O le Olaga Sili Lenei

O le ā e tatau ona e faia ina ia vavalalata atu ai i le Atua? Ua māeʻa ona tatou iloiloina vala o mulimuli mai ina ia atiaʻe ai se faiā vavalalata ma le Atua:

1. Iloa ma faaaogā lona suafa, o Ieova.

2. Talanoa e lē aunoa ma ia, e ala i le tatalo ma suʻesuʻe lana Afioga, le Tusi Paia.

3. Faaauau ona faia mea e finagalo ai o ia.

E tusa ai o nei vala, po o e faia mea e manaʻomia ina ia vavalalata atu ai i le Atua? Pe e iai ni vala e tatau ona e faaleleia? E moni e manaʻomia ni taumafaiga, ae seʻi manatu i iʻuga e maua mai ai.

Na faapea mai Jennifer mai i le Iunaite Setete: “E tauia taumafaiga uma ina ia atiaʻe se faiā vavalalata ma le Atua. O lenei faiā e maua ai le tele o faamanuiaga: o le a atili ai ona tatou maufaatuatuaina le Atua, iloa lelei ona uiga, ae sili ai o le a matuā faamalosia lo tatou alofa mo ia. O le olaga sili lenei.”

Pe a e manaʻo e atiaʻe ma maua se faiā māfana ma le Atua, e fiafia Molimau a Ieova e fesoasoani atu, e ala i le faia o sau talanoaga faale-Tusi Paia e aunoa ma se totogi. E valaaulia foʻi ma le māfana oe e auai i a latou sauniga faale-Tusi Paia i se Maota mo Sauniga e lata ane, ma o le a e aufaatasi ai ma i latou e faatāua la latou faiā ma le Atua.a O le faia faapea, o le a pei ai ou faalogona o le faisalamo o lē na faapea mai: “A o aʻu nei, ou te faalatalata atu i le Atua ou te lelei ai.”​—Salamo 73:28.