“O Ia o le Atua, o Ē e Ola”

Pe e malosi atu le oti nai lo le Atua? E mautinoa e leai! E faapefea i le oti po o se isi lava “fili,” ona malosi atu i “le Atua o Lē e ona le malosi uma lava”? (1 Korinito 15:26; Esoto 6:3) E iai le mana o le Atua e toe faatutū ai ē ua maliliu, ma ua ia folafola mai o le a faataunuuina lenā tulaga i lana lalolagi fou.a E faapefea ona maufaatuatuaina lenā folafolaga? Ua faailoa mai i upu a Iesu, le Alo o le Atua, se faamoemoe moni mo i tatou.​—Faitau le Mataio 22:31, 32.

Na fetalai atu Iesu i le ʻau Satukaio o ē e leʻi talitonu i le toetū e faapea: “Pe e tou te leʻi faitau ea i le fetalaiga a le Atua iā te outou e faatatau i le toetutū mai o ē ua oti e faapea, ʻO aʻu o le Atua o Aperaamo, o le Atua o Isaako, ma le Atua o Iakopo’? O ia o le Atua, o ē e ola ae lē o ē ua oti.” Na faasino atu Iesu i le talanoaga a Ieova ma Mose i le mea sa iai le laau tuitui na mū pe tusa o le 1514 T.L.M. (Esoto 3:1-6) E tusa ai ma fetalaiga a Iesu, o upu a Ieova iā Mose ua faamaonia ai o le a taunuu moni lava le folafolaga e uiga i le toetū. E faapefea?

Muamua, seʻi mātau le mea lenei. I le taimi na fetalai ai Ieova iā Mose, ua 329 tausaga talu ona maliu le augātamā o Aperaamo, 224 tausaga talu ona maliu Isaako, ae 197 Iakopo. Ae o lea ua fetalai Ieova, “o aʻu” o lo latou Atua, e leʻi faapea mai, “sa avea aʻu” ma o latou Atua. Na fetalai Ieova e uiga i nei augātamā e peiseaʻī o loo feola pea i latou. Aiseā?

Na faamatala mai e Iesu: “O ia [Ieova] o le Atua, o ē e ola ae e lē o ē ua oti.” Seʻi mafaufau i nei upu. Afai e leai se toetū, o lona uiga la e tumau pea i le oti Aperaamo, Isaako, ma Iakopo. Afai e moni lenā tulaga, o Ieova la o le Atua o ē e oti. O lona uiga la e malosi atu le oti iā Ieova, e peiseaʻī ua leai se malosi o Ieova e faasaʻoloto ai ana auauna faamaoni mai le oti.

O ā la mea ua tatou iloa e uiga iā Aperaamo, Isaako, ma Iakopo faapea ma isi auauna faamaoni ua maliliu? Na fetalai ma le mautinoa Iesu e faapea: “Ua latou ola uma iā te ia.” (Luka 20:38) Ioe, e mautinoa o le a taunuu le fuafuaga a Ieova mo le faatutūina o ana auauna faamaoni, auā e manatu Ieova e peiseaʻī o loo feola pea i latou. (Roma 4:16, 17) O le a manatua pea e Ieova ana auauna faamaoni ua maliliu, seʻia oo i lana taimi atofaina e toe faatutū mai ai i latou.

Pe e te fiafia i le manatu, o le a e toe feiloaʻi ma ē pele ua maliliu? Afai o lea, ia manatua e sili atu ona malosi Ieova nai lo o le oti. E leai se mea e mafai ona taofia o ia mai le faataunuuina o lana folafolaga, ina ia toe faatutū ē ua maliliu. Aiseā e te lē aʻoaʻo atili ai e faatatau i le folafolaga i le toetū, ma le Atua o le a faataunuuina lenā folafolaga? O le faia faapea, e mautinoa o le a e mafuta vavalalata atu ai iā Ieova, “le Atua, o ē e ola.”