Aiseā e Tatalo ai Tagata?

Pe e masani ona e tatalo? O le toʻatele o tagata e faia faapea, e oo lava i ē e lē talitonu e iai se Atua. Ae aiseā e tatalo ai le toʻatele o tagata? E tusa ai o se suʻesuʻega na faia i Falani, o le ʻafa o tagatānuu o lenā atunuu na faapea mai, e tatalo pe manatunatu loloto i nisi taimi ina ia “faaleleia ai o latou faalogona.” O le manatu lenā o le toʻatele o tagata Europa, ma e latou te lē tatalo ina ia tapuaʻi ai i le Atua. I le isi itu, o isi tagata talitonu e faatoʻā tatalo lava pe a manaʻomia se fesoasoani, ma e latou te faatalitalia o le a vave ona tali mai a latou tatalo.​—Isaia 26:16.

Ae o le ā sou manatu? Po o le tatalo ua na o se auala e faaleleia ai ou faalogona? Pe afai e te talitonu i le Atua, po o e iloaina le fesoasoani a le tatalo i lou olaga? Po o foliga mai e lē o taliina au tatalo? E fesoasoani le Tusi Paia iā te oe ina ia iloa ai, o le tatalo o se meaalofa tautele e mafuta vavalalata atu ai i le Atua, ae e lē na o se auala e faaleleia ai ou faalogona.