Po o Lua Talanoa ma le Atua?

O so o se faauōga māfana lava e masani ona fesootaʻi i le tele o taimi, e tusa pe talanoa faafesagaʻi, pe e ala i le telefoni, imeli, vitiō, ma tusi. O lea, ina ia vavalalata atu i le Atua, e tatau ona tatou fesootaʻi ma ia e lē aunoa. E faapefea ona faia faapea?

E mafai ona tatou talanoa atu i le Atua e ala i le tatalo. Peitaʻi, e lē tutusa le tatalo i le Atua ma se talanoaga faasamasamanoa ma sau uō. Pe a tatalo atu i le Atua, e tatau ona tatou iloa o ia o Lē na foafoaina mea, ma o le Silisili Ese i le vateatea aoao. O le iloaina o lenā mea moni, e uunaʻia ai i tatou e matuā faaaloalo atu iā te ia. Ina ia faafofogaina e le Atua a tatou tatalo, e iai vala e tolu e manaʻomia ona tatou faia.

Muamua, e tatau ona taulaʻi saʻo atu a tatou tatalo iā Ieova le Atua, ae e lē o Iesu, sagato, po o ni tupua. (Esoto 20:4, 5) Ua faapea mai le Filipi 4:6: “Ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai.” Lua, o tatalo uma e tatau ona auala atu i le suafa o Iesu Keriso, ma sa faamautinoa mai e Iesu lava ia le manatu lenei: “E leai se tasi e alu atu i le Tamā pe a lē ui mai iā te aʻu.” (Ioane 14:6) Tolu, e tatau ona ōgatusa a tatou tatalo ma le finagalo o le Atua. Ua taʻua i le 1 Ioane 5:14: “Po o ā lava mea tatou te talosaga atu ai e tusa ma lona finagalo, e faafofoga mai lava o ia iā i tatou.”a

O le mea moni, e lē tumau se faauōga pe a faumālō le tasi i le talanoaga. I le pei o se faauōga māfana e fetalanoaaʻi, e tatau ona tatou faataga le Atua e talanoa mai, ma e tatau ona tatou faalogo atu iā te ia. Pe e te silafia le auala e talanoa mai ai le Atua iā i tatou?

I aso nei, o loo “talanoa” mai Ieova iā i tatou e ala mai i lana Afioga, le Tusi Paia. (2 Timoteo 3:16, 17) Aiseā ua tatou manatu ai faapea? Mafaufau i le tulaga lenei: Pe a e maua se tusi mai i sau uō, e peiseaʻī o loo talanoa mai o ia iā te oe e ui lava e te lua lē o faatasi. I se tulaga talitutusa, e tatou te faataga le Atua e talanoa mai iā i tatou, e ala i le faitau o le Tusi Paia. Na faapea mai Gina lea na taʻua i le mataupu muamua: “Pe afai ou te manaʻo e silasila mai le Atua iā te aʻu o sana uō, e tatau la ona ou faitau i lana ʻtusi’ mo i tatou, o le Tusi Paia.” Na ia toe faapea mai: “O le faitauina o le Tusi Paia i aso taʻitasi, ua atili ai ona ou vavalalata atu i le Atua.” Po o e faataga Ieova e talanoa mai iā te oe, e ala i le faitau o lana Afioga i aso taʻitasi? O lou faia faapea, o le a atili ai ona e vavalalata atu iā te ia.