Ia Gaoioi e Ōgatusa ma le Tatalo a Iesu

1, 2. Faamatala mea na faia e Iesu mo ona aposetolo, ina ua māeʻa le Paseka i le 33 T.A.

I LE afiafi o Nisani 14 i le tausaga 33 T.A., na faamanatu ai e Iesu ma ana uō le Paseka. Na faamanatu atu ai iā i latou le auala na laveaʻia ai e le Atua tagata Isaraelu mai i Aikupito. Peitaʻi, na maua ai e soo faamaoni o Iesu le avanoa mo se laveaʻiga e sili atu. I le aso na sosoo ai, [o Nisani 14 lava lea], na fasiotia ai Iesu e ona fili. O le faataulagaina o lona soifua lelei atoatoa, na faasaʻolotoina ai tagata mai i le agasala ma le oti.​—Epe. 9:12-14.

² Ina ia mautinoa e lē galo iā i tatou lenei sauniuniga alofa mai le Atua, na amata ai e Iesu se faamanatuga fou e suia ai le Paseka faaletausaga. Na ia vaevaeina le areto e lē faafefeteina, ma tufatufa atu i ona aposetolo faamaoni e 11. Na ia fetalai atu: “O le faatusa lenei o loʻu tino ou te avatu mo outou. Ia faia pea lenei mea e fai ma faamanatuga iā te aʻu.” Na ia faia foʻi faapea i le ipu o le uaina mūmū ma fetalai atu: “O lenei ipu, o le faatusa lea o le feagaiga fou e ala i loʻu toto lea o le a faamaligiina mo outou.”​—Luka 22:19, 20.

3. (a) O le ā le suiga tele na tupu ina ua mavae le maliu o Iesu? (e) A o iloiloina le tatalo a Iesu, o ā fesili e tatau ona tatou manatunatu i ai?

³ Na lata i le taimi e muta ai le feagaiga o le Tulafono i le va o le Atua ma le nuu o Isaraelu. Na iai se feagaiga fou i le va o Ieova ma soo faauuina o Iesu. E leʻi finagalo Iesu e tutusa ona soo ma le nuu o Isaraelu. Na matuā faalumaina le suafa o Ieova, ona o le lē autasi o tagata Isaraelu i le tapuaʻiga i le Atua. (Ioa. 7:45-49; Galu. 23:6-9) Peitaʻi, na finagalo Iesu e galulue ma le autasi ona soo, ina ia faamamaluina ai le suafa o le Atua. O lea, na ia talosagaina ai le fesoasoani a lona Tamā e ala i le faia o se tatalo, lea ua iai i so o se tagata le faaeaga e faitau iai. O loo faamauina lenei tatalo i le Ioane 17:1-26. (Tagaʻi i le ata i luga aʻe o le mau autū.) A o tatou iloiloina lenei tatalo, ia manatunatu i fesili nei: “Pe na faafofogaina e le Atua le tatalo a Iesu? Po o oʻu gaoioi e ōgatusa ma lenā tatalo?”

MEA NA SILI ONA TĀUA IĀ IESU

4, 5. (a) O le ā e tatou te aʻoaʻoina mai i le vaega muamua o le tatalo a Iesu? (e) Na faapefea ona tali atu Ieova i le talosaga a Iesu mo ona manaʻoga?

⁴ Na aʻoaʻo e Iesu ona soo i le poto tautele mai le Atua seʻia oo i le leva o le pō, ona ia tepa aʻe lea i le lagi ma tatalo: ʻLoʻu Tamā e, ua oo mai le itula; ia e faamamaluina lou atalii, ina ia faamamaluina oe e lou atalii. Talu ai ua e tuuina mai iā te ia le pule i tagata uma, ina ia avatu e ia le ola e faavavau iā i latou uma ua e tuuina mai iā te ia. Ua ou faamamaluina oe i le lalolagi, ma ua ou faamāeʻaina le galuega na e tuuina mai iā te aʻu e fai. O lenei, loʻu Tamā e, ia e faamamaluina aʻu pe a ou faatasi ma oe, i le mamalu na ou maua ina o ta faatasi, a o leʻi faia tagata i le lalolagi.’​—Ioa. 17:1-5.

⁵ Na amata le tatalo a Iesu i le taʻua o mea na sili ona tāua iā te ia. Muamua, na ia tatalo ina ia faamamaluina lona Tamā, ma o le mea foʻi lenā na amata ai lana tatalo faaaʻoaʻo. (Luka 11:2) Lua, na ia tatalo mo ona soo. Na ia talosaga i lona Tamā “ia avatu e ia [Iesu] le ola e faavavau iā i latou.” O le vala mulimuli, na ia tatalo mo ona manaʻoga e faapea: “Loʻu Tamā e, ia e faamamaluina aʻu pe a ou faatasi ma oe, i le mamalu na ou maua ina o ta faatasi, a o leʻi faia tagata i le lalolagi.” Na faafofoga le Atua i le tatalo a lona Alo, ma foaʻi atu “le suafa e sili i lo o” agelu uma, o se mea sa sili atu i lo o le mea na ia talosaga i ai.​—Epe. 1:4.

ʻIA ILOA’ LE ATUA E TOʻATASI

6. (a) O le ā na tatau ona faia e le ʻauaposetolo ina ia maua ai le ola e faavavau? (e) E faapefea ona faamaonia na faia faapea e le ʻauaposetolo?

⁶ Na taʻua foʻi i le tatalo a Iesu, e tatau ona faaauau ona “iloa” pe aʻoaʻoina le poto e faatatau i le Atua ma Keriso, ina ia maua ai le meaalofa o le ola e faavavau. (Faitau le Ioane 17:3.) E faapefea? Muamua, e tatau ona tatou faia le mea sili ina ia aʻoaʻo atili e faatatau iā Ieova ma lona Alo. Lua, e manaʻomia ona faatatau i o tatou olaga mea ua aʻoaʻoina. Na faia e le ʻauaposetolo na vala uma, auā na taʻua e Iesu i lana tatalo: “O au fetalaiga na e tuuina mai iā te aʻu, ua ou tuuina atu iā i latou, ua latou talia.” (Ioa. 17:8) Ae ina ia maua le ola e faavavau, sa manaʻomia ona latou manatunatu pea i le Afioga a le Atua, ma faatatau mea na aʻoaʻoina i o latou olaga. Sa faia pea e le ʻauaposetolo lenei mea seʻia oo ina maliliu. E faamaonia lenā mea auā o loo tusia o latou igoa i maa faavae e 12 o le Ierusalema Fou i le lagi.​—Faaa. 21:14.

7. O le ā le uiga o le “iloa” o le Atua, ma aiseā e tāua ai?

⁷ Pe a tatou fia maua le ola e faavavau, e tatau ona faaauau pea ona tatou “iloa” le Atua. O le ā le uiga? O le faaliliuga o le upu Eleni “iloa,” e mafai foʻi ona faaliliuina i le “faaauau pea ona iloa.” O lea, ina ia “iloa” le Atua, e manaʻomia ona tatou aʻoaʻoina atili pea e faatatau iā te Ia. Peitaʻi, e lē lava le tau ina iloa o ona uiga ma lona finagalo. E tatau ona tatou faaalia le alofa loloto ma atiaʻe se faiā māfana ma ia, ma alolofa i o tatou uso ma tuafāfine. Ua faapea mai le Tusi Paia: “O lē e lē alofa, e na te lē iloa le Atua.” (1 Ioa. 4:8) O le iloa o le Atua, e aofia ai foʻi le usiusitaʻi iā te ia. (Faitau le 1 Ioane 2:3-5.) O se faaeaga faapitoa le auaufaatasi ma i latou e iloa Ieova. Peitaʻi, e tatau ona tatou faaeteete ina ia aua neʻi mou atu la tatou faiā tautele ma ia, e pei o Iuta le Sekara. O lea, e tatau ona tatou filigā e faamalosia la tatou faauōga ma Ieova. O le faia faapea, o le a ia foaʻi mai ai iā i tatou le meaalofa matagofie o le ola e faavavau.​—Mata. 24:13.

“ONA O LOU SUAFA”

8, 9. (a) O le ā le mea sa sili atu ona tāua iā Iesu a o iai i le lalolagi? (e) O le ā le aʻoaʻoga na teena e Iesu?

⁸ A o tatou faitau i le tatalo a Iesu i le Ioane mataupu e 17, e manino mai ai sa loloto lona alofa i ona aposetolo faapea foʻi i tatou. (Ioa. 17:20) O le taimi atoa sa iai Iesu i le lalolagi, sa tāua iā te ia lo tatou faaolataga. Peitaʻi, sa sili atu ona tāua iā te ia le faapaiaina o le suafa o lona Tamā. O se faataʻitaʻiga, o le taimi muamua na faamatala ai e Iesu le pogai o lona afio mai i le lalolagi, na ia faitau ai le tusi tāʻai a Isaia e faapea: “Ua i oʻu luga le agaga o Ieova, auā ua ia faauuina aʻu e folafola le tala lelei i ē e matitiva.” E tatou te mautinoa ai, na ia faaleoina ma le manino le suafa o le Atua.​—Luka 4:16-21.

⁹ A o leʻi afio mai Iesu i le lalolagi, na aʻoaʻo e taʻitaʻi lotu Iutaia tagata e aua neʻi faaaogāina le suafa o le Atua. E mautinoa na matuā teena e Iesu na aʻoaʻoga. Na ia fetalai atu i taʻitaʻi lotu: “Ua ou sau i le suafa o loʻu Tamā, a ua outou lē taliaina aʻu; ae afai e sau se tasi i lona lava igoa, tou te taliaina o ia.” (Ioa. 5:43) I ni nai aso a o leʻi maliu o ia, na toe taʻua ai foʻi e Iesu le mea sa sili ona tāua iā te ia ina ua ia tatalo: “Loʻu Tamā e, ia faamamaluina lou suafa.” (Ioa. 12:28) E manino mai foʻi i le tatalo o loo tatou talanoaina, sa sili atu ona tāua i le olaga o Iesu le faapaiaina o le suafa o lona Tamā.

10, 11. (a) Na faapefea ona faailoa e Iesu le suafa o lona Tamā? (e) Aiseā ua faalauiloa ai e soo o Iesu le suafa o Ieova?

¹⁰ Na tatalo Iesu: “Ua ou faailoa atu lou suafa i tagata ua e foaʻi mai iā te aʻu i le lalolagi. O ou tagata i latou, ma ua e foaʻi mai iā te aʻu ma ua latou usiusitaʻi i lau afioga. Ou te lē iai pea i le lalolagi, a o i latou, e i le lalolagi lava i latou, ma ou te alu atu iā te oe. Le Tamā paia e, ia e leoleo iā i latou ona o lou suafa lea na e tuuina mai iā te aʻu, ina ia tasi i latou e pei o i taʻua.”​—Ioa. 17:6, 11.

¹¹ E leʻi tau ina faaaogā e Iesu le suafa o Ieova, ina ua ia “faailoa” atu le suafa o lona Tamā i ona soo. Na ia fesoasoani iā i latou e malamalama po o ai Ieova. Na ia aʻoaʻoina i latou e faatatau i ona uiga matagofie, ma le auala alofa o loo ia feutagaʻi ai ma i tatou. (Eso. 34:5-7) Ua avea nei Iesu ma Tupu i le lagi, ma o loo ia fesoasoani mai pea i ona soo e faalauiloa le suafa o Ieova i le lalolagi atoa. Aiseā e tatau ai ona fai lenei galuega? Ina ia fesoasoani e aʻoaʻo le toʻatele o tagata e faatatau iā Ieova, a o leʻi oo mai le iʻuga o lenei lalolagi leaga. Pe a oo mai lenā taimi, o le a laveaʻia e Ieova ana auauna faamaoni, ma iloa ai e tagata uma le suafa silisili o Ieova.​—Eseki. 36:23.

“INA IA TALITONU AI LE LALOLAGI”

12. O ā mea e tolu e tatau ona tatou faia, ina ia faamāeʻa ai le galuega na amataina e Iesu?

¹² Na poloaʻia e Iesu ona soo e faamāeʻa le galuega na ia amataina. Na ia tatalo: “E pei ona auina mai aʻu i le lalolagi, e faapea foʻi ona ou aauina atu i latou i le lalolagi.” Peitaʻi, na silafia e Iesu e manaʻomia e ona soo le fesoasoani. A o faatasi Iesu ma ona soo, na ia galue mamafa e fesoasoani iā i latou e foʻia o latou vaivaiga, ina ia mafai ai ona latou faataunuu le galuega. Na tatalo Iesu iā Ieova e fesoasoani i ona soo e faataunuu ni mea tāua se tolu. Muamua, ina ia lē faia se vaega a ona soo i le lalolagi a Satani. Lua, ia usiusitaʻi ona soo i le Afioga a le Atua ma ia faamamaluina i latou. Tolu, na ʻaiʻoi atu Iesu iā Ieova ina ia autasi ona soo, e pei lava ona autasi i laʻua ma lona Tamā. E tatau ona tatou fesili ifo iā i tatou lava: ʻPo o oʻu faia mea e tolu na taʻua e Iesu i lana tatalo?’ Na mautinoa e Iesu, pe a faia e ona soo na mea e tolu, o le a talia e le toʻatele o tagata le tala lelei.​—Faitau le Ioane 17:15-21.

13. Na faapefea ona tali atu Ieova i le tatalo a Iesu i le uluaʻi senituri?

¹³ A o tatou suʻesuʻeina le tusi o Galuega, e tatou te iloa ai na faafofogaina e Ieova le tatalo a Iesu. I le uluaʻi senituri, na faia aʻe uluaʻi Kerisiano i tagata Iutaia, tagata o Nuu Ese, ē mauʻoa ma tagata matitiva, o pologa ma i latou na iai a latou pologa. E ui i le eseese o o latou tulaga, ae na mafai ona latou autasi pea. Na faatusaina e le aposetolo o Paulo i latou i vaega eseese o le tino o se tagata, lea e avea ai Iesu ma o latou Ulu. (Efe. 4:15, 16) Na faatoʻā mafai ona latou maua le autasi i le lalolagi fevaevaeaʻi a Satani, ona o le malosi o le agaga paia o Ieova.—1 Kori. 3:5-7.

14. Ua faapefea ona talia le tatalo a Iesu i aso nei?

¹⁴ Na suia le tulaga o mea ina ua mavae le maliliu o le ʻauaposetolo. E toʻatele na fulitua i le upu moni ma aumaia i le faapotopotoga aʻoaʻoga sesē, lea na iʻu ina mou atu ai le autasi. (Galu. 20:29, 30) Peitaʻi i le 1919, na faasaʻoloto ai e Iesu Kerisiano faauuina mai i le malosi o aafiaga mai i lotu sesē, ma faapotopoto faatasi i latou i “le fusi lea e atoatoa ona autasi ai.” (Kolo. 3:14) O le ā le iʻuga o lo latou autasi i le galuega talaʻi? E silia i le fitu miliona tagata mai “i atunuu uma, ma ituaiga, ma nuu, ma gagana” o loo auauna iā Ieova ma le autasi, faatasi ai ma le ʻaufaauuina. (Faaa. 7:9; Ioa. 10:16) O se tali sili lea ona lelei i le tatalo a Iesu iā Ieova, “ina ia iloa ai e le lalolagi ua e auina mai aʻu, ma ua e alofa iā i latou e pei ona e alofa mai iā te aʻu.”​—Ioa. 17:23.

SE FAAIʻUGA FAAMĀFANAFANALOTO

15. O le ā le talosaga faapitoa na faia e Iesu mo ona soo faauuina?

¹⁵ I le afiafi o Nisani 14, na tuuina atu ai e Iesu i ona aposetolo le “mamalu,” e ala i le faia o se feagaiga ma i latou e pule faatasi ma ia i lona Malo. (Ioa. 17:22; Luka 22:28-30) O lea, na tatalo ai Iesu mo i latou uma o le a avea ma ona soo faauuina: “Loʻu Tamā e, e tusa ma mea ua e tuuina mai iā te aʻu, o loʻu manaʻo, o le mea ou te iai, ia iai foʻi mai i latou e faatasi ma aʻu, ina ia latou iloa loʻu mamalu ua e tuuina mai iā te aʻu, auā ua e alofa mai iā te aʻu a o leʻi faavaeina le lalolagi.” (Ioa. 17:24) E lē matauʻa isi mamoe i le taui o le a maua e le ʻaufaauuina. O se tasi lea o faamaoniga e iloa ai le autasi o Kerisiano faamaoni.

16, 17. (a) I le faaiʻuga o le tatalo a Iesu, o le ā na ia taʻua o le a faaauau ona ia faia? (e) O le ā e tatau ona faaauau ona tatou faia?

¹⁶ O le toʻatele o tagata i le lalolagi, e latou te lē amanaʻia e iai tagata o Ieova o loo autasi, ma iloa lelei o Ia. E tupu lenā mea ona o le pepelo o aʻoaʻoga a taʻitaʻi lotu, ma na tupu foʻi lenā mea i taimi o Iesu. O lea, na faaiʻu ai lana tatalo i upu nei: “Loʻu Tamā amiotonu e, e moni e leʻi iloa lava oe e le lalolagi, a ua ou iloa oe, ma ua iloa foʻi e i latou nei, ua e auina mai aʻu. Ua ou faailoa atu lou suafa iā i latou, ma saga faailoa atu, ina ia iā i latou le alofa lea na e alofa mai ai iā te aʻu, ma ou autasi ai ma i latou.”​—Ioa. 17:25, 26.

¹⁷ Ua faalauiloa e Iesu le suafa o lona Tamā, ma i le avea ai ma Ulu o le faapotopotoga, o loo faaauau ona ia fesoasoani iā i tatou ia faailoa atu i isi le suafa o lona Tamā ma lona finagalo. Seʻi o tatou usitaʻia le taʻitaʻiga a Iesu, ma maelega i le galuega talaʻi ma faia isi ma soo. (Mata. 28:19, 20; Galu. 10:42) Seʻi o tatou galulue mamafa foʻi e faatumau le autasi o ni tagata o le Atua. O le a tatou gaoioi ai e ōgatusa ma le tatalo a Iesu, lea e iʻu atu ai i le faamamaluina o le suafa o Ieova ma tatou maua ai le fiafia tumau.