Ia Avea Taimi o Suʻesuʻega Totino ma Taimi e Olioli ai ma Maua ai Aogā
E faapefea ona tatou maua le olioli mai i le suʻesuʻeina o le Tusi Paia? E faapefea ona maua aogā mai i a tatou suʻesuʻega? Seʻi o tatou iloilo puupuu ni laasaga tāua se tolu, o le a fesoasoani iā i tatou e maua ai le tele o aogā mai i a tatou suʻesuʻega o le Tusi Paia.
1 TATALO: O le laasaga muamua e tatau ona fai, o le tatalo. (Sala. 42:8) Aiseā? E tatau ona tatou manatu i le suʻesuʻeina o le Afioga a le Atua o se vaega o la tatou tapuaʻiga. O lea la, ia tatou ōle atu iā Ieova ina ia aumai se mafaufau lelei ma foaʻi mai lona agaga paia. (Luka 11:13) Ua faapea mai Barbara, o se tuafafine ua leva ona avea ma misionare: “Ou te tatalo i taimi uma ou te faitau pe suʻesuʻe ai le Tusi Paia. Pe a uma, ou te lagona le faatasi mai o Ieova ma o loo finagalo malie o ia i le mea ua ou faia.” O le tatalo a o leʻi faia le suʻesuʻega, e tatala ai o tatou mafaufau ma loto e talia atoatoa le anoanoaʻi o meaʻai faaleagaga, ua saunia mai mo i tatou.
2 MAFAUFAU LOLOTO: Ona o le lē lava o le taimi, e faatopelau ai ona faitau e isi le Afioga a le Atua ma lē mafaufau loloto i ai. O lea la, ua latou misia ai aogā e maua mai i le suʻesuʻeina o le Tusi Paia. Na iloa e Carlos o lē ua silia ma le 50 tausaga o auauna iā Ieova, le tāua o le sema o se taimi e mafaufau loloto ai ina ia maua aogā mai i ana suʻesuʻega. Ua faapea mai o ia: “O lea ua ou faitauina ni nai itulau o le Tusi Paia, e tusa ma le lua itulau i le aso, ma ua lava ai le taimi ou te mafaufau loloto ai i mea na ou faitauina, ma maua ai lesona aogā.” (Sala. 77:12) Pe afai e faaalu se taimi e mafaufau loloto ai, ona faateleina ai lea o lo tatou iloa o le poto saʻo ma malamalama ai i le finagalo o le Atua.—Kolo. 1:9-11.
3 FAATATAU: E tele aogā e maua mai i se galuega pe afai e tatou te iloa lona tāua. E faapena foʻi le suʻesuʻeina o le Tusi Paia. Na faapea mai Gabriel o se uso talavou e masani ona suʻesuʻe e lē aunoa i le Tusi Paia: “E fesoasoani suʻesuʻega iā te aʻu e foʻia ai faafitauli o le olaga i aso taʻitasi, ma sauniunia ai foʻi aʻu e fesoasoani i isi. Ou te taumafai e faatatau mea ua ou aʻoaʻoina i loʻu olaga.” (Teu. 11:18; Iosua 1:8) Ioe, e tele aogā e maua mai i le poto i le Atua pe afai e tatou te taofimau i ai ma faatatauina.—Faata. 2:1-5.
TOE ILOILO: Maʻeu se faaeaga iā i tatou o le saʻiliʻili loloto i le poto mai iā Ieova, o ia o le Puna o le atamai uma! (Roma 11:33) O lea la, o le isi taimi e toe fai ai au suʻesuʻega, ia faamautinoa ua e tatalo muamua iā Ieova ma ōle atu iā te ia ina ia foaʻi mai le mafaufau lelei ma lona agaga paia. A o faitau, taumafai e mālōlō ma mafaufau loloto i mea na e faitauina. E lē gata i lea, e tatau ona mulimuli i ai ma faatatau i aso fai soo mea ua e aʻoaʻoina. Pe afai e te faia nei laasaga tāua, ona avea lea o taimi o au suʻesuʻega o le Tusi Paia o se mea e olioli ai ma maua ai aogā.