Ia Mafuta Atu i le Atua
O Lē e Tauia i Latou Uma e Auauna iā te Ia
“FAAFETAI LAVA.” O ai se tasi e lē fiafia e faalogo i se upu faamālō ona o sana galuega lelei sa fai, po o se faafetai ona o se meaalofa na foaʻi atu ma le lotoatoa? E tatou te mananaʻo uma lava e talisapaia e isi a tatou taumafaiga, aemaise lava i latou tatou te alolofa i ai. O le mea moni, e sili atu ona tatou alolofa iā Ieova lo tatou Atua nai lo o se isi lava mea. Pe e talisapaia e Ieova a tatou taumafaiga ina ia auauna atu iā te ia? Seʻi o tatou iloilo le auala na feutagaʻi ai o ia ma Epetemeleka, o se tane na lotomalie e lamatia lona ola ina ia faasaoina se tasi o perofeta a le Atua.—Faitau le Ieremia 38:7-13 ma le 39:16-18.
O ai Epetemeleka? E foliga mai o ia o se alii tāua i le maota o le tupu o Iuta, o Setekaia.a Sa tupulaga o ia ma Ieremia, o lē na auina atu e le Atua ina ia lapataʻia tagata lē faamaoni o Iuta, e uiga i le faaumatiaga o le a oo mai. E ui na toʻatele perenise e lē talitonu i le Atua, ae sa mataʻu Epetemeleka i le Atua ma sa faaaloalo tele iā Ieremia. Na tofotofoina le mataʻu o Epetemeleka i le Atua, ina ua tuuaʻi sesē e isi perenise amioleaga Ieremia e faapea o ia o sē e fouvale, ma lafoina o ia i se vaieli palapalā, ma tuu ai i inā ina ia oti. (Ieremia 38:4-6) O le ā o le a faia e Epetemeleka?
Na gaoioi Epetemeleka ma le lototele ma le faautauta, e aunoa ma le fefe i isi perenise. Na alu atu o ia iā Setekaia i luma o le lautele ma tetee atu i faiga lē tonu ua faia iā Ieremia. Atonu na faasino atu o ia i tagata faufau leaga a o faapea atu i le tupu: ʻUa faia e nei tagata se mea leaga tele iā Ieremia.’ (Ieremia 38:9) Na manumalo Epetemeleka, ma na faatonuina o ia e Setekaia ina ia ō ma ni tamāloloa se toʻa 30 e faasao mai Ieremia.
Ua toe faaalia foʻi e Epetemeleka se isi uiga lelei: o le agalelei. Na ia ave “ʻieʻie tuai masaesae ma fasi ʻie tuai masaesae, ma tuutuu ifo i lalo . . . iā Ieremia e ala i maea.” Aiseā na ia faaaogāina ai ʻieʻie tuai masaesae? Ina ia tuu i lalo o ʻaoʻao o Ieremia ina ia lē tigā ai ma faigofie ai ona sisi aʻe o ia mai i le vaieli palapalā.—Ieremia 38:11-13.
Na silasila mai Ieova i le gaoioiga na faia e Epetemeleka. Pe na Ia talisapaia? E ala iā Ieremia, na fetalai atu ai le Atua iā Epetemeleka o le a vave ona oo ane le faaumatiaga o Iuta. Na matuā faamautinoa atu e Ieova iā Epetemeleka o le a ia faasaoina o ia. Na fetalai atu Ieova: “Ou te laveaʻi iā te oe . . . E lē tuuina atu foʻi oe i lima o tagata . . . Ou te saunia se mea e te sao ai . . . E te lē paʻū i le pelu . . . E avea foʻi lou ola ma vete.” Aiseā na folafola atu ai e le Atua iā Epetemeleka o le a ia faasaoina o ia? Na faapea atu Ieova: “Auā ua e faatuatua mai iā te aʻu.” (Ieremia 39:16-18) Na silafia lelei e Ieova, na gaoioi Epetemeleka ona e lē gata e alofa iā Ieremia, ae ona na ia faatuatuaina foʻi le Atua.
E manino le lesona: E talisapaia e Ieova mea o loo tatou faia i le auaunaga iā te ia. Ua faamautinoa mai i le Tusi Paia, e na te manatua e oo lava i nai mea iti e tatou faia i le tapuaʻiga ona o se loto ua faatumulia i le faatuatua. (Mareko 12:41-44) Po o uunaʻia oe e faalatalata atu i lenei Atua, o lē e talisapaia la tatou auaunaga? Pe afai o lea, e te mautinoa la, o ia moni lava o loo uiga atu i ai faaupuga o loo i lana Afioga e faapea: “E na te tauia ē e matuā saʻili iā te ia.”—Eperu 11:6.
Faitauga Tusi Paia mo me:
[Faaopoopoga i lalo]
a Na taʻua Epetemeleka o se “eunuka.” (Ieremia 38:7) E ui e masani ona faasino atu lenei taʻu i tane ua aveesea o latou fuāmanava, ae e mafai foʻi ona faasino atu i so o se tagata e tofia i ni tofiga maualuluga i le maota o le tupu.