Se Sui Fou o le Vaega Pule

I le taeao o le Aso Lulu, Setema 5, 2012, na faasilasilaina ai i aiga Peteli i le Iunaite Setete ma Kanata, le faaopoopoina ai o se sui fou o le Vaega Pule a Molimau a Ieova. Na amata ona auauna Mark Sanderson i lenā tofiga, iā Setema 1, 2012.

Na ola aʻe le uso o Sanderson i San Diego i Kalifonia, i Amerika i ni mātua Kerisiano, ma na papatiso o ia iā Fepuari 9, 1975. Na amata lana auaunaga faapaeonia i Saskatchewan i Kanata, iā Setema 1, 1983. Iā Tesema 1990, na faauuina ai o ia mai i le vasega lona 7 o le Aʻoga mo Toleniga i le Faiva, (lea ua taʻua nei o le Aʻoga Faale-Tusi Paia mo Uso Nofofua) i le Iunaite Setete. Iā Aperila 1991, na tofia ai le uso o Sanderson o se paeonia faapito i le motu o Newfoundland i Kanata. Ina ua māeʻa ona ia auauna o se sui ovasia o le ovasia matagaluega, ona valaaulia lea o ia i le aiga Peteli i Kanata, iā Fepuari 1997. Iā Novema 2000, na siitia atu ai o ia i le lālā i le Iunaite Setete, lea na galue ai i le Auaunaga o Faamatalaga Faafomaʻi, ma mulimuli ane i le Matagaluega o le Auaunaga.

Iā Setema 2008, na auai ai le uso o Sanderson i le Aʻoga mo Sui o Komiti o Lālā, ma mulimuli ane tofia o se sui o le Komiti o le Lālā i Filipaina. Iā Setema 2010, na valaaulia ai o ia e toe foʻi i le Iunaite Setete, lea na ia auauna ai o se fesoasoani i le Komiti o le Auaunaga a le Vaega Pule.