TALIINA FESILI FAALE-TUSI PAIA
Aiseā e tatou te tatalo ai ia oo mai le Malo o le Atua?
Pe e te fia silafia atili e uiga i le Malo o le Atua ma mea o le a ia faataunuuina?
O le Malo o le Atua o se pulega i le lagi. Na fetalai Iesu i ona soo ia tatalo ia oo mai le Malo, ina ia toe faafoʻisia mai ai le amiotonu ma le filemu i le lalolagi. E lē mafai e se faigāmalo a tagata ona aveesea faiga sauā, le lē faamasinotonu, po o maʻi, ae ua na o le malo o le Atua e mafaia ma o le a faia faapea. Ua filifilia e le Atua lona Alo o Iesu e fai ma Tupu o le Malo, faapea foʻi se vaega o soo o Iesu ina ia avea ma tupu faatasi ma ia.—Faitau le Luka 11:2; 22:28-30.
Ua toe nei o se aga ona aveesea lea e le Malo o le Atua i latou uma e tetee i lana pulega. O lea, o le tatalo ia oo mai le Malo o le Atua, o se talosaga i le pulega a le Atua ina ia suia malo uma faale-tagata.—Faitau le Tanielu 7:13, 14; Faaaliga 11:15, 18.
Aiseā e faapea atu ai o le a maua e tagata aogā mai le Malo o le Atua?
Ua talafeagai ona avea Iesu ma Tupu ona e alofa mutimutivale. O le avea ai o ia ma Alo o le Atua, ua iā te ia foʻi le mana e laveaʻi ai i latou uma e tagi atu i le Atua mo se fesoasoani.—Faitau le Salamo 72:8, 12-14.
O i latou e tatalo ia oo mai le Malo o le Atua ma gaoioi e tusa ma lona finagalo, o le a latou maua aogā mai i lenā Malo. O le a lē taitai ona e salamō i lau filifiliga e iloilo le aʻoaʻoga a le Tusi Paia, e uiga i le Malo o le Atua.—Faitau le Luka 18:16, 17; Ioane 4:23.