E Faapefea Ona Faatupe a Matou Galuega?

O tausaga uma e matou te lolomi ma tufatufa atu ai le faitau selau miliona o Tusi Paia, mekasini ma tusi faale-Tusi Paia. E matou te fausia ma faagaoioia a matou ofisa o lālā ma fale lomitusi i le lalolagi aoao. O le faitau sefulu afe o faapotopotoga, e faapotopoto i fale mo tapuaʻiga e mananaia ma faigofie o latou fausaga, ua taʻua o Maota mo Sauniga. O ai e faatupeina nei mea uma?

O a matou galuega uma e faatupe e ala i foaʻi o meaalofa tauofo. (2 Korinito 9:7) I le 1879, na taʻua ai i le lomiga lona lua o lenei mekasini e faapea: “E matou te talitonu o loo lagolagoina e IEOVA le ʻZion’s Watch Tower’ [e pei ona faaigoa ai lenei mekasini i na taimi], ma o le pogai lea e lē taitai ai ona matou ʻaisi pe talosagaina se fesoasoani a isi.” O loo matou mulimuli pea i lenei taʻiala.

O nei meaalofa e tuu saʻo atu i se tasi o a matou ofisa o lālā, pe i se pusa o meaalofa o loo iai i Maota mo Sauniga taʻitasi. E lē faia ni a matou sefuluaʻi pe ao ni peleti. E lē totogia a matou sauniga po o mekasini ma tusi. E lē totogia foʻi i matou pe a talaʻi, aʻoaʻo i le faapotopotoga, pe fesoasoani i le fausia o fale mo tapuaʻiga, auā na fetalai Iesu: “Ia outou avatu fua, auā ua outou maua fua.” (Mataio 10:8) O tagata talaʻi uma o loo iai i a matou ofisa o lālā ma le ofisa ulu, e aofia ai ma ē o loo faia aʻe ai le Vaega Pule a Molimau a Ieova, o sui o se vaega faalotu e lē totogia.

O tupe o loo foaʻi tauofo e faaaogā foʻi mo fesoasoani laveaʻi i taimi o mala. Sa fiafia uluaʻi Kerisiano e tufa atu meaalofa i ē na aafia i tulaga faigatā. (Roma 15:26) E faapena foʻi ona matou fesoasoani i ē ua aafia i mala, e ala i le toe fausia o o latou fale, nofoaga mo tapuaʻiga, ma saunia atu meaʻai, lavalava ma togafitiga faafomaʻi.