TALIINA FESILI FAALE-TUSI PAIA

Pe e mafai ona faamagaloina a tatou agasala?

Ua faapea mai le Tusi Paia, e agasala tagata uma lava. Ua tatou aafia ona o le agasala tuufaasolo mai iā Atamu, e iai la taimi e tatou te faia ai mea leaga, ma atonu e toe salamō mulimuli ane ai. Na maliu Iesu Keriso mo a tatou agasala, ma ona o lana taulaga togiola ua tatou maua ai le faamagaloga. O se meaalofa lea mai le Atua.​—Faitau le Roma 3:23, 24.

Ua faia e nisi o tagata agasala matuiā, ma manatu pe faamata e faamagaloina i latou e le Atua. Ua faamautinoa mai i le Afioga a le Atua: ʻE faamamāina i tatou mai i agasala uma i le toto o lona Alo o Iesu.’ (1 Ioane 1:7) O lea, e finagalo malie Ieova e faamagaloina i tatou e oo lava i agasala matuiā, pe afai e faaalia le salamō moni.​—Faitau le Isaia 1:18.

O le ā e tatau ona faia ina ia maua ai le faamagaloga?

Ina ia maua le faamagaloga a Ieova le Atua, e manaʻomia ona tatou aʻoaʻoina e faatatau iā te ia. E aofia ai le malamalama i ona ala ma ana tapulaa. (Ioane 17:3) E faamagaloina e Ieova i latou e salamō mai i o latou ala leaga, ma taumafai e fai se suiga i o latou olaga.​—Faitau le Galuega 3:19.

E mafai ona tatou maua le finagalo malie o Ieova. E alofa mutimutivale ma agalelei o ia, ma e na te silafia o tatou vaivaiga. Pe e lē uunaʻia ai ea oe e aʻoaʻoina atili e faatatau i auala e maua ai lona finagalo malie?​—Faitau le Salamo 103:13, 14.