Pe e Mafai Moni Ona Maua se Olaga e Aogā?

E ESE le moni o na upu! Ua tumu lenei olaga i “faafitauli ma mea e tigā ai.” Atonu la e te taumānatu, ʻPe e mafai moni ona maua se olaga e aogā?’

O se faataʻitaʻiga, sa avea Maria o se tagata e malosi ma tiotio, ae o lea ua nofofale ina ua 84 ona tausaga. O loo lelei pea lona mafaufau, ae ua lē toe tutusa le malosi o le tino. E faapefea la ona ia lagona o loo aogā pea lona olaga?

Ae faapefea oe? O nisi taimi e te ono taumānatu ai pe e iai se aogā o lou olaga. Atonu ua e fiu i lau galuega ma e leai se tasi e amanaʻiaina. E tusa lava foʻi po o loo sologa lelei lou olaga, ae e tumau pea ona e popole i lou lumanaʻi. O nisi taimi e te lagona le tuua toʻatasi po o le mafatia. Atonu foʻi o loo iai ni faafitauli i lou aiga, po ua maliu sē e pele iā te oe. O se faataʻitaʻiga, na matuā mafatia se tane e igoa iā André ina ua maliu si ona tamā na vavalalata i ai, ma na manatu e lē mafai ona toe fiafia o ia.

Po o ā lava faafitauli ma mea tigā, ae e tatou te moomoo uma lava e fia iloa, pe e mafai moni ona tatou maua se olaga e aogā. E maua le tali mai i le olaga o Iesu Keriso, o lē na soifua i le lalolagi i le 2,000 tausaga ua mavae. E ui i faigatā sa ia fesagaʻia, ae na ia maua lava se olaga e aogā. E mafai foʻi ona tatou maua se olaga aogā, pe a mulimuli i lana faaaʻoaʻoga.