MATAUPU AUTŪ | O AI MOLIMAU A IEOVA?
Aiseā e Matou te Talaʻi Ai?
Ua matilatila i matou i la matou galuega talaʻi mai i lea fale i lea fale, i nofoaga faitele, ma i so o se mea e maua ai tagata. Aiseā e matou te talaʻi ai?
E talaʻi Molimau a Ieova ina ia faamamaluina ai le Atua ma faalauiloa atu lona suafa. (Eperu 13:15) E matou te usiusitaʻi foʻi i le poloaʻiga a Iesu o loo i le Mataio 28:19, 20: “O le mea lea, ia outou ō atu e fai tagata o nuu uma lava ma soo, . . . ia aʻoaʻoina i latou ia tausi i mea uma ua ou poloaʻi atu ai iā te outou.”
E lē gata i lea, e matou te alolofa i o matou tuaoi. (Mataio 22:39) Ua matou iloa o le toʻatele o tagata e iai a latou lava tapuaʻiga, ma e lē o tagata uma e tali lelei mai i la matou feʻau. Peitaʻi, ua matou iloa o mea o loo aʻoaʻoina i le Tusi Paia e faasaoina ai ola. O le māfuaaga lea ʻua lē aunoa ai ona matou aʻoaʻo atu ma folafola atu le tala lelei e uiga i le Keriso,’ e pei ona sa faia e Kerisiano i le uluaʻi senituri.—Galuega 5:41, 42.
O Antonio Cova Maduro o sē e suʻesuʻe i mea tau lotu. Na tusi o ia e faatatau i “taumafaiga ma le filigā o Molimau a Ieova . . . , ina ia mafai ona faailoa atu tusitusiga paia i tafa eseese o le lalolagi.”—Nusipepa o le El Universal i Venesuela
O le toʻatele o ē e faitau i a matou mekasini ma tusi, e lē o ni Molimau a Ieova. O le faitau miliona foʻi o ē o loo matou suʻesuʻeina le Tusi Paia, e auai i isi tapuaʻiga. Peitaʻi, e latou te lotofaafetai ona ua asiasi atu Molimau a Ieova iā i latou.
Atonu o loo iai nisi au fesili e faatatau i Molimau a Ieova. E matou te faalaeiau oe e saʻili tali e ala i le
Fesili atu i se Molimau a Ieova.
Tagaʻi i la matou upega tafaʻilagi o le www.jw.org/sm.
Auai i a matou sauniga ia e lē totogia ma e talia fiafia so o se tasi e auai ai.