le a mafai ai ona ou oso ese mai i loʻu nofoa faataavalevale ma tamoʻe saoasaoa. Ona ou alaga leotele atu lea, “Sa lē atoatoa loʻu malosi, ae o lea ua ou toe malosi, ma o le a malosi ai pea e faavavau!”