MATAUPU AUTŪ | LE TAUA NA SUIA AI LE LALOLAGI

Le Pogai Autū o Taua ma Mafatiaga

Ina ua māeʻa le Taua Muamua o le Lalolagi iā Novema 11, 1918, na tapunia pisinisi ma na matuā olioli tagata. Peitaʻi, e leʻi tumau ai pea lo latou fiafia, ona na iai se isi mea na sosoo mai ai e sili atu lona mataʻutia nai lo o auupega faaniukilia.

Iā Iuni i le 1918, na aafia ai fitafita sa iai i le taua i Falani i le faamaʻi oti o le fulū Sepania. Na faamaonia le mataʻutia o lenei faamaʻi i nai masina mulimuli ane, ina ua toʻatele atu fitafita Amerika na maliliu ai nai lo o fitafita na fasiotia i le taua. Na feaveaʻi e fitafita na toe foʻi i o latou atunuu le fulū ina ua uma le taua, ma na vave lava ona pipisi le faamaʻi i le lalolagi atoa.

Na vaaia le matelāina o tagata i le fia aai ma le faalētonu o le tamaoaiga, ina ua māeʻa le taua. O le tele o vaipanoa i Europa na matuā manaʻomia lava ni meataumafa. E oo ane i le 1923, ua lē toe aogā le tupe Siamani, ma i le ono tausaga mulimuli ane, na matuā paʻū maulalo le tamaoaiga o le lalolagi. Mulimuli ane i le 1939, na gāpā ai le taua lona lua, ma e pei o lea ua toe faaauau le taua muamua a le lalolagi. O le ā tonu le pogai autū o nei mea mataʻutia na tutupu?

LE FAAILOGA O ASO E GATA AI

Ua fesoasoani valoaga o le Tusi Paia e tatou te malamalama ai i le māfuaaga ua tutupu ai nei mea iloga i le talafaasolopito, aemaise lava le Taua Muamua o le Lalolagi. Na valoia e Iesu Keriso e iai le taimi o le a ʻsiitaua ai le tasi atunuu i le isi atunuu,’ ma o le a iai foʻi faamaʻi ma le oge i le lalolagi. (Mataio 24:3, 7; Luka 21:10, 11) Na ia fetalai i ona soo, o na mea mataʻutia o le a faia aʻe ai le faailoga o aso e gata ai. E tele isi faamatalaga o loo iai i le tusi o Faaaliga, lea e faamatala ai le fesootaʻiga o puapuaga o loo tutupu i le lalolagi ma le taua i le lagi.—Tagaʻi i le pusa “Taua i le Lalolagi ma le Taua i le Lagi.”

O loo faamatalaina foʻi i le Faaaliga tagata tiʻetiʻe solofanua e toʻafā, lea e taʻua i nisi taimi o tagata tiʻetiʻe solofanua e toʻafā o le Apokalipise. O le toʻatolu o nei tagata tiʻetiʻe solofanua, o loo faaāta mai ai mala e tolu na valoia e Iesu, o taua, oge ma faamaʻi. (Tagaʻi i le pusa “Po ua Amata le Tiʻetiʻega a Tagata Tiʻetiʻe Solofanua e Toʻafā?”) O le mea moni, na amataina e le taua muamua o le lalolagi mafatiaga lea e lē o mafai lava ona faaitiitia. E pei ona faaalia i le Tusi Paia, o Satani, o ia moni lenā na faapogaia nei mafatiaga. (1 Ioane 5:19) Pe e iai se taimi o le a aveesea ai o ia?

Ua faamautinoa mai foʻi i le tusi o Faaaliga, ua ʻpuupuu lava le taimi’ o loo totoe mo Satani. (Faaaliga 12:12) O le māfuaaga lenā o le lotoa tele o Satani, ma ia faapogaia ai le tele o mafatiaga i le lalolagi. I se tulaga talitutusa, o faafitauli o loo tatou fesagaʻia, o le faamaoniga lenā o le puupuu o le taimi o loo totoe mo Satani.

FAALEAOGĀINA GALUEGA A LE TIAPOLO

O le mea moni, na matuā suia atoatoa le tulaga o mea i le lalolagi ona o le Taua Muamua o le Lalolagi. Na amataina ai faigātaua, fouvalega, ma lē toe faatuatuaina ai e tagata taʻitaʻi o malo. Ua faaalia ai foʻi faamaoniga maumaututū o le lafoina ese o Satani mai le lagi. (Faaaliga 12:9) Ua gaoioi lenei pule lē vaaia o le lalolagi e pei o se taʻitaʻi sauā, auā ua ia iloa ua puupuu lona taimi o totoe. Pe a oo i le iʻuga o na taimi, ona faamuta foʻi lea ma mafatiaga lea na amata mai i le Taua Muamua o le Lalolagi.

Pe a fua i valoaga o le Tusi Paia, e anoanoaʻi māfuaaga e tatou te maufaatuatuaina ai Iesu Keriso lo tatou Tupu i le lagi, lea o le a ia ʻfaalēaogāina galuega a le Tiapolo.’ (1 Ioane 3:8) O loo faaauau pea ona tatalo le faitau miliona o tagata ina ia oo mai le Malo o le Atua. Po o e faia faapea? O lenā Malo o le a mafai ai e tagata faamaoni ona vaai i le taimi e faia ai le finagalo o le Atua i le lalolagi. (Mataio 6:9, 10) O le a lē toe iai ni taua pe a pule le Malo o le Atua! (Salamo 46:9) Ia aʻoaʻo e faatatau i lenā Malo, ma tulimataʻia le taimi o le a faatumulia ai le lalolagi i le filemu.—Isaia 9:6, 7.

Taua i le Lalolagi ma le Taua i le Lagi

Pe tusa ma le 1,900 tausaga a o leʻi gāpā le Taua Muamua o le Lalolagi, na ofo atu ai e Satani iā Iesu “malo uma o le lalolagi.” (Mataio 4:8, 9) Na teena e Iesu lenā faaosoosoga, ma i se taimi mulimuli ane na ia taʻua ai Satani o le “pule o le lalolagi.” (Ioane 14:30) Na tusi foʻi le aposetolo o Ioane i le 1 Ioane 5:19 e faapea, “o le lalolagi atoa o loo nofo toʻilalo i le pule a lē o loo leaga.”

Pe afai o Satani o loo pulea le lalolagi, ua talafeagai la ona faapea atu o ia na faapogaia le taua muamua o le lalolagi, faapea iʻuga na oo i ai. O le tulaga lenā, auā o loo taʻua i le tusi o Faaaliga, e iai le vaega a Satani i puapuaga na pagatia ai le lalolagi talu mai le 1914. O se otootoga puupuu lenei o mea na tutupu o loo faamatalaina i le Faaaliga mataupu e 12:

Fuaiupu 7 Amata le taua i le va o Mikaele (Iesu Keriso) ma le tarako (Satani).
Fuaiupu 9 Ua lafo mai i le lalolagi le Tiapolo “o lē ua faasesēina le lalolagi atoa.”
Fuaiupu 12 “Oi talofa i le laueleele ma le sami, auā ua alu ifo iā te outou le Tiapolo ua lotoa tele, auā ua na iloa ua puupuu lona taimi.”

Ua faaalia mai i faasologa o mea na taʻua i le Tusi Paia faapea mea o loo tutupu i le lalolagi, na amata lenei taua i le lagi ina ua uma ona faavaeina le Malo o le Atua i le lagi i le 1914.a O lea, o le tausaga lava na tau ai le taua i le lagi na gāpā ai foʻi le taua i le lalolagi.

a Tagaʻi i le mataupu e 8 o le tusi O ā Aʻoaʻoga Moni a le Tusi Paia? lomia e Molimau a Ieova.

Po ua Amata le Tiʻetiʻega a Tagata Tiʻetiʻe Solofanua e Toʻafā?

O le solofanua paʻepaʻe, ma o lē o loo tiʻetiʻe ai o le tupu i le lagi. O Iesu Keriso o ia lenā o le Tupu o loo tiʻetiʻe i le ala o le amiotonu. (Salamo 45:4) O lana matafaioi muamua, o le aveesea lea o Satani ma ana temoni mai le lagi.—Faaaliga 6:2; 12:9.

O le solofanua mūmū, ma o lē o loo tiʻetiʻe ai ua iā te ia le pule “e aveesea ai le filemu mai i le lalolagi.” (Faaaliga 6:4) Talu mai le 1914, ua faaauau pea ona mafatia tagata ona o faigātaua. Ina ua mavae tausaga e 21 talu ona māeʻa le Taua Muamua o le Lalolagi, ae gāpā loa le Taua Lona Lua o le Lalolagi, lea e sili atu le toʻatele o tagata na maliliu ai. Na taʻua i se tasi o suʻesuʻega, pe tusa ma le 60 miliona soifua o i latou na maʻimau ai i lenā taua. Talu mai le 1945, ua sili atu ona tele fetauaʻiga i totonu lava o atunuu. Na taʻua e nisi o tusitala o le talafaasolopito, e silia ma le 100 miliona tagata na maliliu ona o faigātaua a o faagasolo le senituri lona 20.

O le solofanua uliuli, ma o lē o loo tiʻetiʻe ai ua i lona lima se fua faatautau lea e faaāta mai ai le oge. (Faaaliga 6:5, 6) I le vaitaimi o le taua muamua a le lalolagi, pe tusa ma le 750,000 tagata na maliliu i totonu o Siamani, ona na taofia e nisi o ʻautau le avatuina i totonu o le atunuu o meataumafa. I le 1921, e silia ma le lua miliona tagata Rusia na feoti ona o le fia aai, ma o le tulaga foʻi lenā i le tele o isi vaipanoa. I se tuufaatasiga, pe tusa ma le 70 miliona tagata na maliliu ona o le oge a o faagasolo le senituri lona 20. I tausaga taʻitasi, e silia ma le tolu miliona tamaiti e i lalo ifo o le lima tausaga e feoti ona o le lē lava o meataumafa.

O le solofanua samasama vaivai, ma o lē o loo tiʻetiʻe ai e aumaia le oti e ala i faamaʻi oti. (Faaaliga 6:8) O le faamaʻi oti muamua lava i le senituri lona 20 o le fulū Sepania. E eseese lava fuainumera, ae na taʻua i se tasi o faamaumauga pe ā ma le 50 miliona tagata na maliliu ona o lenei faamaʻi. Ua faapea mai le tusi o le Man and Microbes: ʻO lenei faamaʻi pipisi o se tasi lea o mala e sili ona mataʻutia i le talafaasolopito, auā pe a faatusatusa atu i le faamaʻi na feaveaʻi e iniseti faalafuā, e leʻi toʻatele ni tagata na vave ona maliliu ai.’ O isi faamaʻi pipisi e pei o le tane susu, malalia ma le fatafata vaivai, na māfua ai le maliliu o le faitau selau miliona o tagata a o faagasolo le senituri lona 20.