Ua Sili Atu Mea ua Foaʻi Mai e Ieova Nai lo o Mea na Ou Faatalitalia

Sa ou ola aʻe i le taulaga o Alicante, i le talafatai i sasaʻe o Sepania. E leʻi lelei le siʻomaga i totonu o loʻu aiga, ma o le māfuaaga lea na ou tafaovale solo ai i le auala tele a o oʻu talavou. E iai se fale e fai ai paʻu o taavale na lata ane i lo matou fale. O i inā na ou masani ai iā José María, o sē na faigaluega ai. O ia o sē e māfana ona uiga ma uaʻi mai iā te aʻu, o uiga e leʻi maua i loʻu aiga. E ui e 20 tausaga e matua ai o ia iā te aʻu, ae sa pei o se uso ma se uō moni iā te aʻu i taimi faigatā.

Na suʻesuʻe e José María le Tusi Paia ma Molimau a Ieova. Na ou iloa lona naunau i le Afioga a le Atua, ma e masani ona ia faasoa mai iā te aʻu upu moni o le Tusi Paia. Sa ou faalogologo lelei iā te ia, ae ou te leʻi naunau i ana tala na fai mai. O aʻu o se talavou ma na ou pisi i le tele o isi mea. Peitaʻi, o le a suia na mea uma.

O SE FAALAVELAVE NA SUIA AI LOʻU OLAGA

Ou te lē fia talanoa e faatatau i le faalavelave na tupu. Na o le pau laʻu tala, sa ou valea ma faatamala. E tasi le aso ae na suia atoa ai loʻu olaga. Sa ou talavou ma aumalosi, a o lea ua pē atoa loʻu tino ma na taofia ai i le falemaʻi. Sa faigatā ona ou talia le mea ua tupu. Na ou tuufesili, ʻO le ā le aogā ou te toe ola ai?’

Na sau José María e asi aʻu, ma na vave ona ia faafesootaʻi Molimau a Ieova i se faapotopotoga e lata ane, ina ia asiasi mai iā te aʻu i le falemaʻi. Sa pāʻia loʻu loto i lo latou asiasi mai pea. Ina ua ou teʻa mai le potu tigāina, na amata loa laʻu suʻesuʻega faale-Tusi Paia. Na ou iloa ai le upu moni e faatatau i le māfuaaga e mafatia ma maliliu ai tagata, ma le māfuaaga e lē taofia ai e le Atua mea leaga. Ua ou iloa ai foʻi le folafolaga a le Atua mo le lumanaʻi, o le a tumu le lalolagi i tagata lelei atoatoa, ma o le a lē toe faapea mai se tasi: “Ou te maʻi.” (Isaia 33:24) O le taimi muamua lea i loʻu olaga ua ou maua ai se faamoemoe pupula.

Ina ua ou teʻa mai i le falemaʻi, na agaʻigaʻi i luma aʻu suʻesuʻega o le Tusi Paia. Na mafai ona ou auai i nisi o sauniga ma talaʻiga a Molimau a Ieova, ona o se nofoa faataavalevale faapitoa na ou maua. Iā Novema 5, 1988, i le 20 o oʻu tausaga, na ou papatiso ai i se tapu taʻele faapitoa. Na fesoasoani mai Ieova ina ia ou maua se vaaiga paleni i le olaga. O le ā o le a ou faia e faaalia ai loʻu talisapaia?

AGAʻI PEA I LUMA E UI E LĒ ATOA LE MALOSI O LE TINO

Sa ou maumauaʻi ia aua neʻi avea loʻu tulaga ma mea e taofia ai aʻu mai le faia o se sao atoatoa i le auaunaga iā Ieova, ma na ou manaʻo e agaʻi pea i luma. (1 Timoteo 4:15) E leʻi faigofie i le taimi muamua, ona na tetee loʻu aiga i loʻu talitonuga fou. Peitaʻi, sa iai oʻu uso ma tuafāfine faaleagaga. Na latou faamautinoa e lē misia saʻu sauniga ma ia fai soʻu sao i le talaʻiga.

A o faagasolo taimi, sa ou iloa ai o le a ou manaʻomia se tausiga faapitoa i le aso atoa. Sa umi se taimi o tau saʻili se nofoaga faapitoa e tausia ai tagata e lē atoatoa le malosi, ae maua loa i le taulaga o Valencia, e 100 maila (160 km) i mātū o Alicante. Na avea lenā nofoaga ma oʻu aiga.

E ui ua ou faataotolia, ae sa ou taumafai e auauna pea iā Ieova. Na faaaogā laʻu penisione mo ē e lē atoatoa le malosi, ma isi faamanuiaga mo ē e mamaʻi, e faatau ai saʻu telefoni feaveaʻi ma saʻu komepiuta e faapipii i autafa o loʻu moega. I taeao taʻitasi, e ki e le tausi maʻi laʻu komepiuta ma le telefoni feaveaʻi. Ou te faaaogā se masini faapitoa (joystick) e faagaoioi e loʻu auvae, e faatonutonu ai le komepiuta. E iai foʻi se laau faapitoa e pei o se peni e ū i loʻu gutu, ina ia oomi ai mataʻitusi i le komepiuta ma fuainumera o le telefoni feaveaʻi.

Ua fesoasoani nei masini faaonapōnei ina ia mafai ai ona ou faaaogā le upega tafaʻilagi o le jw.org, ma le vaega LOMIGA I LE INITANETI. E ese le aogā o nei meafaigaluega iā te aʻu! I aso taʻitasi, e tele itula ou te faaalu i aʻu suʻesuʻega ma saʻiliʻiliga i lomiga faale-Tusi Paia, ina ia ou aʻoaʻoina ai pea e faatatau i le Atua ma ona uiga matagofie. Pe a ou lagona le tuua toʻatasi po o le lotovaivai, e iai lava se mataupu i le upega tafaʻilagi e fesoasoani iā te aʻu.

Ua mafai foʻi ona faaaogā laʻu komepiuta ou te faalogologo ai ma fai se sao i sauniga a le faapotopotoga. E mafai ona ou tali, tatalo, fai lauga, ma faitau le mekasini o le Olomatamata pe a tofia aʻu. E ui e lē o mafai ona ou alu i sauniga, ae ou te lagona pea o loo avea aʻu ma se sui o le faapotopotoga.

Ua mafai foʻi ona fai soʻu sao atoatoa i le talaʻiga e ala i laʻu telefoni ma le komepiuta. E moni e lē o mafai ona ou talaʻi mai lea fale i lea fale, e pei ona faia e le toʻatele o Molimau a Ieova, ae e lē o taofia ai aʻu. O le faaaogā o nei meafaigaluega, ua mafai ai ona faasoa atu i isi oʻu talitonuga. Ou te fiafia tele e talaʻi e ala atu i le telefoni, ma ua iʻu ai ina talosaga mai toeaina o le faapotopotoga, pe mafai ona ou faatulagaina tauiviga o talaʻiga i telefoni. Ua aogā foʻi nei faatulagaga i isi sui o le faapotopotoga e lē o mafai ona tuua o latou fale.

E lē faapea e na o masini faaonapōnei e alu uma i ai loʻu taimi. E asiasi mai foʻi aʻu uō mamae i aso uma faatasi ma o latou tauaiga ma uō, o ē e naunau i le Tusi Paia. O nisi taimi e latou te mananaʻo ou te taʻimua i se talanoaga. A o isi taimi, e asiasi mai aiga ma faaaofia aʻu i a latou tapuaʻiga a le aiga. E ese loʻu fiafia pe a faalatalata mai le fanau, ma faamatala mai māfuaaga e latou te alolofa ai iā Ieova.

Ou te talisapaia le toʻatele o tagata e asiasi mai. E masani ona tumu loʻu potu i tagata asiasi, o aʻu uō, ma o nisi e mamao le mea e malaga mai ai. E maofa le ʻaufaigaluega o le nofoaga o loo oʻu nofo ai, i le toʻatele o ē e alolofa mai. Ou te faafetai ai Ieova i aso taʻitasi i le avea o aʻu ma se vaega o lenei ʻauuso.

TAUMAFAI PEA

O so o se taimi ou te feiloaʻi ai i se tagata ae fesili mai po o ā mai aʻu, ou te tali atu i ai, “O lea lava e taumafai pea!” Ou te iloa e lē na o aʻu o loo aafia i tulaga faigatā. Po o ā lava o tatou tulaga ma faigatā, ae o loo aafia uma Kerisiano i se taua, o le “taua lelei o le faatuatua.” (1 Timoteo 6:12) O le ā ua fesoasoani iā te aʻu mo le tele o tausaga e ui i faigatā? Ou te tatalo i aso uma ma faafetaia Ieova mo le aumaia o se faamoemoe i loʻu olaga. Ou te taumafai foʻi e pisi i le auaunaga i le Atua, ma uaʻi atu pea i le faamoemoe mo le lumanaʻi.

E fai ma ou mafaufau i le lalolagi fou, i oʻu faalogona o le a iai pe afai e mafai ona ou toe tamoʻe ma oso i luga. O nisi taimi e ma te tausua ai ma laʻu uō mamae o José María, o lē e pipili, e faatatau i le ma tamomoʻe faatasi i se malafoni. Ou te fesili i ai, “O ai o le a mua?” E tali mai o ia, “E lē taulia po o ai e mua, o le mea taulia ia iai i le Parataiso ina ia ta tamomoʻe ai.”

E lē faigofie pe a ou mafaufau i loʻu tulaga. Ou te iloa na ou faia se gaoioiga lē faautauta a o ou talavou, ma o lea ua ou matuā aafia ai. Ae e faafetai iā Ieova i lona lē tuulafoaʻia o aʻu. E tele mea ua ia foaʻiina mai mo aʻu, o se aiga faaleagaga toʻatele, o se faanaunauga e ola pea, le olioli i le fesoasoani i isi, ma se faamoemoe pupula mo le lumanaʻi. Pe a taaofaʻi oʻu faalogona, e mafai ona ou faapea atu, ua sili atu mea ua foaʻi mai e Ieova nai lo o mea na ou faatalitalia.