TALIINA FESILI FAALE-TUSI PAIA

Aiseā e tatau ai ona tatou tatalo?

E finagalo Ieova le Atua e tatou te faailoa atu e lē aunoa iā te ia mea e tatou te popole ai. (Luka 18:1-7) E faafofoga mai o ia auā o loo manatu alofa mai iā i tatou. Talu ai ua valaaulia ma le māfana i tatou e lo tatou Tamā i le lagi e tatalo atu, e lē atamai la lo tatou teena o lana valaaulia.​—Faitau Filipi 4:6.

O le tatalo e lē faapea e tau ina talosaga atu mo se fesoasoani. Peitaʻi, o le tatalo e mafai ai ona tatou faalatalata atu ai i le Atua. (Salamo 8:3, 4) O le a māfana la tatou faauōga ma le Atua, pe a fai ma masani le faaleo atu o o tatou faalogona iā te ia.​—Faitau Iakopo 4:8.

O le ā le auala e ao ona tatou tatalo ai?

Pe a tatou tatalo, e lē finagalo le Atua e tatou te faaaogāina ni upu faalialiavale, aʻo faatauloto pe tausisi foʻi i se auala faapitoa. Peitaʻi, e finagalo Ieova e tatou te tatalo mai le loto. (Mataio 6:7) O se faataʻitaʻiga, i Isaraelu anamua na tatalo ai Hana i se faafitauli i lona aiga na matuā tigā ai lona loto. Mulimuli ane, ina ua suia lona lotomafatia i le olioli, ona ia tatalo atu lea ma le lotofaafetai i le Atua.​—Faitau 1 Samuelu 1:10, 12, 13, 26, 27; 2:1.

Maʻeu se faaeaga matagofie ua tatou maua! E mafai ona faailoa atu o tatou popolega uma i Lē na foafoaina mea. E tatau foʻi ona tatou viiviia ma faafetaia o ia mo mea uma ua ia faia. O lea, ia faaaogā lelei lenei faaeaga tāua.​—Faitau Salamo 145:14-16.