TALIINA FESILI FAALE-TUSI PAIA
O le ā le māfuaaga o le toe afio mai o Keriso?
A o leʻi toe afio Iesu Keriso i le lagi i le 33 T.A. na ia fetalai o le a ia toe afio mai. Na ia faatusaina o ia i se alii mamalu na alu malaga mo se taimi umi, ma na toe foʻi mai o se tupu. O le māfuaaga o le toe afio mai o Iesu, o le aumaia lea o se faigāmalo lelei mo tagata.—Faitau le Luka 19:11, 12.
O le a aumaia e Iesu se faigāmalo lelei mo tagata
O le ā le ituaiga o tino o le a toe afio mai ai Keriso? Na faatūina o ia o se foafoaga agaga. (1 Peteru 3:18) Na afio i le lagi ma nofo i le itu taumatau o le Atua. (Salamo 110:1) I se taimi mulimuli ane, na momoli atu o ia i luma o Ieova le Atua o “Lē e mai anamuā ona aso,” o lē na tuuina atu iā te ia le mana e pule ai i le fanau a tagata. O lea, o le a toe afio mai Iesu o se Tupu e lē vaaia.—Faitau le Tanielu 7:13, 14.
O le ā o le a faia e Iesu pe a toe afio mai?
O le a faamasinoina e Iesu le fanau a tagata, pe a toe afio mai ma ana agelu i se auala e lē vaaia. O le a ia faaumatia tagata leaga, ae foaʻi mai le ola e faavavau iā i latou e talia o ia o le Tupu.—Faitau le Mataio 25:31-33, 46.
Pe a pule Iesu o se Tupu, o le a ia suia le lalolagi e avea o se parataiso. O le a ia toe faatutūina i latou ua feoti, ina ia mafai ona olioli i le olaga i lenā lalolagi parataiso.—Faitau le Luka 23:42, 43.