TALIINA FESILI FAALE-TUSI PAIA
O le ā ua uunaʻia ai le toʻatele e iloilo pe o soifua moni Lē na foafoaina mea?
E mataʻina le ola
Na tusi se fatusolo i le pe ā ma le 3,000 tausaga ua mavae: “Ua e faia aʻu i se auala mataʻutia ma ofoofogia.” (Salamo 139:14) Pe e te lē maofa pe a e mafaufau i le auala e maua ai se pepe mai i se sela e tasi? E toʻatele tagata ua viiviia Lē na foafoaina mea, ona o le auala na ia foafoaina ai meafaiola.—Faitau le Salamo 139:13-17; Eperu 3:4.
O Lē na foafoaina le vateatea ma le lalolagi ina ia ʻainā, o ia foʻi na foafoaina le ola. (Salamo 36:9) E fesootaʻi mai o ia i tagata ma faailoa mai o ia iā i tatou.—Faitau le Isaia 45:18.
Pe na tatou tupuga mai i meaola?
E tele vaega e talitutusa ai o tatou tino ma tino o meaola. O le māfuaaga, ona na faia uma i tatou ma meaola e Lē na foafoaina mea, ina ia ola i le lalolagi. Na ia faia le uluaʻi tagata mai i le efuefu o le eleele, ae lē mai i se meaola.—Faitau le Kenese 1:24; 2:7.
E lua auala tāua e ese ai tagata mai i meaola. Muamua, ua i le tagata le tomai e iloa, alofa, ma faaaloalo ai i Lē na foafoaina mea. Lua, na faia le tagata ina ia ola e faavavau, ae e leʻi faia faapea meaola. Pagā lea, ua oo mai le oti i tagata uma ona na teena e le uluaʻi tagata le taʻitaʻiga a Lē na foafoaina mea uma.—Faitau le Kenese 1:27; 2:15-17.