Aiseā ua Lē Taofia ai e le Atua Ē e Malolosi Mai le Sauāina o Ē Vaivai?

O loo faamauina i le Tusi Paia nisi o tala e faatatau i le sauāina e ē malolosi o ē vaivai. Atonu e oso aʻe i o tatou mafaufau le tala iā Napota.a Na faataga e Aapo le tupu o Isaraelu i le senituri lona sefulu T.L.M., lona toʻalua o Iesepela ina ia fasiotia Napota ma ona atalii, ae fai mo ia le togāvine a Napota. (1 Tupu 21:1-16; 2 Tupu 9:26) Aiseā na lē taofia ai e le Atua le faaaogāsesēina e Aapo o lana pule?

Seʻi o tatou iloiloina se tasi o māfuaaga tāua: E lē talapepelo le Atua. (Tito 1:2) O le ā le fesootaʻiga o lenā manatu ma gaoioiga sauā? I le amataga, na lapataʻi ai e le Atua le fanau a tagata, o le fouvale iā te ia e iʻu atu ai i se iʻuga faanoanoa, o le oti. Ua moni ai fetalaiga a le Atua, ua avea le oti ma mea masani i olaga o tagata talu mai le taimi o le fouvalega i Etena. O le tagata muamua lava na maliu i se gaoioiga sauā, o Apelu ina ua fasiotia e lona uso o Kaino.​—Kenese 2:16, 17; 4:8.

Ua aoteleina i le Afioga a le Atua le olaga o tagata seʻia oo mai i le taimi lenei e faapea: “Ua pule ai le tagata i le isi tagata ma ua matuā afāina ai o ia.” (Failauga 8:9) Pe ua lē faamaonia ea le moni o na upu? Na lapataʻia e Ieova lona nuu o Isaraelu, o le a pulea i latou e ni tupu sauā, ma o le a faapogaia ai lo latou alalaga atu i le Atua. (1 Samuelu 8:11-18) E oo foʻi i le tupu o Solomona, na ia pule ma le sauā i ona tagata e ala i le soona fai o lafoga. (1 Tupu 11:43; 12:3, 4) Ae na sili atu ona sauā isi tupu amioleaga e pei o le tupu o Aapo. Seʻi manatu: Pe afai e taofia e le Atua nei faiga sauā, o lona uiga la ua pepelo o ia e tusa ma ana fetalaiga.

Ia manatua foʻi, na tuuaʻia e Satani i latou o loo auauna i le Atua e faapea, e ala ona latou faia faapea ona e puipuia ai i latou e Ieova. (Iopu 1:9, 10; 2:4) Pe afai e puipuia e le Atua ana auauna mai i faiga sauā, pe ua lē faamaonia ai la e saʻo tuuaʻiga a Satani? Pe afai e taofia e le Atua so o se mafatiaga e oo i tagata, pe ua lē tuuaʻia ea la o ia i le faia o se pepelo? Pe afai e puipuia e le Atua tagata, e ono manatu ai le toʻatele e mafai ona latou pulea i latou lava e aunoa ma le taʻitaʻiga a le Atua. Ae e manino le manatu o loo i le Tusi Paia, e lē mafai e le tagata ona pulea o ia lava. (Ieremia 10:23) E tatou te naunau ia oo mai le Malo o le Atua, auā e na o le pau lea o le Malo e mafai ona faaiʻuina faiga lē tonu.

Po o lona uiga la e leai se gaoioiga a le Atua e faia i le aveesea o faiga sauā? E leai. Seʻi o tatou tilofaʻia gaoioiga e lua e na te faia. Muamua, e na te faalialia mai faiga sauā. O se faataʻitaʻiga, o loo taʻua i le Tusi Paia gaoioiga leaga uma a Iesepela faasaga iā Napota. Ua faailoa mai foʻi i le Tusi Paia, o nei gaoioiga uma na faapogaia e se pule e sili ona sauā, o lē e natia lona tulaga moni. (Ioane 14:30; 2 Korinito 11:14) Ua taʻu mai i le Tusi Paia, o ia o Satani le Tiapolo. E ala i le faaalialia o amioga leaga ma faiga sauā, faapea ma le puna o nei faiga, ua fesoasoani mai ai le Atua iā i tatou ina ia taumamao mai i amioga leaga. E na te puipuia foʻi lo tatou faamoemoe mo le lumanaʻi.

Lona lua, ua saunia e le Atua se faamoemoe mautinoa, lea o le a ia tafiesea ai faiga sauā. O le auala na faaalialia, faamasinoina, ma faasalaina ai Aapo ma Iesepela, faapea ma le toʻatele e pei o i laʻua, ua faamautinoa mai ai iā i tatou lana folafolaga, e iai le taimi o le a ia aveesea ai i latou e faia mea leaga. (Salamo 52:1-5) Ua saunia foʻi e le Atua se faamoemoe pupula, o le aveesea lea o le amioleaga o loo aafia ai i latou e alolofa iā te ia.b O le a iai le taimi o le a ola ai Napota ma ona atalii i le lalolagi e faavavau, e aunoa ma ni faiga lē tonu.​—Salamo 37:34.