MATAUPU AUTŪ | AUALA E FEAGAI AI MA POPOLEGA
Ua Iai Popolega i so o se Mea
“Sa ou alu e faatau mai ni meaʻai, ae e na o pepa keke na maua, ma na matuā taugatā atu nai i lo o le tau masani. I le aso na sosoo ai, na matuā leai ni meaʻai i faleoloa.”—Paulo, Zimbabwe.
“Sa talanoa mai loʻu toʻalua ma faapea mai o le a ia tuua i matou. E faapefea ona ou onosaia lenei tulaga lē faamaoni? O le ā o le a tupu i si aʻu fanau?”—Ianeta, Iunaite Setete.
“Pe a ee sailini, ou te tamoʻe e suʻe se mea e lafi ai ma taoto i le fola a o pāpā pomu. Mulimuli ane e umi se taimi o tetete pea oʻu lima.”—Alona, Isaraelu.
Ua tatou ola i taimi o le tele o popolega ma o “aso e sili ona faigatā.” (2 Timoteo 3:1) E toʻatele ua popole i faigatā tau tupe, le malepelepe o aiga, taua, faamaʻi pipisi, ma mala faalenatura po o mala e faapogaia e tagata. E iai foʻi popolega o le tagata lava ia e pei o nei: ʻPo o le a avea ma kanesa le patu lea e i loʻu tino?’ ʻO le ā le ituaiga olaga o le a ola aʻe ai fanau a si aʻu fanau?’
E lē o popolega uma e leaga. E masani ona tatou popole a o leʻi suʻeina se suʻega, faia se faafiafiaga po o se faatalanoaga o se galuega. O le popole foʻi i tulaga e aafia ai o tatou ola, e mafai ona ʻalofia ai ni tulaga lamatia. Peitaʻi, e ogaoga aafiaga o le soona popole. I ni suʻesuʻega na faia talu ai nei na aofia ai le silia i le 68,000 tagata matutua, na iloa mai ai e oo lava i popolega lāiti ua toʻatele tagata ua maliliu ai a o leʻi taitai tausaga. E lētioa fetalai Iesu: “O ai ea se tasi o outou e mafai e lona popole ona toe faaopoopo ni nai aso i lona olaga?” Talu ai o le a puupuu le ola o se tasi ona o le popole, o lea na fautua mai ai Iesu: “Aua tou te toe popole.” (Mataio 6:25, 27) Ae e mafai faapefea ona ʻalofia le popole?
E aofia ai i le tali o lenei fesili le faaalia o le atamai aogā, faatuatua moni i le Atua, ma le atiaʻe o se faamoemoe pupula mo le lumanaʻi. E tusa pe e tatou te lē o feagai ma ni tulaga e faapopoleina ai i le taimi nei, ae e tatou te ono feagai ma ni tulaga faapena i le lumanaʻi. O lea, seʻi iloilo pe na faapefea ona fesoasoani nei vala iā Paulo, Ianeta ma Alona, ina ia feagai ai ma popolega.