MATAUPU AUTŪ: LESONA E AʻOAʻOINA MAI IĀ MOSE
O ai Mose?
O le ā e te manatuaina pe a e faalogo i le igoa o Mose? Pe e te mafaufau i . . .
le pepe na natia e lona tinā i se ato i le vaitafe o le Naila?
le tamaitiiti na fai ma tama a le afafine o Farao ma ola aʻe i se olaga tamaoaiga i Aikupito, ae e leʻi galo lava iā te ia lona tupuaga o se Isaraelu?
le tamāloa sa avea ma leoleo mamoe i Mitiana mo le 40 tausaga?
lē na talanoa atu iā Ieovaa e ala i se laau na mumū?
lē na tautala atu ma le lototele iā Farao, ina ia faasaʻoloto tagata Isaraelu mai i le nofo pologa?
lē na faaaogā e le Atua ina ia faailoa atu Mala e Sefulu o le a oo iā Aikupito?
le tane na taʻitaʻia tagata Isaraelu ina ua faasaʻoloto mai i Aikupito?
lē na faaaogāina e vaeluaina le Sami Ulaula?
lē na tuuina atu i tagata Isaraelu Tulafono e Sefulu?
NA FAIA e Mose mea uma o loo taʻua i luga ma le tele o isi mea. E lētioa faaaloalogia lenei tane faamaoni e tagata Kerisiano, Iutaia, ma le ʻau Musalimi.
E mautinoa o Mose o se perofeta na faaalia “gaoioiga matuā mataʻutia.” (Teuteronome 34:10-12) Sa lotomalie e faaaogā o ia e le Atua i se tulaga mataʻina. Peitaʻi, i le pei o isi perofeta, o Mose o se ʻtagata e pei foʻi o i tatou.’ (Iakopo 5:17; Mataio 17:1-9) Na fesagaʻia e Mose le tele o faafitauli o loo tatou fesagaʻia, ma na mafai ona ia foʻia na faafitauli.
Pe e te iloa le auala na ia faia ai faapea? Mātau nisi o uiga lelei se tolu sa iai iā Mose, ma lesona e tatou te aʻoaʻoina mai ai.
a I le Tusi Paia, o Ieova o le suafa o le Atua.